'ആദിമം' അധമം

കുരീപുഴ ശ്രീകുമാറിൻറെ ഒരു കവിതയുണ്ട്. മനുഷ്യപ്രദർശനം എന്ന് പേരിൽ. പതിറ്റാണ്ടുകൾക്കപ്പുറം ഒരു എക്സിബിഷൻ സെൻററിൽ നടക്കുന്ന ഒരു പ്രദർശനമാണ് കവിതയുടെ പ്രമേയം. അവിടെ പ്രദർശനം സംഘടിപ്പിക്കുന്ന യന്ത്രമനുഷ്യരാണ്. പ്രദർശന വസ്തുക്കൾ ആകുന്നത് മനുഷ്യരും. എല്ലാം നമുക്ക് പ്രദർശന വസ്തുവാകുന്നതിലെ അപകടത്തെ കവിത വരച്ചിടുന്നുണ്ട്. 

കേരളീയത്തിൻറെ ഭാഗമായി നടന്ന ആദിമം പ്രദർശനമാണ് കുരീപുഴ വർഷങ്ങൾക്ക് മുമ്പ് എഴുതിയ കവിതയെ വീണ്ടും ഓർമിപ്പിച്ചത്. കേരളത്തിൻറെ കലാരൂപങ്ങളേയും സാധ്യതകളേയുമെല്ലാം ലോകത്തിന് മുന്നിൽ അനാവരണം ചെയ്യുക എന്നതായിരുന്നു കേരളീയം ലക്ഷ്യമിട്ടത്. 30 ഓളം വേദികളിലായി കലയുടേയും സംവാദങ്ങളുടേയും രുചിവൈവിധ്യങ്ങളുമെല്ലാം കമാനമാണ് കേരളം തുറന്നിട്ടത്. കേരളം നിത്യവൃത്തിക്ക് വകയില്ലാതെ മുട്ടിൽ ഇഴയുമ്പോഴായിരുന്നു കോടികൾ ചിലവിട്ടുള്ള കേരളീയം. അതിൻറെ ആവശ്യമുണ്ടായിരുന്നോ എന്നത് മറ്റൊുവിഷയം. എന്തായാലും കേരളീയം തലസ്ഥാനത്തെ ജനത്തിന് ഒരാഴ്ച്ചത്തെ ഉത്സവമായിരുന്നു എന്നതിൽ തർക്കമില്ല, സർക്കാരിന് വലിയൊരു ഉത്സവം നന്നായി സംഘടിപ്പിച്ചതിൻറെ ആശ്വസവും അഭിമാനവും.

എന്നാൽ ആദിവാസികളുടെ കലകളേയും ജീവിതത്തേയും നഗരവാസികളുടെ മുന്നിൽ പച്ചയായി അവതരിപ്പിച്ച ആദിമം ഒരു അക്രമം തന്നെയാണ്. ആദിവാസികളെല്ലാം പച്ചിലയും മറ്റും ധരിച്ചാണ് ഇന്നും നടക്കുന്നത് എന്നാണോ നമ്മുടെ ഫോക്ലോർ അക്കാദമി കരുതിയിരിക്കുന്നത്. ആദിവാസികളുടെ ചരിത്രവും അവർ പണ്ട് താമസിച്ചിരുന്ന സാഹചര്യങ്ങളും കാണിക്കാനാണ് ഇത്തരത്തിലൊരു പ്രദർശനം സംഘടിപ്പിച്ചതെന്നാണ് ഫോക് ലോർ അക്കാദമിയുടെ വിശദീകരണം. അല്ലാതെ അവരെ പ്രദർശന വസ്തുവാക്കിയിട്ടില്ല. 

ഗോത്രസംസ്കൃതിയുടെ നേരനുഭവം എന്ന വിശേഷണത്തോടെ കുടിലുകളും മറ്റും കെട്ടി അവരെ ലിവിങ് മ്യൂസിയം ആക്കിയത് പോലെ പഴയ നായർമാരുടേതടക്കമുള്ള മറ്റ് വിഭാഗങ്ങളുടേയും അവസ്ഥകാണിക്കാൻ ലൈവ് മ്യൂസിയം ഒരുക്കാതിരുന്നത്. എന്തേ മാറുമറക്കാതെയും മറ്റുമുള്ള വേഷവിധാനത്തിൽ അവരെയൊന്നും അണിനിരത്താതിരുന്നത്. അതെന്താ അവരുടെ ചരിത്രം നഗരജനത കാണണ്ടേ. അതോ ആ ചരിത്രം മറച്ചുവെയ്ക്കപെടേണ്ടതാണെന്നാണോ. ആദിവാസികൾ എന്നാൽ നല്ല വസ്ത്രംധരിക്കാത്ത, പച്ചിലയും മറ്റും കൊണ്ട് ശരീരം മറക്കുന്ന ജനവിഭാഗമാണ് ഇപ്പോഴും എന്നാണോ ഫോക് ലോർ അക്കാദമി കരുതിയിരിക്കുന്നത്. അതോ അവർക്ക് ആധുനിക മനുഷ്യൻറെ വസ്ത്രധാരണവും ജീവിത രീതികളും അന്യമാണെന്നാണോ  അതോ പാടില്ലെന്നോ ആണോ കരുതിയിരിക്കുന്നത്. കാലം മാറിയത് ഫോക് ലോർ അക്കദമിക്കാർ അറിഞ്ഞില്ലെങ്കിൽ അത് മനസിലാക്കികൊടുക്കേണ്ട ബാധ്യത കമ്മ്യൂണിസ്റ്റ് സർക്കാരിനുണ്ട്. ആദിവാസികളെ പ്രദർശന വസ്തുവാക്കിയതിനെ മന്ത്രി കെ രാധാകൃഷ്ണൻ തള്ളിപറഞ്ഞിട്ടുണ്ട് എന്നത് ആശ്വാസമാണ്. ആശ്വാസം എന്നേ പറയാൻ പറ്റു. ഇനിയും ഇത് ആവർത്തിക്കില്ലെന്ന് ഉറപ്പുവരുത്താൻ തക്കനടപടിയും ഉണ്ടാകണം. 

എന്ത്കൊണ്ടാണ് സംവരണം ഏഴ് പതിറ്റാണ്ട് കഴിഞ്ഞിട്ടും തുടരേണ്ടിവരുന്നത് എന്നതിനുള്ള ഉത്തരം കൂടിയാണ് ഇത്. സംവരണം ഏർപ്പെടുത്തിയത് നൂറ്റാണ്ടുകളായി അടിച്ചമർത്തപ്പെട്ട്, ചൂഷണത്തിനും മറ്റും വിധേയരായ സമൂഹത്തെ മുഖ്യധാരയിലേക്ക് എത്തിക്കുന്നത് ലക്ഷ്യമിട്ടാണ്. സംവരണത്തിന് ആദ്യം നിശ്ചിതകാലാവധി നിശ്ചയിച്ചിട്ടും ആ കാലാവധി നീട്ടേണ്ടിവന്നത് നൂറ്റാണ്ടുകളോളം ചെയ്ത ചൂഷണം ഒരു നിശ്ചിതകാലംകൊണ്ട് മായ്ച്ചുകളയാനോ അതിൻറെ നഷഅടം നികത്താനോ ആവില്ലെന്നതിനാലാണ്. ഏഴ് പതിറ്റാണ്ട് പിനന്നിട്ടപ്പോൾ സാമൂഹികമായും സാംസ്ക്കാരികമായും ഏറെ മുന്നിൽ നിൽക്കുന്നു എന്ന് മേനി നടിക്കുന്ന കേരളത്തിലെ അവസ്ഥ ഇതാണ് (ഇടതുപക്ഷം ഭരിക്കുന്ന കേരളത്തിൽ) എങ്കിൽ മറ്റ് സംസ്ഥാനങ്ങളിലെ അവസ്ഥ - പ്രത്യേകിച്ചും ചാതുർവർണ്യത്തിലടിസ്ഥാനപ്പെടുത്തിയ ജാതി വ്യവസ്ഥിതി രൂക്ഷമായി നിലനിൽക്കുന്ന ഉത്തരേന്ത്യയിൽ - എന്തായിരിക്കും.

ആദിമം പ്രദർശനം കണ്ട കുഞ്ഞുങ്ങളെ ഇലകൊണ്ട് ശരീരം മറക്കുച്ച് ജീവിക്കുന്നവരല്ല ആദിവാസികൾ. അവർ നമ്മുടെ പ്രകൃതിയുമായി ഇഴചേർന്ന് ജീവിക്കുന്നവരാണ്. അവരും ഈ സമൂഹത്തിൻറെ ഭാഗമാണ്. അവർ ജീവിക്കുന്ന സാഹചര്യങ്ങൾ, അവരുടെ അനുഷ്ടാനങ്ങൾ, ആചാരങ്ങൾ എന്നത് മറ്റുള്ളവരുടേതിൽ നിന്ന് വ്യത്യസ്ഥമാകാം. അതിനർത്ഥം അവർ അപരിഷ്കൃതരാണ് എന്നല്ല. അവരിൽ നിന്ന് ലോകത്തിന് വഴികാട്ടികളായ, ലോകത്തെ നയിക്കുന്ന നിരവധിപേർ ഉയർന്നുവന്നിട്ടുണ്ട്. നമ്മുടെ രാഷ്ട്രപതി ദ്രൌപതി മർമുവും ഗോത്രവിഭാഗത്തിൽ നിന്നുള്ളതാണ്. അവർ പച്ചമനുഷ്യരാണ്, ആധുനികതയുടെ കാപട്യമൊന്നുമില്ലാത്ത  പച്ചമനുഷ്യർ. 

ഭാ​ഗ്യത്തിന് പ്രതി മുസ്ൽമാനായില്ല, കേരളം ആയതുകൊണ്ട് കത്തിയതുമില്ല

കളമശ്ശേരിയിലെ സ്ഫോടനത്തിന്റെ ഉത്തരവാദി മണിക്കൂറുകൾക്കം തന്നെ കീഴടങ്ങിയില്ലായിരുന്നുവെങ്കിൽ എന്തായിരിക്കും സംഭവിച്ചിരിക്കുക? കേരളം എത്രമാത്രം ധ്രുവീകരിക്കപ്പെടുമായിരുന്നു. അധ്യാപകന്റെ കൈപത്തി വെട്ടിമാറ്റിയത് പോലെ ചെറുതായിരിക്കില്ല അതിന്റെ വ്യാപ്തി. കാരണം ഊഴം കാത്ത് കഴിയുന്ന വലിയ ഒരു വിഭാ​ഗം കേരളത്തിന് പുറത്തും അകത്തുമായി ഇത് കാത്തിരിക്കുകയാണ്.

എലത്തൂരിലെ തീവണ്ടിക്കുള്ളിലെ തീവെപ്പ് സംഭവത്തിൽ, ഐഎസ് ഐഎസിലേക്ക് മലയാളികൾ പോയപ്പോൾ എല്ലാം നമ്മൾ കണ്ടതാണ് ഒരുവിഭാ​ഗം തക്കം പാ‍‍‍ർത്തിരുന്നത്, കേരളത്തെ തീവ്രവാദപ്രവ‍‍ർത്തനത്തിന് വേരുകളുള്ള നാടാണ് എന്ന് വരുത്തിതീ‍ര്‌‍ക്കാനുള്ള ശ്രമങ്ങൾ. സമുദായങ്ങളെ പരസ്പരം തമ്മിലടിപ്പിക്കാനുതകുന്ന വിദ്വേഷപ്രസ്താവനകളുമായി ഇറങ്ങുന്ന ഒരു വിഭാ​ഗത്തെ. കളമശ്ശേരിയിലെ യഹോവയുടെ സാക്ഷികളുടെ കൺവെൻഷനിടെയുണ്ടായ ബോംബ് സ്ഫോടനത്തിന് പിന്നാലെയും സമാനമായ വിദ്വേഷ പ്രസ്താവനകൾ ഇവരിൽ നിന്ന് വന്നു. പ്രസ്താവനകൾ നടത്തിയവരാരും ചില്ലറക്കാരല്ല, ഭരണം നടത്തുന്ന മന്ത്രിമാരും പാ‍ർട്ടികളുടെ ഉത്തരവാദിത്തപ്പെട്ട സ്ഥാനങ്ങളിലിരിക്കുന്നവരിൽ നിന്നുമാണ് ഇതെല്ലാം വന്നത്. 

പറഞ്ഞുവന്നത് ബിജെപി നേതാക്കളുടെ പ്രതികരണം സംബന്ധിച്ചാണ്. ചത്തത് കീചകനെങ്കിൽ കൊന്നത് ഭീമൻ തന്നെ എന്നാണമല്ലോ ഇവ‍ർക്ക്. യുക്തിയോ ബോധമോ യാഥാർത്ഥ്യമോ ഒന്നും അറിയേണ്ട. വടി കയ്യിൽ കിട്ടിയാൽ അത് കുത്തി നടക്കാനാണോ അതോ തല്ലാനാണോ എന്നൊന്നും അറിയേണ്ട. തല്ലുക തന്നെ. അതാണ് ഫാസിസ്റ്റുകളുടെ ഏക ലോജിക്ക്.  അത് തന്നെയാണ് കളമശ്ശേരിയിലും നാം കണ്ടത്. കൃസ്ത്യൻ സമൂഹത്തിനെതിരെ ആക്രമണം നടത്താൻ നടക്കുന്നത് ഒറ്റ സമുദായമാണ്. ആ സമുദായമാണ് ഭീകരാക്രമണം നടത്തിയത് എന്നാണ് പേരെടുത്ത് പറയാതെ പറഞ്ഞത്. ഇസ്രയേൽ ഫലസ്തീൻ യുദ്ധത്തിന്റെ പശ്ചാത്തലമെല്ലാം ചൂണ്ടിക്കാട്ടി, ഹമാസിന്റെ നേതാവ് ഫലസ്തീൻ ഐക്യദാര്‌‍ഢ്യസമ്മേളനത്തിൽ സംസാരിച്ചത് ചൂണ്ടിക്കാട്ടിയായിരുന്നു എല്ലാം. അപ്പോൾ ആരെയാണ് ഉദ്ദേശം വെച്ചതെന്ന് വ്യക്തം. അല്ലെങ്കിലും കൃസ്ത്യാനികളെ ആക്രമിക്കുക മുസ്ലീംങ്ങൾ മാത്രമാണല്ലോ. ഹിന്ദു വ‍​ര്​ഗ്​ഗീയ വാദികൾ അതൊന്നും ഒരിക്കലും ചെയ്തിട്ടില്ല എന്നാണല്ലോ ഇവരുടെ ഭാവം. ഒറീസയിലേയും മണിപ്പൂരിലേയും ചരിത്രവും വർത്തമാനവും മറന്നിട്ടുള്ളത് സം​ഘപരിവാരങ്ങൾ മാത്രമാണ്, ശേഷിക്കുന്ന ഇന്ത്യക്കാർക്കെല്ലാം അതെല്ലാം നല്ല ഓർമയുണ്ടെന്നത് ഇവർ മറന്നതാവും.  അല്ലെങ്കിലും ചരിത്രത്തിന് അങ്ങനെ ഒരു കുഴപ്പമുണ്ട്.  ചരിത്രം പലതും ഓർമിപ്പിക്കും. അതിനാലണല്ലോ ചരിത്രം വെട്ടിയും മായ്ച്ചും തിരുത്താൻ ബിജെപിയും ആർ എസ് എസും കിണഞ്ഞുപരിശ്രമിക്കുന്നതും. 

കളമശ്ശേരി സംഭവത്തിൽ ഒരു വിഭാ​ഗത്തിനെതിരെ കലാപത്തിന് വളഞ്ഞവഴിയിലൂടെ ആ​ഹ്വാനം ചെയ്തത് രണ്ട് കേന്ദ്രമന്ത്രിമാരാണ്. വി മുരളീധരനും രാജീവ് ചന്ദ്രശേഖരനും. ഇരുവരുടേയും  പ്രതികരണങ്ങൾ കണ്ട, കേട്ട എല്ലാവരിലും സ്വാഭാവികമായും ആ സമുദായത്തിനെതിരെ ദേഷ്യവും പകയും ഉണ്ടാകുമെന്നത് ഉറപ്പാണ്. കാരണം പറയുന്നത് രാജ്യം ഭരിക്കുന്ന മന്ത്രിമാരാണ്. അത് മാത്രം മതി ഇരു സമുദായങ്ങൾക്കിടയിൽ സ്പ‍ർദ്ദ വളരാനും പരസ്പരം വാളെടുക്കാനും. എന്നാൽ മന്ത്രിമാരുടെ ഉദ്ദേശലക്ഷ്യം നിറവേറും മുമ്പേ യഥാ‍ർത്ഥ പ്രതി കീഴടങ്ങി. എല്ലാകുറ്റവും സ്വയം ഏറ്റെടുത്തും അതിനുള്ള കൃത്യമായ തെളിവുകളും നൽകിയാണ് പ്രതി കീഴടങ്ങിയത്. ഭാ​ഗ്യത്തിന് പ്രതിയുടെ പേര് ഒരു മുസൽമാന്റേതായില്ല, അയാളുടെ വിശ്വാസവും മറ്റൊന്നായില്ല. മറിച്ചായിരുന്നുവെങ്കിൽ ഒന്ന് ആലോചിച്ച് നോക്കു. എന്തായിരിക്കും പിന്നീട് സംഭവിക്കുകയെന്നത്. പ്രതി കീഴടങ്ങാനോ പിടിയിലാകാനോ ഒരു രാത്രി വൈകിയിരുന്നുവെങ്കിൽക്കൂടി നാം ഭയപ്പെട്ടതും ഒരുവിഭാ​ഗം ആ​ഗ്രഹിച്ചതും ഒരുപക്ഷെ കേരളത്തിൽ സംഭവിക്കുമായിരുന്നു. കേരളത്തിലായത് കൊണ്ടുമാത്രമാണ് സമുദായസംഘടനകളും മറ്റും സംയമനം പാലിച്ചതും പ്രകോപനമൊന്നുമുണ്ടാകാതെ നോക്കിയതും. ഇന്ത്യയിലെ മറ്റേത് സംസ്ഥാനത്തായിരുന്നാലും സം​ഗതി ഇങ്ങനെയായിരിക്കില്ല. 

