അപൂർണമെങ്കിലും....

ഫെബ്രുവരി
ആദ്യമായി ഇഷ്ടം തോന്നിയ പെൺകുട്ടിയെ ആദ്യമായി കണ്ടത്,
ആദ്യമായൊരു പെൺകുട്ടി ഇഷ്ടം തുറന്നുപറഞ്ഞത്,
പരസ്പരം പ്രണയമാണെന്ന്  തിരിച്ചറിഞ്ഞത് ,
ഭൂമിയിലൊരിടത്ത് ഉറങ്ങാൻ
ഒരുപിടി മണ്ണ് വാങ്ങിയത്,
ഒപ്പിട്ട് ഒരാളെ കൂടെകൂട്ടിയത് ,
എല്ലാം ഫെബ്രുവരിയിൽ തന്നെ.
പക്ഷെ, എല്ലാം  വിശുദ്ധ മാസത്തിലെ
ചന്ദ്രനെ പോൽ
പൂർണമാകാതെ
പാതിയിൽ ഉപേക്ഷിക്കപ്പെട്ട യാത്രകളായി.
നോവിക്കുന്ന നിനവുകളുടെ ഭാരമേറെയെങ്കിലും
ഫെബ്രുവരി,
നീ പ്രിയങ്കരി തന്നെ...

(22022022)