നഷ്ടപ്രദേശങ്ങൾ

ചിലപ്പോൾ അത് അങ്ങനെയാണ്

നാം നമ്മുടേതെന്ന് കരുതുന്ന ഭൂമി 

പെട്ടെന്നൊരുദിനം 

മറ്റാരുടേതോ ആകും.

പേപ്പറിലല്ല, 

മനസിലാണ് ചില ഭൂമിയുടെ 

അതിരുകൾ

നാം എഴുതിവെച്ചിരിക്കുന്നത്.

ആ ഭൂമിയിൽ 

നാല് കാല് താഴ്ത്തി 

നാം പണിഞ്ഞ കുടിൽ

പെടുന്നനെ നമ്മുടേതല്ലാതാകും.

മണ്ണിലാഴ്ത്തിയ മരത്തൂണുകൾ

ചിതലരിച്ച് തുടങ്ങിയിരുന്നത് പോലും

അപ്പോഴേ നാമറിയുകയുള്ളു. 

ആ മണ്ണിൽ നാം നട്ട

മുല്ലവള്ളികൾ 

ഒരുനാൾ പൂക്കാതെയാകും

സുഗന്ധം പൊഴിക്കാതെയാകും

തുമ്പികൾ പറക്കാതെയാകും

അപ്പോഴും 

നാമറിയില്ല, 

ആ ഭൂമി നമ്മുടേതല്ലെന്ന്.

ചില

സൌഹൃദങ്ങളും 

നഷ്ടപ്രദേശങ്ങളും

ഒരുപോലെയാണ്.

നഷ്ടമാകുംവരെ

നമ്മളറിയില്ല 

അത് നമ്മളിടങ്ങളല്ലെന്ന്... 

(120122)