സിപിഎം സംസ്ഥാന സെക്രട്ടറി എം വി ​ഗോവിന്ദൻ മാസ്റ്ററുടെ പ്രതികരണവും അതിരുകടന്നതായി. ആക്രമണം നടന്ന് മണിക്കൂറുകൾക്കകം തന്നെ എന്താണ് യഥാ‍ർത്ഥ സംഭവം എന്ന് മനസിലാക്കാതെ അദ്ദേഹം നടത്തിയ പ്രതികരണം ശരിയായില്ല, പ്രത്യേകിച്ചും ഭരിക്കുന്ന പാ‍ർട്ടിയുടെ നേതാവ് എന്നരീതിയിൽ അദ്ദേഹം കൂടുതൽ ജാ​ഗ്രത പുലർത്തേണ്ടതായിരുന്നു. ഇസ്രയേൽ ഫലസ്തീൻ പ്രശ്നത്തിന്റെ പശ്ചാത്തലത്തിൽ രാഷ്ട്രീയമായി നോക്കുമ്പോൾ ഭീകരാക്രമണമാണെന്ന് അദ്ദേഹം പറഞ്ഞതും സംഭവത്തിന്റെ മാനം തന്നെ മാറ്റിക്കളഞ്ഞു. ഇത്തരം നേതാക്കൾ പറയുന്നത് ഏറ്റെടുക്കാനും അതനുസരിച്ച് അഭിപ്രായം രൂപീകരിക്കാനും തയ്യാറായി നിൽക്കുന്ന ലക്ഷക്കണക്കിന് അണികളും ആ പ്രസ്താവനയിലെ ഒളിഞ്ഞും തെളിഞ്ഞും കിടക്കുന്ന കുത്ത് എടുത്തിട്ട് അലക്കി വെടക്കാക്കി ഉപയോ​ഗിക്കാനും സധാജാ​ഗരൂകരായി നിൽക്കുന്ന ലക്ഷങ്ങളും നാട്ടിലുണ്ട് എന്നത് മറക്കരുത്. പ്രവ‍ർത്തിയിലും വാക്കുകളിലും മിതത്വം മാത്രം പോര, മറിച്ച് ജാ​ഗ്രതയും വേണം. അതില്ലാതെ ചാടിക്കേറി പറയുന്നതിന്റെ വില ഈ നാട്ടിലെ പാവങ്ങളാണ് നൽകേണ്ടിവരിക.

സാമൂഹ്യമാധ്യമങ്ങളിലൂടെ വിദ്വേഷപരാമ‍ര്‌ശങ്ങൾ നടത്തിയവര്‌ക്കെതിരെ പൊലീസ് കേസെടുത്തു. മുഖവും പദവിയും നോക്കാതെ കേന്ദ്രമന്ത്രിക്കെതിരേയും കേസ് രജിസ്റ്റര്‌ ചെയ്യാൻ കാണിച്ച ധൈര്യത്തെ പ്രശംസിക്കണം. കാരണം ഇത്തരത്തിൽ വിദ്വേഷം പടർത്താൻ ശ്രമിക്കുന്നത് ആരായാലും നടപടിയുണ്ടാകുമെന്ന സന്ദേശം നൽകുന്നത് നല്ലതാണ്. ഒരു സോഷ്യൽമീഡിയ അക്കൗണ്ട് ഉണ്ട് എന്നതിനാൽ മാത്രം എന്തും വിളിച്ചുപറയുന്ന മനോരോ​ഗികൾക്ക് ഇതൊരു താക്കീതാണ്.

കളമശ്ശേരിയിലെ നി‍ര്‌ഭാ​ഗ്യകരമായ സംഭവം തീർച്ചയായും നമ്മെ പലതും പഠിപ്പിക്കുന്നുണ്ട്. ഇരുത്തി ചിന്തിപ്പിക്കുന്നുമുണ്ട്. സുരക്ഷിതമാണെന്ന് നാം കരുതുന്ന ഒരിടവും അത്രസുരക്ഷിതമല്ല. സമാധാനവും ശാന്തിയും തേടി നാം ചെല്ലുന്നിടത്തെല്ലാം എന്തും സംഭവിക്കാമെന്നത് വെറും യാദൃശ്ചികമല്ല. ആളുകൾ കൂടുന്നിടത്തെല്ലാം സുരക്ഷാ സംവിധാനങ്ങൾ ശക്തമാക്കേണ്ടതുണ്ട്. മന്ത്രിമാർ എത്തുന്നിടത്ത് മാത്രം പോര സുരക്ഷ പരിശോധനയും മെറ്റൽ ഡിറ്റക്ടറുകളുമെല്ലാം. ഇത്തരത്തിൽ യോ​ഗം ചേരുന്നിടത്തെല്ലാം അത് ഉണ്ടാകേണ്ടതുണ്ട്. വിഐപികളുടേത് പോലെ തന്നെ മുഖ്യമാണ് സാധാരണക്കാരന്റെ ജീവനും. 

വിശ്വാസം നല്ലതാണ്. പക്ഷെ ആ വിശ്വാസം അവിശ്വാസമാകുമ്പോൾ ആളുകളുടെ മനോനിലയിലുണ്ടാകുന്ന മാറ്റവും ഭയപ്പെടുത്തുന്നതാണ്. അതാണ് കളമശ്ശേരിയിൽ കണ്ടത്. യഹോവയുടെ സാക്ഷ്യത്തിൽ വിശ്വസിച്ചിരുന്ന ആൾ തന്നെയാണ് വിശ്വാസം അവിശ്വാസമായതോടെ സ്ഫോടനം ആസൂത്രണം ചെയ്ത് നടപ്പാക്കിയത്. വിശ്വാസവും അവിശ്വാസവും, രണ്ടും എക്സ്ട്രീം കണ്ടീഷനിൽ എത്തുമ്പോൾ, അത് രണ്ടും ഒരുപോലെ ഭീതിയും പടർത്തുന്നു. വ‍​ര്​ഗ്​ഗീയ കലാപങ്ങളും ഇത്തരം ആക്രമണവും എല്ലാം സംഭവിക്കുന്നത് അത് ആ വ്യക്തിയുടെ അല്ലെങ്കിൽ ആ വ്യക്തികളുടെ മനോനിലയിൽ ഉണ്ടാക്കുന്ന മാറ്റമാണ്. ഇതിനെ അഡ്രസ് ചെയ്യാനും നമുക്ക് സാധിക്കണം. മാനസികമായി ഒരാളിലുണ്ടാകുന്ന മാറ്റങ്ങളെ പരിശോധിക്കുകയും മനസിലാക്കി വേണ്ട പ്രതിവധി കണ്ടെത്തുകയും വേണം. എല്ലാ മതങ്ങളും ആശയങ്ങളും മുനുഷ്യനെ ആത്യന്തികമായി പഠിപ്പിക്കുന്നത് സ്നേഹിക്കാനും സഹായിക്കാനുമാണ്. ഈ സന്ദേശം പകർന്നുകൊടുക്കാൻ തീർച്ചയായും നമ്മുടെ പുരോഹിതർക്കും സാമൂഹികപരിഷ്കര്ത്താക്കൾക്കുമെല്ലാം സാധിക്കും.  ഒപ്പം കൂട്ടത്തിലെ ചെന്നായ്ക്കളെ തിരിച്ചറിയാനും. 

എന്തായാലും കേരളത്തിന് ഈ പിറന്നാൾ ദിനത്തിൽ ആശ്വസിക്കാം, അഭിമാനിക്കാം. ഒരു മതവിഭാ​ഗത്തിന്റ സമ്മേളനവേ​ദിയിൽ ഒരു സ്ഫോടനം നടന്നിട്ടും കേരളത്തിന്റെ ഒരുകോണിലും ഒരാൾക്കുപോലും അതിന്റെ പേരിൽ മർദ്ദനം ഏൽക്കേണ്ടിവന്നില്ലലോ എന്നതിൽ.

.............................................

 

22 യാ‍ർഡിൻറെ മാമാങ്കം

സ്പോർട്സ് പലപ്പോഴും അങ്ങനെയാണ്. സ്പോർട്സിൽ പലതും യാദൃശ്ചികമായി, അവിചാരിതമായി സംഭവിക്കും. അത്തരമൊരു വളരെ യാദൃശ്ചികയുടെ ഫലമാണ് ഏകദിനക്രിക്കറ്റ്.  ഒരു ടെസ്റ്റ്  മത്സരത്തിൻറെ അഞ്ചാം ദിനം മാത്രം മഴ മാറിനിന്നപ്പോൾ സംഭവിച്ചതാണ് ലിമിറ്റഡ് ഓവർ ക്രിക്കറ്റ് അഥവ ഏകദിനമെന്നത്. മഴയത്ത് ഒലിച്ചുപോയ നാല് ദിനങ്ങളും കളികാണാനായി കാത്തിരുന്ന ആരാധകരെ നിരാശരക്കാതിരിക്കാനായി നടത്തിയ നിശ്ചിത ഓവർ മത്സരം. അങ്ങനെ 1971 ജനുവരി 5 ന് ഓസ്ട്രേലിയയിലെ മെൽബണിൽ ആദ്യത്തെ ഏകദിനമത്സരം അരങ്ങേറി. ഇംഗ്ലണ്ടും ഓസ്ട്രേലിയയുമായിരുന്നു നാൽപത് ഓവർ  മത്സരത്തിലെ എതിരാളികൾ. 5 വിക്കറ്റിന് ഓസ്ട്രേലിയ ഇംഗ്ലണ്ടിനെ പരാജയപ്പെടുത്തി ആദ്യ ഏകദിന വിജയികളായി. 82 റൺസെടുത്ത ഇംഗ്ലണ്ട് ഓപ്പണർ ജോൺ എഡ്രിച്ച് ആദ്യത്തെ അർദ്ധസെഞ്ച്വറി നേടുന്ന താരമായി. ഇയാന ചാപ്പലും ആ മത്സരത്തിൽ അർദ്ധസെഞ്ച്വറി തികച്ചു. പിന്നീടിങ്ങോട്ട് ലോക ക്രിക്കറ്റിൽ നടന്നത് ചരിത്രമാണ്. ടെസ്റ്റിനേക്കാൾ കാണികൾ ഏകദിനത്തെ നെഞ്ചേറ്റി, ടെസ്റ്റിനേക്കാൾ ആവേശവും ആകാംഷയും നിറഞ്ഞ ഏകദിനം ക്രിക്കറ്റിനെ കൂടുതൽ ജനകീയവും വാണീജ്യസാധ്യതകളുമുള്ളതാക്കി തീർത്തു. പതിറ്റാണ്ടുകൾക്കിപ്പുറം ട്വൻറി 20, ടെൻ 10 തുടങ്ങി ക്രിക്കറ്റിൻറെ കുട്ടിരൂപങ്ങളും പിറവിയെടുത്തു. 

ഇംഗ്ലണ്ട് 1975 

1971 ൽ ആകസ്മികമായി തുടങ്ങിയ ഏകദിനത്തിനാണ് നൂറ്റാണ്ടിൻറെ പഴക്കമുള്ള ടെസ്റ്റിനേക്കാൾ മുമ്പ് ലോകകപ്പ് എന്നത് ക്രിക്കറ്റ് കൌൺസിൽ നടപ്പാക്കിയത്. 1975 ൽ ഇംഗ്ലണ്ടിലാണ് ആദ്യത്തെ ലോകകപ്പ് അരങ്ങേറിയത്. അന്നത് പ്രുഡെൻഷ്യൽ ലോകകപ്പായിരുന്നു. ഇംഗ്ലണ്ടിലെ പ്രമുഖ ഇൻഷൂറൻസ് കമ്പനിയായ പ്രുഡെൻഷ്യൽ ആയിരുന്നു ചാമ്പ്യൻഷിപ്പിൻറെ മുഖ്യ സ്പോൺസർ.  

ഇംഗ്ലണ്ടിന് മാത്രമായിരുന്നു  ലോകകപ്പ് സംഘടിപ്പിക്കാനുള്ള ഭൌതികസാഹചര്യങ്ങൾ ആ സമയത്ത് ഉണ്ടായിരുന്നുള്ളുവെന്നതാണ് ആദ്യ ലോകകപ്പിന് വേദിയാകാൻ ഇംഗ്ലണ്ടിനെ തിരഞ്ഞെടുക്കാനുള്ള മുഖ്യകാരണം. ഇന്നത്തെ ഏകദിനത്തിൽ നിന്ന് വ്യത്യസ്ഥമായി 60 ഓവറായിരുന്നു ആദ്യ ലോകകപ്പിലേത്. ടെസ്റ്റിലേതിന് സമാനമായി വെള്ള ജേഴ്സിയും ചുവന്ന പന്തുമായിരുന്നു ഉപയോഗിച്ചത്. ഓസ്ട്രേലിയ, ഇന്ത്യ, പാക്കിസ്ഥാൻ, വെസ്റ്റ് ഇൻഡീസ്, ന്യൂസിലാണ്ട്, ശ്രീലങ്ക, ഈസ്റ്റ് ആഫ്രിക്ക എന്നിവരായിരുന്നു ഇംഗ്ലണ്ടിന് പുറമെ മത്സരിച്ചത്. 

ആദ്യമത്സരത്തിൽ ആതിഥേയരായ ഇംഗ്ലണ്ട് ഇന്ത്യയെ നേരിട്ടു. ഡെന്നിസ് അമിസ്സിൻറെ സെഞ്ച്വറിയുടെ പിൻബലത്തിൽ 4 വിക്കറ്റിന് 334 എന്ന പടുകൂറ്റൻ സ്ക്കോറാണ് ഇംഗ്ലണ്ട് ഇന്ത്യക്ക് മുന്നിൽ ഉയർത്തിയത്. 179 പന്ത് നേരിട്ട് വെറും 36 റൺസുമായി പുറത്താകാതെ നിന്ന സുനിൽ ഗവാസ്ക്കറിൻറെ ഒച്ച് നിലവാരത്തിലുള്ള ബാറ്റിങിനാണ് പിന്നീട് ലോഡ്സ് സാക്ഷ്യം വഹിച്ചത്.  ഫലം ഇന്ത്യ 202 റൺസിൻറെ കനത്ത് തോൽവി ഏറ്റുവാങ്ങി. അടുത്തമത്സരത്തിൽ ഈസ്റ്റ് ആഫ്രിക്കയെ പത്ത് വിക്കറ്റിന് പരാജയപ്പെടുത്തിയത് മാത്രമാണ് ടൂർണമെൻറിലെ ഇന്ത്യയുടെ ഏകനേട്ടം. ഗ്രൂപ്പിലെ അവസാനമത്സരത്തിൽ ഇന്ത്യ ന്യൂസിലാണ്ടിനോട് 6 വിക്കറ്റിന് തോറ്റുപുറത്തായി. 

ബി ഗ്രൂപ്പിലെ എല്ലാമത്സരവും വിജയിച്ചെത്തിയ ക്ലൈവ് ലോയിഡിൻറെ വെസ്റ്റ് ഇൻഡീസ് ഓസ്ട്രേലിയയെ തോൽപിച്ച് ചാമ്പ്യൻമാരായി. വാശിയേറിയ മത്സരത്തിൽ 17 റൺസിനായിരുന്നു വിൻഡീസിൻറെ വിജയം. സെഞ്ച്വറി നേടിയ വിൻഡീസ് നായകൻ ക്ലൈവ് ലോയിഡ് ആദ്യ ഫൈനലിലെ മികച്ച താരമായി.

ഇംഗ്ലണ്ട് 1979

ഇംഗ്ലണ്ടിൽ തന്നെയായിരുന്നു രണ്ടാമത്തെ ലോകകപ്പും.  ബർമിങ്ഹാമിൽ ജൂൺ 9 ന് നിലവിലെ ചാമ്പ്യൻമാരായ വിൻഡീസും ഇന്ത്യയും തമ്മിലായിരുന്നു ഉദ്ഘാടന മത്സരം. ടോസ് നേടിയ വിൻഡീസ് ഇന്ത്യയെ ബാറ്റിങ്ങിനയച്ചു. ഗുണ്ടപ്പ വിശ്വനാഥിൻറെ 75 റൺസിൻറെ പിൻബലത്തിൽ ഇന്ത്യ 53.1 ഓവറിൽ 190 റൺസ് നേടി. മറുപടി ബാറ്റിങ്ങിനിറങ്ങിയ വിൻഡീസിനുവേണ്ടി ഗോഡൺ ഗ്രീനീഡ്ജ് പുറത്താകാതെ 106 റൺസും ഡെസ്മണ്ട് ഹെയ്ൻസ് 47 ഉം റൺസെടുത്തതോടെ 9 വിക്കറ്റിന് ഇന്ത്യയെ വിൻഡീസ് കീഴടക്കി. ആദ്യ ലോകകപ്പിനെത്തിയ കപിൽദേവായിരുന്നു ഏകവിക്കറ്റിനുടമ. ശ്രീലങ്കയോടും ന്യൂസിലാണ്ടിനോടും തോറ്റ് ഒറ്റ മത്സരവും ജയിക്കാതെ ഇന്ത്യ ലോകകപ്പിൽ നിന്ന് പുറത്തായി. ലോകകപ്പ് ചരിത്രത്തിലെ ഇന്ത്യയുടെ ഏറ്റവും മോശം പ്രകടനം ഇതാണ്.

ഗ്രൂപ്പ് ഘട്ടത്തിലെ ശ്രീലങ്കയുമായുള്ള മത്സരം ഉപേക്ഷിക്കപ്പെട്ടെങ്കിലും ഒറ്റമത്സരവും തോൽക്കാതെ വിൻഡീസ് വീണ്ടും ഫൈനലിലെത്തി . സെമിയിൽ പാക്കിസ്ഥാനെ 43 റൺസിന് പരാജയപ്പെടുത്തിയാണ് വിൻഡീസ് തുടർച്ചയായ രണ്ടാം ഫൈനലിന് അർഹത നേടിയത്. ന്യൂസിലാണ്ടിനെ 9 റൺസിന് പരാജയപ്പെടുത്തി ആതിഥേയരായ  ഇംഗ്ലണ്ട് സ്വന്തം നാട്ടിലെ ലോകകപ്പ് ഫൈനലിന് യോഗ്യതനേടി. ഒറ്റമത്സരവും പരാജയപ്പെടാതെയായിരുന്നു ഇംഗ്ലണ്ടിൻറെ ഫൈനൽ പ്രവേശം. ടോസ് നേടി വിൻഡീസിനെ ബാറ്റിങ്ങിനയച്ച ഇംഗ്ലീഷ് ക്യാപ്റ്റൻ മൈക്ക് ബ്രെയർലിയുടെ തീരുമാനം ശരിയെന്ന് തോന്നിപ്പിക്കുന്ന തരത്തിലായിരുന്നു ലോഡ്സിലെ ഫൈനൽ ആരംഭിച്ചത്. 100 തികയ്ക്കുമുമ്പേ വിൻഡീസിൻറെ നാല് വിക്കറ്റുകൾ വീഴ്ത്തി ഇംഗ്ലണ്ട് സ്വന്തം കാണികൾക്ക് മുന്നിൽ ശക്തിതെളിയിച്ചുകൊണ്ടിരിക്കവെ വിവ് റിച്ചാർഡ്സും കോളിസ് കിങും ചേർന്നുള്ള അഞ്ചാം വിക്കറ്റ് പ്രകടനം അക്ഷരാർത്ഥത്തിൽ ഇംഗ്ലണ്ടിനെ വെട്ടിലാക്കി. പുറത്താകാതെ 138 റൺസുമായി വിവും 86 റൺസുമായി കിങും ചേർന്ന് നടത്തിയ രക്ഷാപ്രവർത്തനം വിൻഡീസ് കപ്പലിനെ തീരത്തെത്തിച്ചു. അവസാനത്തെ നാല് ബാറ്റ്സ്മാൻമാരും റണ്ണൊന്നുമെടുക്കാതെ പുറത്തായെങ്കിലും പൊരുതാനുളള സ്ക്കോർ (286-9) വിൻഡീസ് അതിനോടകം നേടിയിരുന്നു. മറുപടി ബാറ്റിങ്ങിനിറങ്ങിയ ഇംഗ്ലണ്ട് ഒന്നാം വിക്കറ്റിൽ തന്നെ 129 റൺസ് എടുത്തതോടെ കപ്പ് ഇംഗ്ലണ്ടിനെന്ന് കാണികൾ ഏതാണ്ട് വിധിയെഴുതി തുടങ്ങി. പക്ഷെ വിൻഡീസ് ബൌളർമാരുടെ സംഹാരതാണ്ടവം തുടങ്ങാനിരിക്കുന്നതേയുണ്ടായിരുന്നുള്ളു. മൈക്കൽ ഹോൾഡിങും കോളിൻ ക്രോഫ്റ്റും ജോയൽ ഗാർണറും തീതുപ്പിയതോടെ ഇംഗ്ലണ്ട് 194 ന് എല്ലാവരും പുറത്തായി. ഇംഗ്ലണ്ടിൻറെ ആദ്യ നാല് ബാറ്റർമാർക്ക് മാത്രമേ രണ്ടക്കം കാണാനായുള്ളു. 5 വിക്കറ്റെടുത്ത ജോയൽ ഗാർണറാണ് ഇംഗ്ലണ്ടിൻറെ നടുവൊടിച്ചത്.  വിവ് റിച്ചാർഡ്സ് കളിയിലെ താരമായി. തുടർച്ചയായ രണ്ടാം വട്ടവും വലിയ കണ്ണട ധരിച്ച ക്ലൈവ് ലോയിഡ് ലോഡ്സിൻറെ ഗ്യാലറിയിൽ ലോകകിരീടം ഉയർത്തി.

ഇംഗ്ലണ്ട് 1983

ഇംഗ്ലണ്ടിൽ നടക്കുന്ന അവസാനത്തെ പ്രുഡെൻഷ്യൽ ലോകകപ്പായിരുന്നു 1983 ലേത്. കഴിഞ്ഞ രണ്ട് മത്സരത്തിലേതിനു വിപരീതമായി ആദ്യമത്സരത്തിൽ ഇത്തവണ ഇന്ത്യയില്ലായിരുന്നു. ഇംഗ്ലണ്ടും ന്യൂസിലാണ്ടും തമ്മിലായിരുന്നു ആദ്യത്തെ മത്സരം. ഇംഗ്ലണ്ടിൻറെ മധ്യനിര ബാറ്റർ അലൻ ലാംമ്പിൻറെ സെഞ്ച്വറിയും ന്യൂസിലാണ്ടിൻറെ മാർട്ടിൻ ക്രോയുടെ സെഞ്ച്വറിക്ക് മൂന്ന് റൺസ് അകലെ വെച്ചുള്ള റൺ ഔട്ടുമെല്ലാം കണ്ട മത്സരത്തിൽ ഇംഗ്ലണ്ട് 106 റൺസിനാണ് വിജയിച്ചത്. 

മാഞ്ചസ്റ്ററിൽ നടന്ന നാലാമത്തെ മത്സരത്തിൽ നിന്ന് അത്ഭുതങ്ങളൊന്നും പ്രതീക്ഷിക്കാതെയാണ് കാണികളെത്തിയത്. ലോകകപ്പ് തുടങ്ങിയത് മുതൽ കിരീടം കൈവശം വെച്ചിരിക്കുന്ന വിൻഡീസ് എത്രക്രൂരമായി എതിരാളികളായ ഇന്ത്യയെ കശാപ്പ് ചെയ്യുമെന്നത് മാത്രമായിരുന്നു കാണികളുടെ ഇടയിലെ പന്തയം. കപിൽ ദേവ് എന്ന ഹരിയാന ഹറിക്കെയിനിൻറെ നേതൃത്വത്തിൽ ഇന്ത്യ ടൂർണമെൻറിന് എത്തിയതേ വലിയ കാര്യം എന്നതായിരുന്നു പലരുടേയും മനസിലെ വികാരം.  ടോസ് നേടിയ വിൻഡീസ് ഇന്ത്യയെ ബാറ്റിങ്ങിനയച്ചു. എല്ലാം പതിവ് ചടങ്ങുപോലെ ഗവാസ്ക്കറും ശ്രീകാന്തും മൊഹീന്ദറുമെല്ലാം വേഗത്തിൽ തന്നെ ചടങ്ങ് തീർത്ത് കൂടാരം കയറി.  പക്ഷെ സന്ദീപ് പാട്ടീലിനേയും റോജർ ബിന്നിയേയും മദൻ ലാലിനേയും കൂട്ടുപിടിച്ച് യശ്പാൽ ശർമ വിൻഡീസ് ബൌളിങ്ങിനെ നേരിട്ടതോടെ  ഇന്ത്യയുടെ സ്ക്കോർ 262-8 എന്ന നിലയിലായി.  മറുപടി ബാറ്റിങ്ങിനിറങ്ങിയ വിൻഡീസ് വിജയം ഉറപ്പിച്ചാണ് ബാറ്റ് വീശിയത്. എന്നാൽ രവി ശാസ്ത്രിയും രോജർ ബിന്നിയും വിൻഡീസിൻറെ കണക്കുകൂട്ടലുകൾ തെറ്റിച്ചു. മൂന്ന് വിക്കറ്റ് വീതം വീഴ്ത്തിയ ഇരുവരും ചേർന്ന് ഇന്ത്യക്ക് സ്വപ്നതുല്യമായ തുടക്കമാണ് സമ്മാനിച്ചത്. വാലറ്റത്ത് 37 റൺസ് വീതമെടുത്ത് ആൻഡി റോബർട്സും ജോയൽ ഗാർണറും പൊരുതിയെങ്കിലും 34 റൺസിന് തോൽക്കാനായിരുന്നു ലോകചാമ്പ്യൻമാരുടെ വിധി. 

പിന്നീടിങ്ങോട്ട് കപിലിൻറെ ചെകുത്താൻമാരുടെ അപ്രതീക്ഷിത തേരോട്ടമായിരുന്നു. അടുത്തമത്സരത്തിൽ സിംബാബ്വേയെ 5 വിക്കറ്റിന് തോൽപിച്ച ഇന്ത്യ പക്ഷെ പിന്നാലെ ഓസ്ട്രേലിയയോട് 162 റൺസിനും വിൻഡീസിനോട് 66 റൺസിനും പരാജയം രുചിച്ചു. ഇന്ത്യയുടെ വിജയങ്ങളെല്ലാം ചക്ക് വീണ് മുയൽ ചത്തത് പോലെയെന്ന് ഭാഗ്യത്തിൻറെ കണക്കിൽ എഴുതിചേർക്കാനായിരുന്നു എല്ലാവരും ശ്രമിച്ചത്. പക്ഷെ ജൂൺ 19 ന് നിർണായകമായ മത്സരത്തിൽ സിംബാബ്വേയെ നേരിട്ട ഇന്ത്യ എല്ലാവരുടേയും മുൻവിധികളെ തിരുത്തികുറിച്ചു. കപിൽ എന്ന നായകൻറെ കൈക്കരുത്ത് ലോകം കണ്ട ദിവസമായിരുന്നു അത്. നായകൻ എന്നാൽ കപ്പിത്താൻ തന്നെയാണ് എന്ന് ലോകത്തിന് മുന്നിൽ തെളിയിച്ച പ്രകടനമായിരുന്നു കപിലിൻരേത്. 5 വിക്കറ്റിന് 17 എന്ന നിലയിൽ ഇന്ത്യ മൂക്കും കുത്തി കിടക്കുമ്പോളാണ് കപിൽ ക്രീസിലേക്ക് എത്തുന്നത്. ഇത്രപെട്ടെന്ന് പാഡണിയേണ്ടി വരുമെന്ന് അറിയാതെ കുളിക്കാൻ പോയ കപിൽ കുളിമുറിയിൽ നിന്ന് ഇറങ്ങി ഓടിയാണത്രേ ക്രിസിലെത്തിയത്. കപിൽ ഒരറ്റത്ത് നങ്കൂരമിട്ടപ്പോഴും മറുവശത്ത് വിക്കറ്റുകൾ വീഴുകയായിരുന്നു. 138 പന്തുകൾ നേരിട്ട കപിൽ ഇന്നിങ്സ് അവസാനിക്കുമ്പോൾ 175 റൺസുമായി പുറത്താകാതെ നിൽക്കുകായിരുന്നു. 16 ഫോറുകളും 9 സിക്സറുകളും കപിലിൻറെ ബാറ്റിൽ നിന്ന് പറന്നു. ഇത് മാത്രം നൂറ് റൺസ് തികച്ചുവെന്നതാണ് ആ ഇന്നിംഗ്സിലെ പ്രത്യേകത. ആ പ്രകടനം  അന്ന് ലോകറെക്കോർഡ് ആയിരുന്നുവെന്നുപോലും കപിലിന് ക്രീസിൽ നിൽക്കുമ്പോൾ അറിയില്ലായിരുന്നു. 22 റൺസെടുത്ത റോജർ ബിന്നിയും 17 റൺസെടുത്ത മദൻ ലാലും 24 റൺസുമായി പുറത്താകാതെ നിന്ന ഒമ്പതാമൻ സയ്യദ് കിർമാനിയും മാത്രമാണ് അന്ന് ഇന്ത്യൻ ഇന്നിംഗ്സിൽ രണ്ടക്കം കടന്ന മറ്റ് ബാറ്റർമാർ. മറുപടി ബാറ്റിങ്ങിൽ സിംബാബ്വേ കരുതലോടെ തുടങ്ങിയെങ്കിലും കൃത്യമായ ഇടവേളകളിൽ വിക്കറ്റ് വീഴ്ത്തി മദൻ ലാലും റോജർ ബിന്നിയും ഇന്ത്യയെ വിജയതീരത്തെത്തിച്ചു. കെവിൻ കറൻറെ വെടിക്കെട്ട് ഇടയ്ക്ക് ആശങ്ക സൃഷ്ടിച്ചെങ്കിലും ജോൺ ട്രെയിക്കോസിനെ സ്വന്തം പന്തിൽ പിടിച്ച് പുറത്താക്കി കപിൽ തന്നെ ടീമിന് 31 റൺസിൻരെ വിജയം സമ്മാനിച്ചു. മത്സരത്തിൻറെ റെക്കോർഡിങ് അവകാശം സ്വന്തമാക്കിയ ബിബിസിയിലെ സാങ്കേതിക ജീവനക്കാർ അന്ന് സമരത്തിലായതിനാൽ മാത്രം ലോകത്തിന് നേരിട്ട് കാണാനാവാതെ പോയ അന്നത്തെ ആ പ്രകടനം ലോകകപ്പിലെ ആദ്യത്തെ മാൻ ഓഫ് ദ മാച്ച് പുരസ്ക്കാരം കപിലിന് നേടിക്കൊടുത്തു. 

അടുത്ത മത്സരം കൂടി ജയിച്ചാൽ ചരിത്രത്തിലാദ്യമായി സെമിഫൈനലിന് ഇന്ത്യയ്ക്ക് യോഗ്യത ലഭിക്കും. ഇന്ത്യയെ എഴുതിതള്ളിയിരുന്നവരെല്ലാം മാറി ചിന്തിക്കാൻ ഇതിനോടകം തന്നെ തുടങ്ങിയിരുന്നു. ഈ ചെകുത്താൻമാരുടെ സംഘം ചിലതൊക്കെ നടത്തുമെന്ന് അടക്കിപിടിച്ച സ സംസാരം ആരംഭിച്ചു. വാത് വെയ്പുകാർക്കിടയിലും ഇന്ത്യയുടെ പേര് പരിഗണിക്കപ്പെട്ടുതുടങ്ങി.  അലൻ ബോർഡറും ട്രെവർ ചാപ്പലും ജെപ് തോംസണുമെല്ലാമുള്ള ഓസീസായിരുന്നു അടുത്ത എതിരാളി. കഴിഞ്ഞമത്സരത്തിലെ ആവേശത്തിൽ ടോസ് നേടിയ കപിൽ ഷെംസ്ഫോർഡിൽ ബാറ്റിങ് തിരഞ്ഞെടുത്തു. ഗവാസ്ക്കർ നിരാശപ്പെടുത്തിയെങ്കിലും ശ്രീകാന്തും യശ്പൽ ശർമയും സന്ദീപ് പാട്ടീലും കപിലും തങ്ങളുടേതായ മോശമല്ലാത്ത ഇന്നിംഗ്സ് കാഴ്ച്ചവെച്ചു. 55.5 ഓവറിൽ 247 റൺസിന് ഇന്ത്യയെ പുറത്താക്കിയപ്പോൾ വലുതായി വിയർക്കാതെ ജയിക്കാമെന്നായിരുന്നു ഓസീസിൻറെ കണക്കുകൂട്ടൽ. പക്ഷെ 4 വിക്കറ്റ് വീതം വീഴ്ത്തി മദൻ ലാലും റോജർ ബിന്നിയും ഓസീസിൻറെ സ്വപ്നങ്ങൾ എറിഞ്ഞുടച്ചു. റൺസ് നൽകുന്നതിൽ എല്ലാ ബൌളർമാരും പിശുക്കിയപ്പോൾ ഓസീസ് 38.2 ഓവറിൽ 129 റൺസിന് ഓൾ ഔട്ടായി. ചരിത്രത്തിലാദ്യമായി ഇന്ത്യ ഒരു ലോകചാമ്പ്യൻഷിപ്പിൻറെ സെമിയിലേക്ക്. 

സ്വന്തം കാണികൾക്ക് മുന്നിൽ മൂന്നാമത്തെ ലോകകപ്പ് സെമിഫൈനൽ കളിക്കാനിറങ്ങിയ ഇംഗ്ലണ്ട് മാഞ്ചസ്റ്ററിൽ ഇന്ത്യയെ ബൌളിങ്ങിനയച്ചു. ഗ്രേം ഫൌളറും  ക്രിസ് ടവാരെയും ചേർന്ന് മികച്ച തുടക്കമാണ് ഇംഗ്ലണ്ടിന് നൽകിയത്. ആദ് വിക്കറ്റിൽ 67 റൺസ് ചേർത്താണ് ഇംഗ്ലീഷ് ഓപ്പണർമാർ പിരിഞ്ഞത്. ഇരുവരും അടുത്തടുത്ത് പുറത്തായതോടെ ഇംഗ്ശണ്ട് ബാറ്റിങ്ങിൻരെ താളം തെറ്റി. കൃത്യമായ ഇടവേളകളിൽ വിക്കറ്റ് വീഴ്ത്തി ഇന്ത്യൻ ബൌളർമാർ ഇംഗ്ലണ്ടിനെ നിശ്ചിത 60 ഓവറിൽ 213 റൺസിൽ ഒതുക്കി.  11 ഓവറിൽ 35 റൺസിന് 3 വിക്കറ്റ് വീഴ്ത്തി കപിൽ മുന്നിൽ നിന്ന് നയിച്ചപ്പോൾ റോജർ ബിന്നിയും മൊഹീന്ദറും 2 വിക്കറ്റ് വീതം വീഴ്ത്തി.  മറുപടി ബാറ്റിങ്ങിൽ താളം കണ്ടെത്തിയ ഗവാസ്ക്കറും ശ്രീകാന്തും ചേർന്ന് ആദ്യ വിക്കറ്റിൽ 46 റൺസ് ചേർത്തു. ശ്രീകാന്തിൻറേയും ഗവാസ്ക്കറിൻറേയും വിക്കറ്റുകൾ അടുത്തടുത്തായി നഷ്ടമായെങ്കിലും ഇന്ത്യ പതറിയില്ല. മൊഹീന്ദറും യശ്പാലും സന്ദീപ് പാട്ടിലും ചേർന്ന് ഇന്ത്യയെ വിജയതീരത്തെത്തിച്ചു. 54.4 ഓവറിൽ വെറും നാല് വിക്കറ്റ് നഷ്ടത്തിലാണ് ഇന്ത്യ വിജയലക്ഷ്യം മറികടന്നത്. യശ്പാൽ ശർമ 61 ഉം സന്ദീപ് പാട്ടിൽ പുറത്താകാതെ 51 ഉം റൺസെടുത്തു. പന്തുകൊണ്ടും ബാറ്റ് കൊണ്ടും വിസമായിപ്പിക്കുന്ന പ്രകടനം നടത്തിയ മൊഹീന്ദർ അമർനാഥിൻറെ ഓൾ റൌണ്ട് പ്രകടനത്തിന് സെമിയിലെ താരമായി താരത്തെ തിരഞ്ഞെടുത്തു. 

സാക്ഷ്യം വഹിക്കുന്നത് സ്വപ്നത്തിനാണോ യാഥാർത്ഥ്യത്തിനാണോയെന്ന് ആർക്കും വിശ്വസിക്കാനാവുന്നതായിരുന്നില്ല ഇന്ത്യയുടെ പ്രകടനം. ഫൈനലിൽ എവർ ഫേവറേറ്റുകളായ വിൻഡിസ് തന്നെയാണ് എതിരാളികൾ. ഇന്ത്യയുടെ തേരോട്ടം ജൂൺ 25 ന് ലോഡ്സിൽ അവസാനിക്കുമെന്ന് പ്രവചിക്കാനായിരുന്നു ഏവർക്കും അപ്പോഴും ഇഷ്ടം. എന്നാൽ മറിച്ച് ചിന്തിച്ചവരും ഏറെ. 

ലോഡ്സിലെ തെളിഞ്ഞ ആ ദിനത്തിൽ ഹാട്രിക്ക് വിജയം മാത്രം ലക്ഷ്യം വെച്ചാണ്, ഉറപ്പിച്ചാണ് ക്ലൈവ് ലോയിഡ് ടോസിനായി മൈതാനത്തിൻറെ മധ്യത്തിലേക്ക് നടന്നത്. ടോസ് ലഭിച്ചാലും നഷ്ടപ്പെട്ടാലും എന്ത് ചെയ്യണമെന്ന തന്ത്രം തയ്യാറെന്ന് പൂർണമായും ആ കറുത്തകണ്ണടയ്ക്ക് പിന്നിലെ വലിയ കണ്ണുകൾ വിളിച്ചുപറഞ്ഞിരുന്നു. എന്നാൽ ആത്മവിശ്വാസം ഒട്ടും ചോരാതെ, ഫൈനലിലെത്തിയ തിൻറെ സമ്മർദ്ദമോ അമിത സന്തോഷമോ പ്രതിഫലിപ്പിക്കാതെയായിരുന്നു കപിൽ ദേവിൻറെ വരവ്. ഇവിടെ വരെയെങ്ങനെ എത്തിയോ അതുപോലെ ഇതും കടക്കുമെന്ന നിശ്ചയദാർഢ്യംമാത്രം മുഖത്ത്. 

മൂന്ന് ഫൈനലുകളിൽ അന്നാദ്യമായി ടോസ് നേടിയപ്പോഴും ലോയിഡ് ഫീൽഡിങ് തന്നെ തിരഞ്ഞെടുത്തു. (ആദ്യ രണ്ട് തവണയും ടോസ് നഷ്ടമായി വിൻഡീസ് ഫീൽഡ് ചെയ്യുകയായിരുന്നു).  ആദ്യമത്സരത്തിൽ വിൻഡീസിനെ തോൽപിച്ച ആത്മവിശ്വാസത്തിൽ ഇന്ത്യയും ക്രിക്കറ്റിലെ എക്കാലത്തേയും കരുത്തർ കരീബിയക്കാരുടേതാണ് എന്ന ഉറച്ച വിശ്വാസത്തിൽ തന്നെയാണ് വിൻഡീസും കളത്തിലിറങ്ങിയത്. സ്ക്കോർ ബോർഡ് ചലിക്കാൻ തുടങ്ങുമ്പോഴേ ഗവാസ്ക്കറിനെ പുറത്താക്കി ആൻഡി റോബർട്സ് വിൻഡീസിന് മേൽക്കൈയും ഇന്ത്യക്ക് പ്രഹരവും ഏൽപ്പിച്ചു. എന്നാൽ രണ്ടാം വിക്കറ്റിൽ ശ്രീകാന്തും മൊഹീന്ദർ അമർനാഥും ചേർന്ന് ഇന്ത്യയുടെ ഇന്നിംഗ്സ് മെല്ലെ കെട്ടിപടുത്തു. തീതുപ്പുന്ന വിൻഡീസ് ബൌളർമാരെ ഇരുവരും സമചിത്തതയോടെ നേരിട്ടു. മാൽക്കം മാർഷലിൻറെ പന്തിൽ വിക്കറ്റിന് മുന്നിൽ കുടങ്ങി 38 റൺസുമായി ശ്രീകാന്ത് പുറത്താകുമ്പോൾ രണ്ടാം വിക്കറ്റിൽ ഇരുവരും ചേർന്ന് 57 റൺസ് കൂട്ടി ചേർത്തിരുന്നു. പിന്നീട് യശ്പാൽ ശർമയും സന്ദീപ് പാട്ടിലും കപിൽ ദേവും ചേർന്ന് ഇന്ത്യൻ ഇന്നിംഗ്സ് കെട്ടിപടുക്കാൻ ശ്രമിച്ചെങ്കിലും കാര്യമായി സാധിച്ചില്ല. മൊഹീന്ദർ 26ഉം യശ്പാൽ 11 ഉം സന്ദീപ് പാട്ടീൽ 27 ഉം റൺസെടുത്ത് പുറത്തായി. വെറും 8 പന്തുകൾ നേരിട്ട കപിൽ കൂറ്റൻ അടികളോടെ 15 റൺസ് ചേർത്തു. ഫൈനലിലെ ഏറ്റവും ഉയർന്ന സ്ട്രൈക്ക് റേറ്റോടെയാണ് കപിൽ 15 റൺസ് ചേർത്തത്. 187.50 ആയിരുന്നു കപിലിൻറെ സ്ട്രൈക്ക് റേറ്റ്. ഒരുഘട്ടത്തിൽ 6 ന് 111 എന്ന അവസ്ഥയിലായിരുന്ന ഇന്ത്യ വാലറ്റത്ത് മദൻ ലാലും സയ്യിദ് കിർമാനിയും ബൽവിന്ദർ സന്ധുവും കഴിവിൻറെ പരമാവധി പിടിച്ചുനിന്നതോടെ 184 റൺസ് എന്ന വിജയലക്ഷ്യം വിൻഡീസിന് മുന്നിൽ വെച്ചു.  

പേരുകേട്ട വിൻഡിസ് ബാറ്റിങ് നിരയ്ക്ക് പൊരുതാനുള്ള സ്ക്കോറായി ഇത് ആരും കരുതിയില്ല. വിൻഡീസിന് മുന്നാമത്തെ കപ്പ് ഒരു ഈസ് വാക്കോവറായി തന്നെ എല്ലാവരും കണക്കുകൂട്ടി. ഇന്ത്യൻ താരങ്ങളും വളരെ നിരാശയാരുന്നു. എന്നാൽ ഒട്ടും നിരാശപ്പെടാത്ത ഒരാൾ, അയാൾ പറഞ്ഞവാക്കുകൾ ഇന്ത്യൻ ക്യാമ്പിന് ചെറുതായെങ്കിലും പേരാടാനുളള കരുത്ത് പകർന്നുകൊടുത്തു. 

'അടുത്ത് മൂന്ന് മണിക്കൂർ നിങ്ങൾ ആസ്വദിച്ച് കളിക്കുക. അങ്ങനെ ചെയ്യുമ്പോൾ മനസിൽ ഒന്നുമാത്രം ഓർത്താൽ മതി. ആ അസ്വാദനം ജീവിതകാലം മുഴുവനും ഓർത്തുവെക്കാനുള്ള ഒന്നാക്കിമാറ്റിയാലോ എന്ന്. മൂന്ന് മണിക്കൂർ കഴിവിൻറെ പരമാവധി നൽകിയാൽ നിങ്ങൾക്ക് ജീവിതകാലത്തേക്ക് ഓർത്തുവെക്കാനുള്ള ലോകകീരീടം കൂടെ കിട്ടും.'

ഇതായിരുന്നു ആ വാക്കുകൾ. ചെകുത്താൻ കൂട്ടത്തോട് ഇത് പറഞ്ഞത് സാക്ഷാൽ കപ്പിത്താനും. അത് മാത്രമായിരുന്നു വെയിലുറച്ച ലോഡ്സിലെ പുൽമൈതാനിയിലേക്ക് ഒരുമിച്ചിറങ്ങുമ്പോൾ അവരുടെ മനസിൽ മുഴങ്ങിയതും. 

184 റൺസെന്ന ചെറിയ ടോട്ടൽ മറികടക്കാനിറങ്ങിയ വിൻഡീസിനെ തുടക്കത്തിലേ ബൽവിന്ധർ സന്ധു ഞെട്ടിച്ചു. ഗോർഡൺ ഗ്രീനിജ് വെറും ഒരു റൺസിന് ക്ലീൻ ബൌൾഡ്. അടുത്ത ഊഴം മദൻ ലാലിൻറേതായിരുന്നു. 13 റൺസെടുത്ത ഡെസ്മണ്ഡ് ഹെയിൻസിനെ നിലയുറപ്പിക്കും മുമ്പേ റോജർ ബിന്നിയുടെ കൈകളിലെത്തിച്ചു മദൻ. ഇതിനോടകം താണ്ടവമാടാൻ തുടങ്ങിയ വിവ് റിച്ചാർഡ്സ് ഇന്ത്യയെ വീണ്ടും തോൽപിക്കുമെന്ന് തോന്നിച്ച നിമിഷങ്ങൾ. 28 പന്തിൽ നിന്ന് 7 ഫോറുകളോടെ 33 റൺസെടുത്ത്  വെറിയോടെ നിൽക്കുന്ന വിവിൻറെ വിക്കറ്റ്  ഇന്ത്യയ്ക്ക് ഏരെ നിർണായമായിരുന്നു. ആ ബ്രേക്ക് ത്രൂ വൈകാതെ മദന ലാൽ തന്നെ സമ്മാനിച്ചു. പക്ഷെ മദൻറേതിനേക്കാൾ ആ വിക്കറ്റ് കപിലിൻറെയാണ് എന്ന് പറയേണ്ടിയിരിക്കും. കാരണം അത്രമനോഹരവും സാഹസികവുമായാണ് കപിൽ വിവിനെ പുറത്താക്കിയത്. മദൻ ലാലിൻറെ പന്ത് ഉയർത്തിയടിച്ച വിവും കാണികളും പ്രതീക്ഷിച്ചത് അടുത്ത ബൌണ്ടറിയാണ്. കപിൽ ആകാശം നോക്കി പിന്നോട്ട് ഓടുന്നത് വരെ. 

പതിനെട്ട് മീറ്റർ ആകാശത്തേക്ക് മാത്രം നോക്കി കപിൽ പിന്നോട്ട് ഓടിയത് വെറുതെയായില്ല. വിവ് റിച്ചാർഡ്സിനെ അതിമനോഹരമായ ഒരു ക്യാച്ചിലൂടെ കപിൽ പുറത്താക്കിയപ്പോൾ ഇന്ത്യ ചാമ്പ്യൻമാരായ സന്തോഷമായിരുന്നു ആ മുഖത്ത്. പിന്നീട് ലോഡ്സ് കണ്ടത് പേരുകേട്ട കരീബിയന പടയെ ഇന്ത്യ പിച്ചിയെറിയുന്നതാണ്.  വിക്കറ്റ് കീപ്പർ ജെഫ് ഡ്യുയോണും മാൽക്കം മാർഷലും ചെറുത്തുനിൽക്കാൻ ശ്രമിച്ചെങ്കിലും ചെകുത്താൻമാർ അനുവദിച്ചില്ല. 7 ഓവറിൽ വെറും 12 റൺസ് വവങ്ങി 3 വിക്കറ്റ് വീഴ്ത്തി മൊഹീന്ദർ അമർനാഥും ( ഇക്കോണമി 1.71) 12 ഓവറിൽ 31 റൺസിന് 3 വിക്കറ്റ് വീഴ്ത്തി മദൻ ലാലും 2 വിക്കറ്റ് വീഴ്ത്തി സന്ധുവും ഓരോ വിക്കറ്റ് വീതം വീഴ്ത്തി കപിലും റോജർ ബിന്നിയും മിന്നിയപ്പോൾ 52 ഓവറിൽ 140 റൺസിന് വിൻഡീസ് പത്തിമടക്കി. തൻറെ 7 ആം ഓവറിലെ അവസാന പന്തിൽ 6 റൺസെടുത്ത മൈക്കൽ ഹോൾഡിങിനെ മൊഹീന്ദർ അമർനാഥ് വിക്കറ്റിന് മുന്നിൽ കുടിക്കിയതോടെ  ഇന്ത്യ ലോകചാമ്പ്യൻമാരായി, ഓൾ റൌണ്ട് പ്രകടനത്തിന് മൊഹീന്ദർ അമർനാഥ് ഫൈനലിൻറെ താരവും.

ലോഡ്സിലെ ബാൽക്കണിയിൽ നിറചിരിയോടെ അവസാനത്തെ പ്രുഡെൻഷ്യൽ കപ്പ് ഉയർത്തിയ കപിൽ ദേവ് എഴുതിയത് ചെകുത്താൻമാരുടെ വീരഗാഥയല്ല. മറിച്ച് ലോകക്രിക്കറ്റിലെ ഇന്ത്യയുടെ ജാതകം തന്നെയായിരുന്നു. വിവിൻരെ ക്യാച്ചെടുത്ത ആ കൈകൾ ഫുട്ബോളിൽ മറഡോണയുടെ ദൈവത്തിൻറെ കൈകളെന്ന പോലെ ക്രിക്കറ്റിലെ ദൈവത്തിൻറെ കൈ ആയി ഇന്ത്യക്കാർക്ക് കപിലിൻറേത്. 

രസം കൊല്ലികളെന്ന് എഴുതിതള്ളിയ, നനഞ്ഞ പട്ടികളെന്ന് പരിഹസിക്കപ്പെട്ട, വഴിമുടക്കുന്ന ചെകുത്താൻമാരെന്ന് പുച്ഛിച്ച എല്ലാവർക്കുമുള്ള മറുപടിയായിരുന്നു ആ കിരീടം. ഒന്നം നഷ്ടപെടാനില്ലാത്തവന്  നേടാൻ പലതുമുണ്ടെന്ന് ലോകത്തെ പഠിപ്പിക്കുകയായിരുന്നു കപിലിൻറെ ചെകുത്താൻ സംഘം ഇംഗ്ലണ്ടിൽ. നൂറുകോടിയുടെ  ഭാവിയുടെ പ്രതീക്ഷകളും സ്വപ്നങ്ങളും നിറച്ച കപ്പുമായാണ് ലോഡ്സിൽ നിന്ന് കപിലും സംഘവും മടങ്ങിയത്. 

ഇന്ത്യ - പാക്കിസ്ഥാൻ 1987 

ഇംഗ്ല്ണ്ടിന് പുറത്ത് അരങ്ങേറിയ ആദ്യത്തെ ലോകകപ്പായിരുന്നു 1987 ലേത്. ഇന്ത്യയും പാകിസ്ഥാനും സംയുക്തമായി ആതിഥേയത്വം വഹിച്ചു. 60 ഓവറിൽ നിന്ന് 50 ഓവറിലേക്ക് ഏകദിന ലോകകപ്പ് മാറിയതും ഈ എഡിഷനിലാണ്. അങ്ങനെ നിരവധി പ്രത്യേകതകളുമായാണ് 87 ലെ ലോകകപ്പ് എത്തിയത്. ഇംഗ്ലണ്ടിലെ വേനൽകാലത്തേക്കാൾ ഇന്ത്യൻ ഉപഭൂഖണ്ഡത്തിലെ പകൽ വെളിച്ചത്തിൻറെ ദൈർഘ്യം കുറവാണ് എന്നതാണ് ഓവറുകൾ കുറയ്ക്കാനുള്ള ഒരു പ്രധാനകാരണം.  

നിലവിലെ ചാമ്പ്യൻമാരെന്ന പ്രൌഡിയോടെയാണ് ഇന്ത്യ ലോകകപ്പിന് ആതിഥേയത്വം വഹിച്ചത്. ലോകകപ്പിൽ നിർത്തിയേടത്ത് നിന്ന് തുടങ്ങിയ ഇന്ത്യയ്ക്ക് പക്ഷെ ആദ്യത്തെ മത്സരത്തിൽ അടിതെറ്റി. ഓസ്ട്രേലിയയോട് 1 റൺസിന് തോറ്റു. പക്ഷെ പിന്നീടങ്ങോട്ട് ലോകചാമ്പ്യൻമാരുടെ കളി തന്നെ ഇന്ത്യ പുറത്തെടുത്തു.  നവ്ജോത് സിങ് സിദ്ദു, മുഹ്ഹമദ് അസറുദ്ദീൻ, മനോജ് പ്രഭാകർ എന്നീ താരോദയത്തിന് സാക്ഷ്യം വഹിച്ച ലോകക്കാപ്പിയിരുന്നു ഇന്ത്യക്ക് 87 ലേത്. ഗവാസ്ക്കർ ആദ്യമായി ലോകകപ്പ് മത്സരത്തിൽ സെഞ്ച്വരി നേടിയതും ലോകകപ്പിലെ ആദ്യത്തെ ഹാട്രിക്ക് പിറന്നതും ഇതേ ലോകകപ്പിൽ. നാഗ്പൂരിൽ ന്യൂസിലാണ്ടിനെതരെ നടന്ന മത്സരത്തിലായിരുന്നു ഇത് രണ്ടും സംഭവിച്ചത്. ചേതൻ ശർമയായിരുന്നു ആദ്യത്തെ ഹാട്രിക്ക് വിക്കറ്റ് സ്വന്തമാക്കിയത്. ഇരുവരും കളിയുടെ താരങ്ങളായി. രണ്ട് താരങ്ങളെ ഒരുമിച്ച് മാൻ ഓഫ് ദ മാച്ചായി തിരഞ്ഞെടുത്തുവെന്ന അപൂർവ്വതയും ആ മത്സരത്തിനുണ്ട്.  തുടർച്ചയായ രണ്ടാം ലോകകപ്പിലും ഇന്ത്യയെ നയിച്ച കപിൽ ദേവ് ബാറ്റുകൊണ്ടും ബോളുകൊണ്ടും തിളങ്ങി. തുടർച്ചയായ രണ്ടാം തവണയും സെമിയിൽ ഇന്ത്യയും ഇംഗ്ലണ്ടും പരസ്പരം കോർത്തപ്പോൾ പക്ഷെ ഇംഗ്ലണ്ട് കഴിഞ്ഞ സെമിയിലെ പരാജയത്തിൻറെ കണക്ക് തീർത്തു. ഗ്രഹാം ഗൂച്ചിൻറെ സെഞ്ച്വറിയും മൈക്ക് ഗാറ്റിങ്ങിൻരെ ഫിഫ്ടിയുമായി ഇംഗ്ലണ്ട് ഉയർത്തിയ 255 ൻറെ വിജയലക്ഷ്യം പക്ഷെ ഇന്ത്യക്ക് മറികടക്കാനായില്ല. ശ്രീകാന്തും സിദ്ദുവും അസറുദ്ദീനും ചന്ദ്രകാന്ത് പണ്ഡിറ്റും കപിലും രവിശാസ്ത്രിയും പൊരുതിയെങ്കിലും വിജയിക്കാനത് മതിയാകുമായിരുന്നില്ല. ഒടുവിൽ നാലര ഓവർ ബാക്കി നിൽക്കെ ഇന്ത്യ 35 റൺസിൻരെ പരാജയം വഴങ്ങി. 

സെമിയിൽ മറ്റൊരു ആതിഥേയരായ പാക്കിസ്ഥാനെ കീഴടക്കിയെത്തിയ ഓസ്ട്രേലിയയും ഫൈനലിലെത്തി. 18 റൺസിനായിരുന്നു ഓസീസിൻറെ വിജയം. 5 വിക്കറ്റ് വീഴ്ത്തിയ ക്രെയിഗ് മക്ഡർമോട്ടായിരുന്നു പാക്കിസ്ഥാൻറെ അന്തകൻ. ഏകദിനമത്സരത്തിൻറെ എല്ലാവിധ ആവോശവും മറ്റൊരു ഫൈനലിനാണ് കൊൽക്കത്തയിലെ ഈഡൻഗാർഡൻസ് സാക്ഷ്യം വഹിച്ചത്. ആദ്യം ബാറ്റ് ചെയ്ത ഓസീസ് ഉയർത്തിയ 254 ൻറെ വിജയലക്ഷ്യത്തിന് വെറും 7 റൺസ് അകലെ ഇംഗ്ലണ്ട് വീണു. അന്നുവരേയുള്ള ലോകകപ്പ് ചരിത്രത്തിലെ ഏറ്റവും ചെറിയ സ്ക്കോറിലുള്ള ഫൈനലിലെ തോൽവി. ഓസീസ് ആദ്യത്തെ ലോകകിരീടം സ്വന്തമാക്കിയപ്പോൾ രണ്ടാമത്തും ഫൈനലിൽ തോൽക്കാനായിരുന്നു ഇംഗ്ലണ്ടിൻറെ വിധി.

ഓസ്ട്രേലിയ - ന്യൂസിലാൻറ് 1992 

ഈ ലോകകപ്പിലാണ് ആദ്യമായി ടീമുകൾ കളർ ജേഴ്സി അണിഞ്ഞ് മത്സരിച്ചത്. ചുുവന്ന പന്തിനു പകരം വെള്ള പന്തുകൾ ഉപയോഗിക്കാൻ തുടങ്ങിയതും ഫീൽഡിങ് നിയന്ത്രണങ്ങൾ ഏർപ്പെടുത്തിയതും 92 ലാണ്. ഡേ നൈറ്റ് മത്സരങ്ങൾ ആദ്യമായി ലോകകപ്പിൽ അവതരിപ്പിച്ചതും ഓസ്ട്രേലിയയും ന്യൂസിലാൻറും ചേർന്ന് നടത്തിയ ഈ ലോകകപ്പിലാണ്. 

വർണവിവേചനത്തിൻരെ പേരിൽ മാറ്റി നിർത്തപ്പെട്ട ദക്ഷിണാഫ്രിക്കയെ ആദ്യമായി ലോകകപ്പിൽ ഉൾപ്പെടുത്തിയെന്നതാണ്  അഞ്ചാമത്തെ ലോകകപ്പിൻറെ സവിശേഷത. 9 ടീമുകളാണ് ഈ ലോകകപ്പിൽ മത്സരിക്കാനിറങ്ങിയത്. കപിൽ ദേവിന് പകരം അസ്ഹറുദ്ദീനെ നായകനാക്കിയാണ് ഇന്ത്യ ലോകകപ്പിനെത്തിയത്. സച്ചിൻ ടെണ്ടുൽക്കറിൻറെ ആദ്യത്തെ ലോകകപ്പ് മത്സരവും 92 ലേത് തന്നെ. ഇംഗ്ലണ്ടുമായി ആദ്യമത്സരത്തിൽ തന്നെ തോറ്റ് തുടങ്ങിയ ഇന്ത്യ ആകെ രണ്ട് മത്സരം മാത്രമാണ് വിജയിച്ചത്. ചിരവൈരികളായ പാക്കിസ്ഥാനെ 43 റൺസിന് പരാജയപ്പെടുത്തിയതും മഴയെ തുടർന്ന് വിജയലക്ഷ്യം പുനക്രമീകരിക്കപ്പെട്ട മത്സരത്തിൽ സിംബാബ്വെയെ 55 റൺസിന് പരാജയപ്പെടുത്തിയതും മാത്രമൊതുങ്ങി മുൻ ചാമ്പ്യൻമാരുടെ നേട്ടം. ശ്രീലങ്കയുമായുള്ള മത്സരം ഉപേക്ഷിക്കപ്പെട്ടതോടെ ലഭിച്ച ഒരു പോയൻറുമടക്കം മൊത്തം 5 പോയൻറുമായി ഇന്ത്യ പോയൻറ് പട്ടികയിൽ 7 ആം സ്ഥാനത്തായിരുന്നു. 

ഇന്ത്യയെ പോലെ തന്നെ ആദ്യമത്സരത്തിൽ തോറ്റാണ് പാക്കിസ്താനും ലോകകപ്പ് ആരംഭിച്ചത്. ഇന്ത്യയോട് ഗ്രൂപ്പ് ഘട്ടത്തിൽ പരാജയപ്പെട്ടെങ്കിലും പിന്നീട് അങ്ങോട്ട് വർദ്ധിത വീര്യത്തോടെ പോരാടുന്ന പച്ചപടയെയാണ് ലോകകപ്പ് കണ്ടത്. ഇമ്രാൻ ഖാനു കീഴിൽ വസിം അക്രവും ആക്വിബ് ജാവേദും റമീസ് രാജയും ഇൻസമാം ഉൾഹഖും ജാവേദ് മിയാൻദാദുമെല്ലാം തങ്ങളുടെ കരിയരിലെ ഏറ്റവും മികച്ച പ്രകടനം തന്നെ പുറത്തെടുത്തപ്പോൾ പച്ചപടയുടെ തേരോട്ടം അവസാനിച്ചത് കിരീടം ചൂടിയാണ്. സെമിയിൽ മാർട്ടിൻ ക്രോയുടെ ന്യൂസിലാൻറിനെ 4 വിക്കറ്റിന് തകർത്തെത്തിയ പാക്കിസ്താൻ ഫൈനലിൽ ഇംഗ്ലണ്ടിനെ 22 റൺസിനാണ് മറികടന്നത്. വസിം അക്രത്തിൻറെ മിന്നുന്ന ഓൾ റൌണ്ട് പ്രകടനമാണ് പാക്കിസ്ഥാനെ വിജയികളാക്കിയത്. മുന്ന് വിക്കറ്റ് പിഴുത അക്രം 18 പന്തിൽ നിന്ന് 33 റൺസെടുത്തും പാക്ക് വിജയത്തിൻറെ കുന്തമുനയായി. ഇമ്രാൻ ഖാൻറേയും ജാവേദ് മിയാൻദാദിൻറേയും അർദ്ധ സെഞ്ച്വറിയുടെ  പിൻബലത്തിൽ പാക്കിസ്ഥാൻ നേടിയ 250 വിജയലക്ഷ്യം മറികടക്കാൻ ഇംഗ്ലണ്ടിനായില്ല. ഇംഗ്ലണ്ട് നിരയിൽ മധ്യനിര ബാറ്റർ നീൽ ഫെയർബ്രദറും ഗ്രഹാം ഗുച്ചും അലൻ ലാമ്പുമല്ലാതെ മറ്റാരും ഒന്നു പൊരുതിയത് പോലുമില്ല. 

ഇന്ത്യ- പാക്കിസ്ഥാൻ- ശ്രീലങ്ക 1996

ഇന്ത്യയും പാകിസ്ഥാനും ശ്രീലങ്കയും സംയുക്തമായാണ് 96 ലെ ലോകകപ്പിന് ആതിഥേയത്വം വഹിച്ചത്.ലോകകപ്പ് കിരീടം നേടാൻ ഏറെ സാധ്യതയുള്ള ടീമായി  ഇന്ത്യയെ  എല്ലാവരും വിധിയെഴുതിയ ലോകകപ്പ്. സച്ചിനും അസറും കാംബ്ലിയും കുംബൈയുമെല്ലാം അവരുടെ പ്രകടനത്തിൻറെ പാരമ്യത്തിലുള്ളപ്പോൾ മറ്റൊരു ഫേവറിറ്റുകളെ വാതുവെപ്പുകാർക്കും ചൂണ്ടിക്കാട്ടാനുണ്ടായിരുന്നില്ല. സ്വന്തം നാട്ടിലാണ് ടൂർണമെൻറ് എന്നത് ഇന്ത്യയുടെ സാധ്യതകളും ഉയർത്തി.

സുരക്ഷാ പ്രശ്നം ചൂണ്ടികാട്ടി ഒരു ടീം മത്സരത്തിൽ നിന്ന് വിട്ടുനിൽക്കുന്നതിനും 96 ലെ ലോകകപ്പ് സാക്ഷ്യം വഹിച്ചു. ശ്രീലങ്കയുമായി കൊളംബോയിൽ നടക്കേണ്ടിയിരുന്ന മത്സരം ഓസ്ട്രേലിയയാണ് സുരക്ഷാകാരണങ്ങളാൽ ബഹിഷ്ക്കരിച്ചത്. മത്സരദിവസം മുംബൈയിൽ തങ്ങിയ ഓസീസ് ടീം അങ്ങനെ ശ്രീലങ്കയ്ക്ക് ആദ്യത്തെ വാക്കോവർ സമ്മാനിച്ചു. അതൊരു തുടക്കമായിരുന്നു, ശ്രീലങ്കയ്ക്ക്. 

ഏകദിനത്തിലാദ്യമായി ഫിൽഡിങ് നിയന്ത്രണമുള്ള ആദ്യ പതിനഞ്ച് ഓവറിൽ സ്ക്കോർ നൂറുകടത്തുകയെന്ന പത്ത് തലയുടെ തന്ത്രം ശ്രീലങ്ക അവതരിപ്പിച്ചത് ഈ ലോകകപ്പിലാണ്. ഓരോ പന്തിലും റൺസെന്ന ദക്ഷിണാഫ്രിക്കൻ തന്ത്രത്തേക്കാൾ ഏറ്റവും അപകടകാരിയായിരുന്നു ശ്രീലങ്കയുടെ ഈ തന്ത്രം. വമ്പനടിക്കാർ ക്രിക്കറ്റിലേക്ക് കടന്നുവന്നതും ഈ ലോകകപ്പിലൂടെയാണ് എന്ന് പറയാം. സനത് ജയസൂര്യയെന്ന താരത്തിൻറെ ഉദയം തന്നെയാണ് ഈ ലോകകപ്പിലെ വലിയ പ്രത്യേകത. ജയസൂര്യയും കലുവിതാരണയും ചേർന്ന് ആദ്യ പതിനഞ്ച് ഓവറിൽ നടത്തിയ വെടിക്കെട്ട് ലോകകപ്പിൽ എതിരാളികളുടെയെല്ലാം ആത്മവിശ്വാസം തല്ലികെടുത്തുന്നതായിരുന്നു. ഈ തന്ത്രം തന്നെയാണ് ശ്രീലങ്കയുടെ മുന്നോട്ടുള്ള പ്രയാണത്തിന് വേഗം പകർന്നതും. 

ഒറ്റമത്സരം പോലും പരാജയപ്പെടാതെ ലങ്ക സെമിയും ഫൈനലും താണ്ടി കപ്പുയർത്തുന്നതിന് മുമ്പ് കണ്ണീരിനും കയ്യാങ്കളിക്കുമെല്ലാം 96 ലെ ലോകകപ്പ് സാക്ഷ്യം  വഹിച്ചു. സച്ചിൻറെ മാസ്മരിക ബാറ്റിങ്ങിനിടെയിലും ഓസ്ട്രേലിയയോടും ശ്രീലങ്കയോടും തോറ്റാണ് ഇന്ത്യ സെമിയിലെത്തിയത്. കൊൽക്കത്തയിലെ ഈഡൻ ഗാർഡൻസിലെ ആദ്യ സെമിയിൽ ശ്രീലങ്കയെ നേരിടാനിറങ്ങുമ്പോൾ മറ്റൊരു ഫൈനൽ പ്രവേശനമായിരുന്നു ഇന്ത്യ കരുതിയത്. എന്നാൽ ടോസ് നേടി ശ്രീലങ്കയെ ബാറ്റിങ്ങിനയക്കാനായിരുന്നു മുഹമ്മദ് അസറുദ്ദീൻറെ തീരുമാനം. കൂറ്റനടിക്കാരായ കലുവിതാരണയേയും ജയസൂര്യയേയും സ്കോർ ബോർഡിൽ ഒരു റൺമാത്രമുള്ളപ്പോൾ കൂടാരം കയറ്റി ജവഗൽ ശ്രീനാഥ് ഇന്ത്യക്ക് പ്രതീക്ഷ നൽകി. പക്ഷെ അരവിന്ദ ഡിസൽവയും അർജുന രണതുംഗെയും റോഷൻ മഹാനാമയും ഹഷന തിലകരത്നെയും ചേർന്ന് ലങ്കയെ കരകയറ്റി.  ശ്രീലങ്ക ഉയർത്തിയ 252 റൺസിൻറെവിജയലക്ഷ്യം എലുപ്പമെന്ന് തോന്നിയെങ്കിലും പക്ഷെ ഇന്ത്യക്ക് മറികടക്കാനായില്ല. സച്ചിൻറെ അർദ്ധ സെഞ്ച്വറിക്കപ്പുറം കാര്യമായി ഒന്നും തന്നെ ഇന്ത്യയ്ക്ക് നേടാനായില്ല. ബാറ്റകൊണ്ട് ഞെട്ടിക്കാനാവാതെ പോയ ജയസൂര്യ തൻറെ ലെഗ് സ്പിന്നുകൊണ്ട് ഇന്ത്യയെ വട്ടം ചുറ്റിച്ചു. 7 ഓവറിൽ 12 റൺസിന് വിലപ്പെട്ട 3 വിക്കറ്റുകളാണ് ജയസൂര്യ വീഴ്ത്തിയത്. സച്ചിനും ജഡേജയും മഞ്ജരേക്കറിനേയും ജയസൂര്യ പുറത്താക്കിയപ്പോൾ ഇന്ത്യ 34 ഓവറിൽ 8 വിക്കറ്റിന് 120 എന്ന നിലയിലായി. പത്ത് റൺസമുായി വിനോദ് കാംബ്ലിയും റണ്ണൊന്നുമെടുക്കാതെ അനിൽ കുംബ്ലേയും ക്രീസിൽ നിൽക്കുമ്പോൾ നിരാശപൂണ്ട കാണികൾ സ്റ്റേഡിയത്തിൽ അക്രമം അവിച്ചുവിട്ടു. സ്റ്റേഡിയത്തിൻറെ ഒരുവശത്ത് തീയിട്ട കാണികളെ ശാന്തരാക്കാൻ ശ്രമിച്ചെങ്കിലും ഒന്നും ഫലം കണ്ടില്ല. കരഞ്ഞ്കൊണ്ട് ഈഡൻ ഗാർഡൻസിൻരെ പവലിയനിലേക്ക് നടന്നുപോയ വിനോദ് കാംബ്ലി ഇന്ത്യൻ ക്രിക്കറ്റിൻറെ വേദനയായി. ശ്രീലങ്കയെ വിജയികളായി പ്രഖ്യാപിച്ച് മത്സരം ഉപേക്ഷിച്ചു. ചരിത്രത്തിലാദ്യമായി ശ്രീലങ്ക ലോകകപ്പ് ഫൈനലിലേക്ക്. 

ലാഹോറിലെ ഫൈനലിൽ മുൻ ചാമ്പ്യനമാരായ ഓസ്ട്രേലിയയായിരുന്നു ലങ്കയുടെ എതിരാളികൾ. ലീഗ് മത്സരത്തിൽ ശ്രീലങ്കയുമായുള്ള മത്സരം ബഹിഷ്ക്കരിച്ച ഓസ്ട്രേലിയ വെസ്റ്റ് ഇൻഡീസിനോട് മാത്രമായിരുന്നു ഗ്രൂപ്പ് മത്സരങ്ങളിൽ തോറ്റിരുന്നുള്ളു. സെമിയിൽ അതേ വിൻഡീസിനെ 5 റൺസിന് പരാജയപ്പെടുത്തിയാണ് ഓസീസ് ലാഹോറിലേക്ക് ടിക്കറ്റെടുത്തത്. ഫൈനലിൽ ടോസ് നേടി ഫീൽഡിഹ് തിരഞ്ഞെടുത്ത ശ്രീലങ്ക ഓസീസിനെ നിശ്ചിത 50 ഓവറിൽ 7 വിക്കറ്റിന് 241 എന്ന സ്ക്കോറിൽ പിടിച്ചുകെട്ടി. സെമിയിലേത് പോലെ ഓപ്പണർമാരായ ജയസൂര്യയും കലുവിതാരണയും പരാജയപ്പെട്ടെങ്കിലും അരവിന്ദ ഡിസൽവെയുടെ സെഞ്ച്വറിയും അശാങ്ക ഗുരുസിൻഹയുടെ അർദ്ധസെഞ്ച്വരിയും പുറത്താകാതെ 47 റൺസെടുത്ത നായകൻ അർജ്ജുന രണതുങ്കെയും ദ്വീപിലേക്ക് ആദ്യത്തെ ലോകകിരീടം കൊണ്ടുപോയി. 

ഇംഗ്ലണ്ട്  1999

ഇംഗ്ലണ്ടിനൊപ്പം ചേർന്ന്  നെതർലണ്ട്സും വെയിൽസും സ്ക്കോട്ടലൻറും അയർലൻറും സംയുക്തമായി നടത്തിയ ലോകകപ്പാണ് 1999 ലേത്. 12 ടീമുകൾ മാറ്റുരച്ച ടൂർണമെൻറിൽ സൂപ്പർ സിക്സ് മാതൃകയിലായിരുന്നു രണ്ടാംഘട്ടം. സൂപ്പർ സിക്സിൽ ആദ്യ നാല് സ്ഥാനത്തെത്തുന്ന ടീമുകൾ സെമിയിൽ പ്രവേശിക്കും. വാശിയേറിയ മത്സരങ്ങളാണ് ടൂർണമെൻറിലുടനീളം നടന്നത്.  ഇന്ത്യയുടെ മോശം പ്രകടനത്തിനാണ് സൂപ്പർ സിക്സ് വേദിയായത്. സൂപ്പർ സിക്സിലെ 5 മത്സരങ്ങളിൽ ഒരെണ്ണം മാത്രം വിജയിച്ച ഇന്ത്യ 5 പോയൻറുള്ള സിംബാബ്വേയ്ക്കും പിന്നിൽ 2 പോയൻറുമായി അവസാനമായി. പാക്കിസ്ഥാനും ഓസീസും ദക്ഷിണാഫ്രിക്കയും റൺ ശരാശരിയിൽ സിംബാബ്വേയെ പിന്തള്ളി ന്യൂസിലാൻറും സെമിയിലേക്ക് പ്രവേശിച്ചു. 

ഓസീസും ദക്ഷിണാഫ്രിക്കയും തമ്മിലുള്ള രണ്ടാമത്തെ സെമിഫൈനൽ മത്സരം ലോകകപ്പിലെ എക്കാലത്തേയും മികച്ച സെമിപോരാട്ടമായിരുന്നു. ആദ്യം ബാറ്റ് ചെയ്ത ഓസീസിൻരെ 213 പിന്തുടർന്ന ദക്ഷിണാഫ്രിക്ക ലാൻസ് ക്ലൂസ്നറുടെ മാരകപ്രഹരത്തിലൂടെ വിജയിക്കുമെന്ന് ഉറപ്പിച്ച നിമിഷങ്ങൾ.  പക്ഷെ  ദക്ഷിണാഫ്രിക്കൻ സ്ക്കോർ 213 ലെത്തി ടൈയിൽ നിൽക്കവെ,അവസാന ഓവറിലെ നാലമത്തെ പന്തിൽ അലൻ ഡൊണാൾഡ് റൺഔട്ടായതോടെ പൊലിഞ്ഞത് ദക്ഷിണാഫ്രിക്കയുടെ ഫൈനൽ സ്വപ്നമാണ്. സൂപ്പർ സിക്സിലെ പ്രകടനത്തിൻറെ അടിസ്ഥാനത്തിൽ ഓസ്ട്രേലിയ ഫൈനലിലേക്ക്. ലോകകപ്പിലെ എക്കാലത്തേയും നിർഭാഗ്യരായ ടീമെന്ന അപഖ്യാതി നിലനിർത്തി ദക്ഷിണാഫ്രിക്ക പുറത്തേക്ക്. 

കലാശപോരാട്ടത്തിൽ സൂപ്പർ സിക്സിൽ ഒന്നാമതെത്തിയ പാക്കിസ്ഥാനായിരുന്നു ഓസ്ട്രേലിയയുടെ എതിരാളി. ന്യൂസിലാണ്ടിനെ 9 വിക്കറ്റിന് തോൽപ്പിച്ചാണ് പാക്കിസ്ഥാൻ ഫൈനലിനെത്തിയത്. ഷെയിൻ വോൺ എന്ന ലെജൻറിൻറെ മികച്ച പ്രകടനത്തിനാണ് ലോഡ്സിലെ ഫൈനൽ സാക്ഷ്യം വഹിച്ചത്. 9 ഓവർ എറിഞ്ഞ വോൺ വീഴ്ത്തിയത് 4 വിക്കറ്റുകൾ, വഴങ്ങിയത് വെറും 33 റൺസ്. മഗ്രാത്തും ടോം മൂഡിയും പോൾ റെയ്ഫലുമെല്ലാം കണിശതയോടെ എറിഞ്ഞപ്പോൾ 39 ഓവറിൽ 132 റൺസിന് പാക്കിസ്ഥാൻ പുറത്തായി. മാർക്ക് വോയും ആഡം ഗിൽക്രിസ്റ്റും പോണ്ടിങ്ങുമെല്ലാം നിരക്കുന്ന പേരുകേട്ട ഓസീസ് ബാറ്റിങ നിരയ്ക്ക് പൊരുതാനുള്ള സ്ക്കോർപോലും പാക്കിസ്ഥാന് മുന്നോട്ട് വെക്കാനായില്ല. മാർക്ക് വോയുമായി ചേർന്ന് ഒന്നാം വിക്കറ്റിൽ 75 റൺസ് ചേർത്ത്, 36 പന്തിൽ നിന്ന് 54 റൺസുമായി ഗിൽ ക്രിസ്റ്റ് പുറത്താകുമ്പോൾ തന്നെ ഓസീസ് വിജയം കൈപിടിയിൽ ഒതുക്കിയിരുന്നു. പിന്നാലെ വന്ന പോണ്ടിങ്ങിനും ഡാരൻ ലഹ്മാനും പിന്നെ ചടങ്ങ് തീർക്കുക എന്നത് മാത്രമേയുണ്ടായിരുനുള്ളു. 20.1 ഓവറിൽ ഗില്ലിയുടേയും പോണ്ടിങ്ങിൻറേയും വിക്കറ്റുകൾ മാത്രം നഷ്ടപ്പെടുത്തി ഓസട്രേലിയ രണ്ടാമത്തെ ലോക കിരീടത്തിൽ മുത്തമിട്ടു. 

ലോകക്രിക്കറ്റിൽ ഓസീസിൻറെ കുതിപ്പിന് ചെറിയൊരു തുടക്കം മാത്രമായിരുന്നു അത്.

ദക്ഷിണാഫ്രിക്ക 2003

 കെനിയയ്ക്കും സിംബാബ്വേയ്ക്കും ഒപ്പം ചേർന്ന് ദക്ഷിണാഫ്രിക്ക ആയിരുന്നു ഈ മില്ലേനിയത്തിലെ ആദ്യത്തെ ലോകകപ്പിന് ആതിഥേയത്വം വഹിച്ചത്. ഇന്ത്യയുടെ തിരിച്ചുവരവിനൊപ്പം തന്നെ വമ്പൻ അട്ടിമറികൾക്കും സാക്ഷ്യം വഹിച്ച ലോകകപ്പാണ് 2003 ലേത്. സൂപ്പർ സികസ് മാതൃക തന്നെ പിന്തുടർന്ന ദക്ഷിണാഫ്രിക്കയിൽ കെനിയൻ കരുത്താണ് എല്ലാവരേയും ഞെട്ടിച്ചത്. ആദ്യ റൌണ്ടിൽ ശ്രീലങ്കയേയും ബംഗ്ലാദേശിനേയും സിംബാബ്വേയേയും പരാജയപ്പെടുത്തിയാണ് കെനിയ സൂപ്പർ സിക്സിലെത്തിയത്. നെയ്റോബിയിൽ കെനിയക്കെതിരെയുള്ള മത്സരം ന്യൂസിലാൻറ് സുരക്ഷാകാരണങ്ങളാ. ബഹിഷ്ക്കരിച്ചതും കെനിയക്ക് നേട്ടമായി. സൂപ്പ്ർ സിക്സിൽ ശ്രീലങ്കയ്ക്ക് മുകളിൽ മൂന്നാം സ്ഥാനക്കാരായാണ് കെനിയ സെമിഫൈനൽ യോഗ്യത നേടിയത്. ഇന്ത്യയുമായുള്ള രണ്ടാം സെമിഫൈനലിൽ 91 റൺസിനാണ് കെനിയ തോറ്റത്. നായകൻ സൌരവ് ഗാംഗ്ുലിയുടെ സെഞ്ചറി കരുത്തിൽ ഇന്ത്യ പടുത്തുയർത്തിയ 271 റൺസ് മറികടക്കാൻ ആഫ്രിക്കൻ കരുത്തിനായില്ല, ക്യാപ്റ്റൻ സ്റ്റീവ് ടിക്കോളോയും വാലറ്റത്ത് കോളിൻസ് ഒബുയയും പൊരുതിയെങ്കിലും സഹീർ ഖാൻറേയും ആശിഷ് നെഹ്റയുടേയും ശ്രീനാഥിൻറേയും വേഗത്തിന് മുന്നിൽ പിടിച്ചുനിൽക്കാൻ അവർക്കായില്ല.  

ഒറ്റമത്സരവും പരാജയപ്പെടാതെയാണ് ഓസ്ട്രേലിയ തുടർച്ചയായ മറ്റൊരു ഫൈനൽ കലിക്കാനെത്തിയത്. ശ്രീലങ്കയെ മഴനിയമപ്രകാരം 48 റൺസിനാണ് ഓസീസ് സെമിയിൽ കീഴടക്കിയത്. ജോഹനാസ് ബർഗിലെ ഫൈനലിൽ ഓസീസിനെ ബാറ്റിങ്ങിനയച്ച ഗാംഗുലയുടെ തീരുമാനം പാളി. ക്യാപ്റ്റൻ പോണ്ടിങ്ങും ഗിൽക്രിസ്റ്റും ഡാമിയൻ മാർട്ടിനും അടിച്ച് കയറിയപ്പോൾ ഓസീസ് സ്ക്കോർ 50 ഓവറിൽ 2 വിക്കറ്റിന് 359 റൺസായി. 140 റൺസുമായി പോണ്ടിങ് പുറത്താകാതെ നിന്നു. മറുപടി ബാറ്റിങ്ങിനിറങ്ങിയ ഇന്ത്യയ്ക്ക് പക്ഷെ 39.2 ഓവറിൽ 234 റൺസ് എടുക്കാനെ കഴിഞ്ഞുള്ളു. 82 റൺസെടുത്ത സേവാഗിനും 47 റൺസെടുത്ത ദ്രാവിഡിനുമല്ലാതെ കാര്യമായ സംഭാവനകൾ നൽകാൻ മറ്റാർക്കുമായില്ല. ഫലം തുടർച്ചയായ രണ്ടാം കിരീടവവുമായി ഏറ്റവുമധികം ലോകകപ്പ് നേടിയ ടീംഎന്ന റെക്കോർഡ് ഓസീസ് സ്വന്തമാക്കി.

വെസ്റ്റ് ഇൻഡീസ്  2007 

വിൻഡീസ് ദ്വീപുകളായിരുന്നു 2007 ലോകകപ്പ് മാമാങ്കത്തിന് വേദിയായത്. 16 ടീമുകൾ 4 ഗ്രൂപ്പുകലായി തിരിഞ്ഞായിരുന്നു ആദ്യ റൌണ്ട് മത്സരം. സൂപ്പർ 8 ലെ ആദ്യ നാല് ടീമുകൾ സെമിയോഗ്യത നേടുന്നതായിരുന്നു രണ്ടാം റൌണ്ടിലെ മത്സരരീതി. 

ബർമുഡയോട് മാത്രം വിജയിച്ച് ആദ്യറൌണ്ടിൽ തന്നെ ഇന്ത്യ പുറത്തായി. 5 ന് 413 എന്ന കൂറ്റൻ സ്ക്കോർ നേടി 256 റൺസിന് ബർമുഡയെന്ന കുഞ്ഞൻ ടീമിനെ തോൽപിച്ച ഇന്ത്യയെ ആദ്യമത്സരത്തിൽ 5 വിക്കറ്റിന് ബംഗ്ലാദേശും 69 റൺസിന് ശ്രീലങ്കയും തോൽപിച്ചു. 

ഒറ്റമത്സരവും തോൽക്കാതെ തുടർച്ചയായ മൂന്നാമത്തെ ലോകകപ്പിലും ഓസ്ട്രേലിയ രെക്കോർഡിട്ടു. ദക്ഷിണാഫ്രിക്കയെ ഒരിക്കൽ കൂടി സെമിയിൽ പരാജയപ്പെടുത്തി തുടർച്ചയായ നാലാമത്തെ ഫൈനലിനും ഓസ്ട്രേലിയ യോഗ്യത നേടി. ഫൈനലിൽ ശ്രീലങ്കയായിരുന്നു എതിരാളികൾ. 96 ലെ പരാജയത്തിന് ഓസീസ് പകരം വീട്ടിയപ്പോൾ ശ്രീലങ്ക 53 റൺസിനാണ് പരാജയപ്പെട്ടത്. (മഴ നിയമപ്രകാരമായിരുന്നു ഓസീസ് വിജയം). മഴയെ തുടർന്ന് 38 ഓവറായി നിജപ്പെടുത്തിയ മത്സരത്തിൽ ആദ്യം ബാറ്റ് ചെയ്ത ഓസ്ട്രേലിയ ഗിൽ ക്രിസ്റ്റിൻരെ മാരക വെടിക്കെട്ടിൽ നിശ്ചിത ഓവരിൽ 281 റൺസാണ് നേടിയത്. മറുപടി ബാറ്റിങ്ങിൽ ജയസൂര്യയുടേയും സങ്കക്കാരയുടേയും ഫിഫ്റ്റികൾ പോരുമായിരുന്നില്ല ശ്രീലങ്കയ്ക്ക് ജയിക്കാൻ. റിക്കി പോണ്ടിങ്ങിന് കീഴിൽ ഒരിക്കൽ കൂടി ഓസീസ് ലോകകിരീടം ചൂടി. ലോകകപ്പിൽ ഹാട്രിക്ക് കിരീടമാണ് കരീബിയൻ മണ്ണിൽ  മഞ്ഞപ്പട നേടിയത്.

ഇന്ത്യ - ശ്രീലങ്ക - ബംഗ്ലാദേശ്  2011

ലോകകപ്പിൻറെ പത്താം പതിപ്പിന് ഇന്ത്യയും ശ്രീലങ്കയും ബംഗ്ലാദേശും ചേർന്നാണ് വേദിയൊരുക്കിയത്. 14 ടീമകളെ രണ്ട് ഗ്രൂപ്പാക്കി തിരിച്ചായിരുന്നു ടൂർണമെൻറ്.  ക്വാർട്ടർ ഫൈനൽ മുതൽ സൂപ്പർ ഓവർ നടപ്പാക്കിയത് ഈ ടൂർണമെനറിലാണ്.  

വിരാട് കോഹ്ലിയെന്ന ലോകോത്തരതാരത്തിൻറെ ആദ്യലോകകപ്പായിരുന്നു 2011 ലേത്. ആദ്യമത്സരത്തിൽ തന്നെ സെഞ്ച്വറിയടിച്ച് കോഹ്ലി വരവറിയിച്ചു. സേവാഗ് നേടിയ 175 ഉം കൂടിയായതോടെ ബംഗ്ലാദേശിനെ ആദ്യമത്സരത്തിൽ 87 റൺസിനാണ് ഇന്ത്യ പരാജയപ്പെടുത്തിയത്. കരീബിയൻ മണ്ണിലെ നാണക്കേടിനുള്ള പ്രതികാരമായി. 

ഗ്രൂപ്പ് ഘട്ടത്തിൽ ഇംഗ്ലണ്ടുമായുള്ള മത്സരം ടൈ ആയതോടെ കുറച്ച് സമ്മർദ്ദത്തിലായിരുന്നു ഇന്ത്യ. 338 റൺസ് എടുത്തിട്ടും അത് പ്രതിരോധിക്കാൻ ഇന്ത്യന ബൌളർമാർക്ക് ആയില്ലെന്നത് ഇന്ത്യൻ ബൌളിങ് നിരയുടെ കഴിവിൽ തന്നെ സംശയമുയർത്തി. പിന്നാലെ ചെറിയ ടീമുകളായ അയർലാൻറ്, നെതർലാൻറ്സ് എന്നീ ടീമുകൾക്കെതിരെ വിജയിച്ചെങ്കിലും അടുത്ത മത്സരത്തിൽ 

 ദക്ഷ്ണിഫ്രിക്കയോട്  ഇന്ത്യ പരാജയപ്പെട്ടതും ആശങ്കയ്ക്ക് വഴിവെച്ചു. രണ്ട് പന്ത് അവശേഷിക്കെ 3 വിക്കറ്റിനായിരുന്നു ദക്ഷിണാഫ്രിക്കയുടെ വിജയം. സച്ചിൻറെ സെഞ്ചറിയും സേവാഗ്, ഗംബീർ, എന്നിവരുടെ ഫിഫ്റ്റിയും ചേർത്ത് 296 റൺസാണ് മത്സരത്തിൽ ഇന്ത്യ നേടിയത്. 5 വിക്കറ്റെടുത്ത ഡെയിൽ സ്റ്റെയിനാണ് കുറ്റൻ സ്ക്കോർ നേടുന്നതിൽ നിന്ന് ഇന്ത്യയെ തടഞ്ഞത്. മറുപടി ബാറ്റിങ്ങിൽ ഹാഷിം അംല, ജാക്ക് കല്ലിസ്, എ ബി ഡിവില്ലേഴ്സ്, എന്നിവരുടെ അർദ്ധശതകങ്ങളും അവസാന ഓവറുകളിൽ ആഞ്ഞടിച്ച റോബിൻ പീറ്റേഴ്സൺ, ജോഹൻ ബോത്ത എന്നിവരുമാണ്  ദക്ഷിണാഫ്രിക്കയ്ക്ക് വിജയമൊരുക്കിയത്. 

എന്നാൽ പിന്നീടങ്ങോട്ട് ഇന്ത്യക്ക് തിരിഞ്ഞുനോക്കേണ്ടി വന്നില്ല. വെസ്റ്റ് ഇൻഡീസിനെ 80 റൺസിന് തോൽപിച്ച് ക്വാർട്ടറിലെത്തിയ ഇന്ത്യ ഓസീസിൻരെ ലോകകപ്പിലെ അപാരാജിത കുതിപ്പിനും തടയിട്ടു. പതിനാല് പന്ത് അവശേഷിക്കെയാണ് 5 വിക്കറ്റിന് ഇന്ത്യ ഓസീസിനെ ക്വാർട്ടറിൽ പുറത്താക്കിയത്. പോണ്ടിങിൻരെ സെഞ്ച്വറി കരുത്തിൽ 260 റൺസ് നേടിയ ഓസീസിന് ഇന്ത്യ മറുപടി നൽകിയത് സച്ചിൻറേയും ഗംഭീറിൻറേയും യുവരാജിൻറേയും അർദ്ധ സെഞ്ച്വറികളിലൂടെയായിരുന്നു. അവസാന ഓവറുകളിൽ തകർത്താടിയ റെയ്ന കൂടി ചേർന്നതോടെ വിജയം ഇന്ത്യയ്ക്കൊപ്പമായി. ഫലം 92 നുശേഷം ഓസീസില്ലാത്ത ആദ്യത്തെ ലോകകപ്പ്  സെമിഫൈനലുകൾക്ക് ലോകകപ്പ് സാക്ഷ്യം വഹിച്ചു.

സെമിഫൈനലിൽ ചിരവൈരികളായ പാക്കിസ്ഥാനായിരുന്നു ഇന്ത്യയുടെ എതിരാളി. പരമ്പരാഗത വൈരികൾ ആദ്യമായി ലോകകപ്പ് സെമിയിൽ കളിക്കുന്നതിൻരെ എല്ലാവിധ ആവേശവും പ്രകടമായിരുന്നു.  ടോസ് നേടിയ ഇന്ത്യൻ നായകൻ ധോണി മൊഹാലിയിൽ ബാറ്റിങ് തിരഞ്ഞെടുത്തു. മികച്ച ഫോമിൽ കളിക്കുന്ന സച്ചിനും യുവരാജും ഗംഭീറും സേവാഗുമെല്ലാം മികച്ച സ്ക്കോർ കണ്ടെത്തുമെന്ന വിശ്വാസം തന്നെയായിരുന്നു അതിന് പിന്നിൽ. സച്ചിൻ പ്രതീക്ഷ തെറ്റിച്ചില്ല. 85 റൺസെടുത്ത് സച്ചിൻ പുറത്തായെങ്കിലും ചെറുതല്ലാത്ത സംഭാവനകൾ ഗംഭീറും ദോണിയും റെയ്നയും സേവാഗും നൽകി. 261 റൺസിൻരെ വിജയലക്ഷ്യമാണ് അന്ന് പാക്കിസ്ഥാന് മുന്നിൽ ഇന്ത്യ വെച്ചത്. വഹാബ് റിയാസിൻറെ 5 വിക്കറ്റ് പ്രകടനമാണ് ഇന്ത്യയെ 260 ൽ ഒതുക്കിയത്. കൃത്യമായ ഇടവേളകളിൽ പാക്ക് വിക്കറ്റുക8 വീഴ്ത്തി ഇന്ത്യൻ ബൌളർമാർ പാക്കിസ്ഥാനെ സമ്മർദ്ദത്തിലാക്കി. പന്തെടുത്ത എല്ലാ ബൌളർമാരും 2 വിക്കറ്റ് വീതം വീഴ്ത്തിയപ്പോൾ ഒരു പന്ത് മാത്രം അവശേഷിക്കെ പാക്കിസഥാൻ 231 ന് പുറത്ത്. സച്ചിൻ മാന ഓഫ് ദ മാച്ച് പട്ടം സ്വന്തമാക്കിയപ്പോൾ ലോകകപ്പിൽ പാക്കിസഥാനോട് തോറ്റിട്ടില്ലെന്ന റെക്കോർഡ്  ഇന്ത്യയും നിലനിർത്തി. 

മുംബൈയിലെ വാങ്കഡെ സ്റ്റേഡിയത്തിൽ ഏപ്രിൽ 2 ന് അരങ്ങേറിയ ഫൈനൽ രണ്ട് ഏഷ്യൻ രാജ്യങ്ങൾ ആദ്യമായി പരസ്പരം ഏറ്റമുട്ടിയ ആദ്യത്തെ ഫൈനലായിരുന്നു. അയൽവാസിയായ ശ്രീലങ്കയായിരുന്നു ഇന്ത്യയുടെ എതിരാളി.  അക്ഷരാർത്ഥത്തിൽ ഇന്ത്യക്ക് കണക്ക് തീർക്കലായിരുന്നു വാങ്കഡെയിലേത്. 1996 ലെ ലോകകപ്പ് സെമിയിലെ നാണക്കേടിൻറെ കണക്ക്. ന്യൂസിലാൻറിനെ 5 വിക്കറ്റിന് പരാജയപ്പെടുത്തി ഫൈനലിലേക്ക് ഒരിക്കൽകൂടി യോഗ്യത നേടിയ ശ്രീലങ്ക, ഇന്ത്യക്കെതിരെ ടോസ് നേടി ബാറ്റ് ചെയ്യാൻ തീരുമാനിച്ചു. ടൂർണമെൻറിലുടനീളം മികച്ച പ്രകടനം നടത്തുന്ന സങ്കക്കാരയിലും ജയവർദ്ധനെയിലുമെല്ലാമുള്ള വിശ്വാസം തന്നെയായിരുന്നു നായകൻ സങ്കക്കാരയുടെ തീരുമാനത്തിന് പിന്നിൽ. വേഗത്തിൽ ആദ്യവിക്കറ്റ് നഷ്ടമായെങ്കിലും ആദ്യ പത്ത് ഓവറിൽ വെറും 31 റൺസ് മാത്രം നേടിയിട്ടും ശ്രീലങ്ക പതറിയില്ല. മഹേല ജയവർദ്ധനെ പുറത്താകാതെ നേടിയ സെഞ്ച്വറി തന്നെയായിരുന്നു ലങ്കൻ ഇന്നിംഗ്സിൻറെ കരുത്ത്.  സങ്കക്കാര (48), ദിൽഷൻ (33), നുവാൻ കുലശേഖര (32) എന്നിവരും ലങ്കൻ ഇന്നിംഗ്സ് 6 ന് 274ൽ എത്തിച്ചു. കോഹ്ലിയടക്കം 7 ബൌളർമാരെയാണ് നായകൻ ധോണി പരീക്ഷിച്ചത്. മുനാഫ് പട്ടേലും യുവരാജ് സിങും ഹർബജനുമൊഴികെ പേരുകേട്ട ശേഷിക്കുന്ന ഇന്ത്യൻ ബൌളർമാരുടെ ശരാശരി 6 ന് മുകളിലായിരുന്നു. മറുപടി ബാറ്റിങ്ങിനിറങ്ങിയ ഇന്ത്യയ്ക്ക് സ്ക്കോർ ബോർഡ് തുറക്കുന്നതിന് മുമ്പേ വെടിക്കെട്ട് ഓപ്പണർ സേവാഗിനെ നഷ്ടമായി. നേരിട്ട രണ്ടാമത്തെ പന്തിൽ തന്നെ സേവാഗിനെ മലിംഗ വിക്കറ്റിന് മുന്നിൽ കുടുക്കി ഇന്ത്യയ്ക്ക് ആദ്യപ്രഹരമേൽപിച്ചു. നിലയുറയ്ക്കും മുമ്പേ സച്ചിനേയും പുറത്താക്കി മലിംഗ ഇന്ത്യയെ വീണ്ടും സമ്മർദ്ദത്തിലാക്കി. 18 റൺസ്മാത്രമായിരുന്നു സ്വന്തം കാണികളുടെ മു്നിൽ തൻറെ അവസാന ലോകകപ്പ് ഫൈനലിനിറങ്ങിയ സച്ചിൻറെ സമ്പാദ്യം. പക്ഷെ മൂന്നാമനായി ക്രീസിലെത്തിയ ഗൌതം ഗംഭീർ പേരാടാനുറച്ചായിരുന്നു നിന്നത്. 35 റൺസെടുത്ത കോഹ്ലിലേയും കൂട്ടി ഗംഭീർ ഇന്ത്യൻ ഇന്നിംഗ്സ് കെട്ടിപടുത്തു. നാലാം വിക്കറ്റിൽ നാടകൻ ധോണിയെത്തിയതോടെ ഇന്ത്യൻ ഇന്നിംഗ്സിൻറെ ഗിയർമാറി. ധോണിയുമെത്ത് സെഞ്ച്വറി കൂട്ടുകെട്ട് പടുത്തുയർത്തിയ ഗംഭീർ സെഞ്ച്വറിക്ക് മൂന്ന്  റൺസ് അകലെ വെച്ച് തിസാര പരേരയുടെ പന്തിൽ ക്ലീൻ ബൌൾഡ് ആകുമ്പോൾ ഇന്ത്യക്ക് വിജയിക്കാൻ ആവശ്യം 46 പന്തിൽ നിന്ന് 52 റൺസ് ആയിരുന്നു. അവസാന ഓവറുകളിൽ ആഞ്ഞടിച്ച യുവിയും ധോണിയും ചേർന്ന് 10 പന്ത് അവശേഷിക്കെ വിജയവും കപ്പും ഇന്ത്യയുടേതാക്കി. ലസിത് മലിംഗയെ മിഡ് വിക്കറ്റിലൂടെ രണ്ട് തവണ ബൌണ്ടറി കടത്തിയും കുലശേഖരയെ ലോങ് ഓണിന് മുകളിലൂടെ പറത്തിയും ധോണിയാണ് ഇന്ത്യയുടെ വിജയക്കൊടി പാറിച്ചത്. 42000 കാണികളെ സാക്ഷികളാക്കി ക്രിക്കറ്റിൻറെ ദൈവത്തിന് ഇക്കാലമത്രയും കിട്ടാകനിയായിരുന്ന ലോകകപ്പ് ധോണിയും സംഘവും സ്വന്തം നാട്ടിൽ സമ്മാനിച്ചു. സച്ചിനെ തോളത്തെടുത്ത് യൂസഫ് പത്താനും സുരേഷ് റെയ്നയും നടത്തിയ വിജയാഘോഷം ഇന്നും ഇന്ത്യൻ ക്രിക്കറ്റ് പ്രേമികളുടെ മനസിലെ മായാത്ത ചിത്രമാണ്. 79 പന്തിൽ നിന്ന് 8 ഫോറും 2 സ്കിസറുമടക്കം പുറത്താകാതെ 91 റൺസ് എടുത്ത് നായകൻ ധോണിയായിരുന്നു ഫൈനലിലെ താരം. ജയവർദ്ധനെയുടെ സെഞ്ച്വറിയും ഗംഭീറിൻറെ സെഞ്ച്വറിക്കരികിലവസാനിച്ച പ്രകടനവും പക്ഷെ ഏത് തട്ടിൽ അളന്നാലും ധോണിയുടെ കൂൾ ആൻറ് സ്റ്റൈൽ ഫിനീഷിന് പിന്നിലായിരുന്നു. ലോകകപ്പ് ഫൈനലിലെ ഏറ്റവും വലിയ റൺ ചെയ്സ് വിജയം കൂടിയായി ഇന്ത്യയുടേത്. പരമ്പരയിലുടനീളം ബാറ്റുകൊണ്ടും ബോളുകൊണ്ടും ഇന്ത്യയുടെ നടുംതൂണായി 362 റൺസും 15 വിക്കറ്റും വീഴ്ത്തിയ യുവരാജ് സിങ്ങ് ടൂർണമെൻറിൻറെ താരമായി. 

ഓസ്ട്രേലിയ- ന്യൂസിലൻറ് 2015

ഓസീസും ന്യൂസിലാൻറും വീണ്ടുമൊരിക്കൽ കൂടി ലോകകപ്പിന് ആതിഥേയത്വം വഹിച്ചത് 2015 ലാണ്. പതിനാല് ടീമുകൾ തന്നൊയിരുന്നു ഇത്തവണയും കപ്പിനായി പോരാടിയത്. നിലവിലെ രണ്ടാം സ്ഥാനക്കാരായ ശ്രീലങ്കയെ 98 റൺസിന് തോൽപിച്ചുകൊണ്ട് ആദ്യമത്സരത്തിൽ ന്യൂസിലാൻറും ഇംഗ്ലണ്ടിനെ 111 റൺസിന് തകർത്തുകൊണ്ട് ഓസീസും സ്വന്തം നാട്ടിലെ ലോകകപ്പിന് അതിഗംഭീരമായ തുടക്കമിട്ടു. ഗ്രൂപ്പ് ഘട്ടത്തിലെ ആദ്യ അഞ്ച് മത്സരവും ആദ്യം ബാറ്റ് ചെയ്ത ടീം 300 ന് മുകളിൽ സ്ക്കോർ ചെയ്ത ആദ്യത്തെ ലോകകപ്പുമായി 2015 ലേത്. ഗ്രൂപ്പ് ഘട്ടത്തിലെ ഏറ്റവും വലിയ അട്ടിമറിയും ആ അഞ്ചാമത്തെ മത്സരത്തിലായിരുന്നു. അസോസിയേറ്റ് രാഷ്ട്രമായ അയർലൻറിനെതിരെ 7 വിക്കറ്റിന് 304 റൺസെടുത്ത വിൻഡീസിനെ അയർലൻറ് 25 പന്ത് ശേഷിക്കെ 4 വിക്കറ്റിന് പരാജയപ്പെടുത്തിയാണ് എല്ലാവവരേയും ഞെട്ടിച്ചത്. ടൂർണമെൻറിൽ വിൻഡീസിന് പുറമെ യുഎഇ യേയും സിംബാബ്വേയേയും തോൽപിച്ച് അയർലൻറ് അസോസിയേറ്റ് രാജ്യങ്ങളിലെ ഏറ്റവും മികച്ച പ്രകടനവും നടത്തി.

ആദ്യമത്സരത്തിൽ പാക്കിസ്ഥാനെ 76 റൺസിന് തോൽപിച്ച് തുടങ്ങിയ നിലവിലെ ചാമ്പ്യൻമാരായ ഇന്ത്യ തോൽവിയറിയാതെ സെമിഫൈനൽ വരെയെത്തി. സെമിഫൈനലിൽ ഓസീസ് ആയിരുന്നു എതിരാളികൾ. സ്റ്റീവ് സമിത്തിൻറെ സെഞ്ച്വറിയുടെ കരുത്തിൽ 329 റൺസിന്റെ വമ്പൻ സ്ക്കോറാണ് ഓസീസ്  ഇന്ത്യക്ക് മുമ്പാകെ ഉയർത്തിയത്. എന്നാൽ സച്ചിനില്ലാതെ ആദ്യത്തെ ലോകകപ്പിനെത്തിയ ഇന്ത്യയുടെ പോരാട്ടത്തിൽ  നായകൻ ധോണി (65), ശിഖർ ധവാൻ (45), അജിങ്ക്യ രഹാനെ (44), രോഹിത് ശർമ്മ (34) എന്നിവരുടെ ചെറുത്ത് നിൽപ്പ് പക്ഷെ വിജയത്തിനുള്ള വകനൽകിയില്ല. ഫലം 95 റൺസിന് ഇന്ത്യയുടെ പടയോട്ടം ഓസീസ് അവസാനിപ്പിച്ചു. കഴിഞ്ഞ ലോകകപ്പിൻരെ ക്വാർട്ടറിൽ തങ്ങളെ പുറത്താക്കിയ ഇന്ത്യയ്ക്കുള്ള ഓസീസിൻറെ ശിക്ഷ.  രണ്ടാമത്തെ സെമിയിൽ, ലോകകപ്പ് ചരിത്രത്തിലെ ഏറ്റവും ത്രില്ലിങ്ങായ മറ്റൊരു സെമിയിൽ, ദക്ഷിണാഫ്രിക്കയെ മഴ നിയമപ്രകാരമാണ് ന്യൂസിലാൻറ് മറികടന്നത്. മഴ മൂലം 43 ഓവറാക്കി ചുരുക്കിയ മത്സരത്തിൽ ഫാഫ് ഡുപ്ലസിസഇൻറേയും (82) എ ബി ഡിവില്ലേഴ്സിൻറേയും (65) അർദ്ധ സെഞ്ച്വറികളുടെ സഹായത്താൽ 5-281 എന്ന കൂറ്റൻ സ്ക്കോറാണ് ദക്ഷിണാഫ്രിക്ക നേടിയത്. 38 ആം ഓവറിൽ ഡിവില്ലിയേഴ്സും ഡുപ്ലസിസും തല്ലി തകർത്തുനിൽക്കുമ്പോൾ പെയ്ത് മഴയെ തുടർന്ന് ന്യൂസിലാൻറിൻറെ വിജയലക്ഷ്യം 43 ഓവറിൽ 298 ആയി പുനർ നിർണയിച്ചു. നായകൻ ബ്രണ്ടൻ മക്കല്ലം മുന്നിൽ നിന്ന് നയിച്ചപ്പോൾ പിന്നാലെ വന്ന റോസ് ടെയിലറും കോറി ആൻഡേഴ്സണും ഗ്രാനറ് എലിയറ്റും ആതിഥേയരെ ചരിത്രത്തിൽ ആദ്യമായി സെമി കടമ്പ കടത്തി. അവസാന ഓവറുകളിൽ ദക്ഷിണാഫ്രിക്കൻ ബൌളർമാരെ തല്ലി വശം കെടുത്തിയ എലിയറ്റ് തൻറെ കരിയറിലെ തന്നെ ഏറ്റവും മികച്ച ഇന്നിംഗ്സാണ് കളിച്ചത്. എക്കാലത്തേയും പോലെ നിർഭാഗ്യമെന്ന ദുർഭൂതം ഇത്തവണയും ദക്ഷിണിഫ്രിക്കയെ വിഴുങ്ങി. 

ആതിഥേയരുടെ ഫൈനലിനാണ്  2015 ഉം സാക്ഷ്യം വഹിച്ചത്. മെൽബണിൽ പകലും രാത്രിയുമായി നടന്ന ഫൈനിൽ 93013 കാണികലെ സാക്ഷിയാക്കി ടോസ് നേടിയ ബ്രണ്ടൻ മക്കല്ലം ബാറ്റിങ് തിരഞ്ഞെടുത്തു. സെമിയിലെ പ്രകടനത്തിൻറെ ആത്മവിശ്വാസത്തിലായിരുന്നു മക്കല്ലത്തിൻറെ തിരഞ്ഞെടുപ്പ്. ഗ്രൂപ്പ് ഘട്ടത്തിൽ ഓസീസിനെ തോൽപിച്ച ഏക ടീമെന്ന മേൽക്കൈയ്യും കിവികൾക്കുണ്ടായിരുന്നു. എന്നാൽ ഒരിടവേളയ്ക്ക് ശേഷം വീണ്ടും ഫൈനലിലെത്തിയ ഓസീസിൻറെ ബൌളർമാർ കരുതിയായിരുന്നു. നേരിട്ട മൂന്നാം പന്തിൽ വമ്പനിടിക്കാരനായ ബ്രണ്ടൻ മക്കല്ലത്തിൻരെ സ്റ്റംപ്സ് സ്റ്റാർക്ക് പിഴുതെറിഞ്ഞു. മാർട്ടിൻ ഗുപ്തിലും വില്ല്യംസണും വൈകാതെ കൂടാരം കയറി. നാലാം വിക്കറ്റിൽ പക്ഷെ പരിചയ സമ്പന്നനായ മാർക്ക് ടെയിലറും സെമിയിലെ ഹീറോയായ എലിയറ്റും ചേർന്ന് രക്ഷാപ്രവർത്തനം ആരംഭിച്ചു. 111 റൺസ് ചേർത്താണ് സഖ്യം പിരിഞ്ഞത്. പിന്നീട് വന്നവരെല്ലാം വന്നതും പോയതും ആരുമറിഞ്ഞില്ല. ജെയിംസ് ഫോക്ക്നറും മിച്ചൽ ജോൺസണും സ്റ്റാർക്കും ചേർന്ന് ന്യൂസിലാൻറ് പടയെ 183 റൺസിന് പുറത്താക്കി. മറുപടി ബാറ്റിങ്ങിനിറങ്ങിയ ഓസീസിൻറെ ഓപ്പണർ ഫിഞ്ചിനെ സ്ക്കോർ ബോർഡിൽ ൊ റൺസ് മാത്രം നിൽക്കെ തൻറെ ആദ്യ ഓവറിൽ തന്നെ ട്രൻറ് ബോൾട്ട് പുറത്താക്കി ന്യൂസിലാൻറിന് ബ്രേക്ക് നൽകിയെങ്കിലും പക്ഷെ മുതലാക്കാനായില്ല. ഫിഫ്റ്റികൾ നേടി ക്യാപ്റ്റൻ മൈക്കൽ ക്ലാർക്കും (74) സ്റ്റീവ് സ്മിത്തും (പുറത്താകാതെ 56) ഡേവിഡ് വാർണറും (45) 16.5 ഓവർ ബാക്കി നിൽക്കെ ഓസീസിനെ 7 വിക്കറ്റിന് വിജയിപ്പിച്ച് അഞ്ചാംതവണയും ലോകജേതാക്കളാക്കി.  ഓസീസിനുവേണ്ടി 22 വിക്കറ്റ് വീഴ്ത്തിയ മിച്ചൽ സ്റ്റാർക്ക് ആ ലോകകപ്പിൻറെ താരമായി. 

ഇംഗ്ലണ്ട് 2019

1983 ന് ശേഷം ഇംഗ്ലണ്ട് ഒറ്റയ്ക്ക് ആതിഥേയത്വം വഹിച്ച ലോകകപ്പായിരുന്നു 2019 ലേത്. ലോകക്രിക്കറ്റിലെ പല അതികായനമാരും വിരമിച്ചശേഷം നടന്ന ലോകകപ്പിൽ യുവാക്കളുടെ പുതിയ നിരയാണ് പലടീമിലും നിരന്നത്. പത്ത് ടീമുകളാണ് ലോകകപ്പിനെത്തിയത്. ടൂർണമെൻറിൽ ഒറ്റ മത്സരം പോലും ജയിച്ചില്ലെന്ന നാണക്കേടിൻറെ റെക്കോർഡുമായാണ് അഫ്ഗാനിസ്ഥാൻ ഇംഗ്ലണ്ടിൽ നിന്ന് മടങ്ങിയത്.ഓസീസിനും ഇന്ത്യക്കും മേലെ  ഇംഗ്ലണ്ടിനും ന്യൂസിലാണ്ടിനും വാതുവെപ്പുകാരും കളിയെഴുത്തുകാരും സാധ്യതകൾ കൽപിക്കപ്പെട്ട ആദ്യലോകകപ്പും ഇതായിരുന്നു. 

വലിയ പരിക്കുകൾ ഒന്നുമില്ലാതെയാണ് ഇന്ത്യയും ഓസീസും  സെമിഫൈനൽ വരെ എത്തിയത്. ന്യൂസിലാൻറുമായുള്ള ഗ്രൂപ്പ് ഘട്ടത്തിലെ മത്സരം മഴമുലം ഉപേക്ഷിക്കേണ്ടി വന്ന ഇന്ത്യ  ഇംഗ്ലണ്ടിനോട് മാത്രമാണ് പരാജയമടഞ്ഞത്. സെമിയിൽ ന്യൂസിലാൻറുമായി ഏറ്റുമുട്ടിയ ഇന്ത്യ വിജയലക്ഷ്യമായ 239 ന് 18 റൺസ് അകലെ പോരാട്ടം അവസാനിപ്പിച്ചു. 77 റൺസെടുത്ത ജഡേജയും 50 റൺസെടുത്ത ധോണിയും മാത്രമാണ് വലിയ സംഭാവനകൾ ഇന്ത്യക്കായി നൽകിയത്. ഗുപ്തിലിൻറെ നേരിട്ടുള്ള ഏറിൽ ധോണി റൺ ഔട്ടായതാണ് കളിയിലെ വഴിതിരിവായത്. 72 പന്തിൽ നിന്ന് 50 റൺസെടുത്ത ധോണിയുടെ മെല്ലെ പോക്കും വിമർശനത്തിനിടയാക്കി. ന്യൂസിലാണ്ടിന് വേണ്ടി നായകൻ കെയിൻ വില്ല്യംസൺ 67 ഉം റോസ് ടെയിലർ 74 ഉം റൺസുമെടുത്തു. രണ്ടാം സെമിയിൽ ഇംഗ്ലണ്ടിനോട് പരാജയപ്പെടാനായിരുന്നു ഓസീസിൻറെ വിധി. ക്രിസ് വോക്സിൻറെ മികച്ച ബൌളിങ് പ്രകടനത്തിന് മുന്നിൽ ഓസീസ് ബാറ്റിഹ് നിര തകർന്നു. 85 റൺസെടുത്ത സ്മിത്തിനും 46 റൺസെടുത്ത അലക്ശ് കാരിക്കുമല്ലാതെ മറ്റാർക്കും ഇംഗ്ലീഷ് പടയെ ചെറുക്കാനായില്ല. ഓസ്ട്രേലിയ മുന്നോട്ടുവെച്ച 224 ൻറെ വിജയലക്ഷ്യം 33 ആമത്തെ ഓവറിൽ ഇംഗ്ലണ്ട് മരികടന്നു. അതും വെറും രണ്ട് വിക്കറ്റ് മാത്രം നഷ്ടപ്പെടുത്തി. ജെയ്സൺ റോയ് (85), ജോ റൂട്ട് (49 പുറത്താകാതെ) നായകൻ ഇയാൻ മോർഗൻ (45) എന്നിവരായിരുന്നു ആതിഥേയരുടെ വിജയശിൽപികൾ. 

തുടർച്ചയായ രണ്ടാംവട്ടവും ഫൈനലിലെത്തിയ ന്യൂസിലാൻറും രണ്ട് പതിറ്റാണ്ടുകൾക്ക് ശേഷം ഫൈനലിലെത്തിയ ഇംഗ്ലണ്ടിൻറേയും കലാശപോരാട്ടം കാണാൻ ക്രിക്കറ്റിൻറെ മെക്കയായ ലോഡ്സിലേക്ക് ഒഴുകിയെത്തിയവരെ ഒട്ടും നിരാശപ്പെടുത്തുന്നതായിരുന്നില്ല മത്സരം. ഏകപക്ഷീയമായ മത്സരങ്ങളെന്നതിൽ നിന്ന് തീർത്തും വ്യത്യസ്ഥമായിരുന്നു ലോഡ്സിലെ ഇത്തവണത്തെ ഫൈനൽ. ടോസ് നേടി ബാറ്റിങ് തിരഞ്ഞെടുത്ത കിവികൾക്ക് ആദ്യവിക്കറ്റ് ഏഴാം ഓവറിൽ നഷ്ടപ്പെട്ടെങ്കിലും രണ്ടാം വിക്കറ്റിൽ നായകൻ വില്ല്യംസണും ഹെൻറി നിക്കോൾസും ചേർന്ന് മികച്ച കൂട്ടുകെട്ടാണ് സമ്മാനിച്ചത്. രണ്ടാം വിക്കറ്റ് കൂട്ടുകെട്ടിനുശേഷം പക്ഷെ കാര്യമായി നിലയുറപ്പിക്കാൻ കിവി ബാറ്റർമാരെ ഇംഗ്ലണ്ട് അനുവദിച്ചില്ല. നിശ്ചിത ഓവറുകൾ അവസാനിച്ചപ്പോൾ 8 ന് 241 റൺസായിരുന്നു ന്യൂസിലാണ്ടിൻറെ സ്ക്കോർ ബോർഡിലുണ്ടായിരുന്നത്. 3 വീതം വിക്കറ്റ് വീഴ്ത്തിയ ക്രിസ് വോക്സും ലിയാം പ്ലൻകറ്റുമാണ് ന്യൂസിലാൻറിനെ പിടിച്ചുകെട്ടിയത്. അതേനാണയത്തിൽ തന്നെ തിരിച്ചടിച്ച ന്യൂസിലാണ്ട് ഇംഗ്ലണ്ടിൻറെ ആദ്യ 4 വിക്കറ്റുകൾ 86 റൺസ് ചേർക്കുന്നതിനിടെ വീഴ്ത്തി ശക്തമായ പ്രകടനം നടത്തി. പക്ഷെ അഞ്ചാം വിക്കറ്റിൽ ഒത്തുചേർന്ന ജോസ് ബട്ട്ലറും ബെൻ സ്റ്റോക്സും മത്സരം കിവികളുടെ കൊക്കിൽ നിന്ന് തട്ടിപറിച്ചെടുത്തു. ബട്ട്ലർ പുറത്തായശേഷം വന്നവരെ നിലയുറപ്പിക്കും മുമ്പേ കിവികൾ പുറത്താക്കി. അവസാനത്തെ 5 വിക്കറ്റുകൾ വെറും 45 റൺസിനാണ് കിവികൾ പിഴുതെടുത്തത്. പക്ഷെ അപ്പോഴും ഒരറ്റത്ത് സ്റ്റോക്സ് പാറപോലെ ഉറച്ചുനിന്നു. അവസാനത്തെ വിജയറണ്ണിനായി ഓടി രണ്ട് ബാറ്റ്സ്മാൻമാർ റൺ ഔട്ടായതോടെ മത്സരം ടൈയിലേക്ക്. വിജയികളെ നിശ്ചയിക്കാനായി  ലോകകപ്പ് ഫൈനലിൻറെ ചരിത്രത്തിലാദ്യമായി മത്സരം സൂപ്പർ ഓവറിലേക്ക് മത്സരം കടന്നു. 

സൂപ്പർ ഓവറിൽ ഇംഗ്ലണ്ടിനുവേണ്ടി ബെൻ സ്റ്റോക്സും ബട്ട്ലറും തന്നെ ട്രൻറ് ബോൾട്ടിനെതിരെ ബാറ്റ് വീശി. ആദ്യ പന്ത് നേരിട്ട സ്റ്റോക്സ് 3 റൺസ് അടിച്ചെടുത്തു. ആ ഓവറിൽ നിന്ന് രണ്ട് ഫോറുകൾ കൂടി അടിച്ചെടുത്ത സ്റ്റോക്സ് ഇംഗ്ലണ്ടിൻറെ സ്കോർ 15 ആക്കി. (3,1,4,1,2,4 എന്നായിരുന്നു സൂപ്പർ ഓവറിലെ ഓരോ പന്തിലേയും സ്ക്കോർ). മാർട്ടിൻ ഗുപ്തിലും ജിമ്മി നീഷാമിനേയും ചെയ്സിങ്ങിന് നിയോഗിച്ചപ്പോൾ ജഫ്രി ആർച്ചറിനെയാണ് പ്രതിരോധിക്കാൻ ഇംഗ്ലണ്ട് ചുമതലപ്പെടുത്തിയത്. ആദ്യ പന്ത് വൈഡ് എറിഞ്ഞുതുടങ്ങിയ ആർച്ചറിനെ രണ്ടാമത്തെ പന്തിൽ നീഷാം മിഡ് വിക്കറ്റിന് മുകളിലൂടെ സിക്സറിന് പറത്തി. ഇംഗ്ലണ്ട് സമ്മർദ്ദത്തിലുമായി. നാല് പന്തിൽ നിന്ന് 7 റൺസ് മാത്രം വേണ്ടിയിരുന്ന കിവികൾക്ക് വേണ്ടി അടുത്ത് 2 പന്തിലും രണ്ട് റൺസ് വീതവും  നീഷാം അടിച്ചെടുത്തു. അടുത്ത പന്തിൽ ഒരു റൺസ് എടുത്ത് സ്ട്രൈക്ക് ഗുപ്തിലിന് കൈമാറി. അവസാന പന്തിൽ 2 റൺസ് മാത്രം വേണ്ടിയിരുന്ന കിവി ബാറ്റർമാർ രണ്ടാം റൺസിനുവേണ്ടി ഓടിയെങ്കിലും ജെയസൺ റോയിയുടെ ഡീപ് മിഡ് വിക്കറ്റിൽ നിന്നുള്ള ത്രോയിൽ ഗുപ്തിലിനെ ബട്ലർ റൺ ഔട്ടാക്കി. അതോടെ സൂപ്പർ ഓവറും ടൈയിൽ കലാശിച്ചു. നഖം കടിച്ചുകൊണ്ട് മാത്രം കളികണ്ടിരുന്ന കാണികൾക്ക് വിശ്വസിക്കാനാവാത്ത ട്വിസ്റ്റുകളുടെ ഫൈനലായി മാറി ലോഡ്സിലേത്. അത്ലറ്റിക്സിലെ ഫോട്ടോ ഫിനീഷ് പോലെ സൂപ്പർ ഓവറും ടൈ ആയതോടെ നേടിയ ബൌണ്ടറികളുടെ എണ്ണത്തിൽ ജേതാക്കളെ തിരഞ്ഞെടുക്കുന്ന നിയമാവലി പ്രയോഗിക്കേണ്ടിവന്നു. കിവികളുടെ 17 ബൌണ്ടറികളേക്കാൾ 9 ബൌണ്ടറികൾ അധികം നേടിയ ഇംഗ്ലണ്ട് അങ്ങനെ ചരിത്രത്തിലാദ്യമായി ലോകകിരീടം ചൂടി. തുടർച്ചയായ രണ്ടാമതും മികച്ച പ്രകടനം നടത്തിയിട്ടും നിർഭഗ്യം കൊണ്ട് ന്യൂസിലാണ്ടിന് കിരീടം നഷ്ടമായി. ഇംഗ്ലണ്ടിനെ ത്രസിപ്പിക്കുന്ന ജയത്തിലേക്ക് നയിച്ച സ്റ്റോക്സ് കളിയുടെ താരമായി. 578 റൺസുമായി കിവികളുടെ പടയോട്ടത്തിന് ചുക്കാൻ പിടിച്ച കെയിൻ വില്ല്യംസൺ പന്ത്രണ്ടാമത് ലോകകപ്പിൻറെ താരമായി.

മിന്നു, വയനാടിൻറെ കറുത്ത പൊന്ന്

നുള്ളാൻ പ്രായമായ തേയിലകൾ വിളഞ്ഞുനിൽക്കുന്ന മാനന്തവാടിയിലെ ജെസി എസ്റ്റേറ്റിന് സമീപത്തെ ചോഴിമൂലയിൽ നിന്ന് താഴേക്കുള്ള ചെറിയ വഴി അവസാനിക്കുന്നത് പാടവരമ്പത്തെ വീട്ടിലാണ്. ടാറിട്ട റോഡ് അവസാനിക്കുന്നിടത്ത് നിന്ന് ഒരു ഇരുപതടി വീണ്ടും താഴേക്ക്  നടന്നാൽ ആ വീടെത്തി. ഇഴമുറിയാതെ പെയ്യുന്ന നൂൽ മഴയത്ത് വഴിയിൽ ചെളികെട്ടികിടക്കുന്നുണ്ട്. മുറ്റത്തേക്ക് ചെളിയിൽ ചവിട്ടാതെ വരാനായി കല്ലുകൾ പാകിയിരിക്കുന്നു. മലയാളികളെ എല്ലാം അഭിമാനത്തിൻറെ പടവുകൾ കയറ്റിയ മിന്നു മണിയെന്ന ഇരുപത്തിനാലുകാരിയുടെ വീടാണ് ഇത്. 2018 ലെ പ്രളയത്തിൽ നശിച്ചുപോയ ഈ വീട്  മിന്നു ക്രിക്കറ്റ് കളിച്ചാണ് പുതുക്കി പണിതത്. ഈ വീട്ടിലേക്ക് കഴിഞ്ഞ കുറച്ച് ദിവസങ്ങളായി അഭിനന്ദനങ്ങളുമായെത്തുന്ന സന്ദർശക പ്രവാഹമാണ്.

ഞങ്ങളെത്തുമ്പോൾ കൽപറ്റയിലെ സ്വീകരണത്തിന് പോകാനുള്ള ഒരുക്കത്തിലായിരുന്നു മിന്നു മണി. ഉച്ചകഴിഞ്ഞാണ് സ്വീകരണം. ഇടവിട്ടെത്തുന്ന മഴയിൽ നനഞ്ഞ മുറ്റത്തേക്ക് നോക്കി വീടിൻറെ കോലായിലിരുന്ന് മിന്നു പറഞ്ഞുതുടങ്ങി. തൻറെ ജീവിതം മാറ്റി മറിച്ച ആ ത്രോയെ കുറിച്ച്, കളവ് പറഞ്ഞ് വീട്ടിൽ നിന്ന് പരിശീലനത്തിനായി പോയിരുന്ന വാരാന്ത്യങ്ങളെ കുറിച്ച്, വീടിന് മുന്നിലെ പാടത്ത് നിന്ന് ബംഗ്ലാദേശിലെ സ്റ്റേഡിയം വരെ വളർന്ന ക്രിക്കറ്റ് ജീവിതത്തെ കുറിച്ച്, സ്വപ്നങ്ങളെ കുറിച്ച്....

പാടത്തെ സ്റ്റേഡിയം, ടീം മേറ്റ്സായി ആൺപിള്ളേർ

വീടിന് മുന്നിലെ പച്ചപ്പ് വിരിച്ചു കിടക്കുന്ന പാടം തന്നെയായിരുന്നു മിന്നുവിൻറെ ആദ്യത്തെ പിച്ച്. കൊയ്ത്തൊഴിഞ്ഞ പാടത്ത്  ആൺകുട്ടികൾ കളിക്കുന്നത് കണ്ടാണ് കുഞ്ഞുമിന്നുവും ക്രിക്കറ്റ് എന്നകളി ആദ്യം കണ്ടത്. പിന്നെ അവരടിക്കുന്ന പന്ത് എടുത്തുകൊടുക്കാലായി പണി. ടീമിൽ എണ്ണം തികയ്ക്കാനായി കോമൺ ഫീൽഡറായി തുടങ്ങി. പിന്നെ പന്തും ബാറ്റും കയ്യിലെടുത്തു.  സ്ക്കൂൾ വിട്ടുവന്നാൽ സ്ക്കൂൾ ബാഗ് കോലായിലേക്ക് വലിച്ചെറിഞ്ഞ് അമ്മയുടേയും അമ്മൂമയുടേയും കണ്ണ് വെട്ടിച്ച് ഒറ്റ ഓട്ടമാണ്, പാടത്തേക്ക്.

'അന്നൊക്കെ വല്ലാത്ത ആവേശമായിരുന്നു.. സ്ക്കൂൾ വിട്ടുവരുന്നതേ പാടത്തേക്ക് ഓടാനുള്ള തിരക്കായാണ്. നേരെ ബാഗ് വെച്ച് പാടത്തേക്ക് ഓടും. ചായ പോലും കുടിക്കാൻ നിക്കില്ല. പിന്നെ അച്ചൻ വടിയെടുത്ത് വരുമ്പോളാണ് തിരികെയുള്ള ഓട്ടം. അപ്പോഴേക്കും നേരം ആറര ഏഴെക്കെ ആയിട്ടുണ്ടാകും ... ദാ ഇതായിരുന്നു ഞങ്ങളുടെ പിച്ച്.'
മഴയൊന്ന് കുറഞ്ഞപ്പോൾ മുന്നിലെ പാടത്തേക്കിറങ്ങി മിന്നു തൻറെ ആദ്യ സ്പെല്ലിനെ കുറിച്ച് പറഞ്ഞുതുടങ്ങി.  

'ഈ ഏട്ടൻമാരും അനിയൻമാരുമെക്കെയായിരുന്നു കൂട്ട്. ശരിക്കും ഇവരാണ് പന്തെറിയാനും അടിക്കാനുമൊക്കെ പഠിപ്പിച്ചത്. ഇവരുടെ കൂടെ കുറേ ടൂർണമെൻറുകളൊക്കെ കളിക്കാൻ പോയിട്ടുണ്ട്. ഞങ്ങൾക്കിവിടെ ഒരു ക്ലബ് ഒക്കെയുണ്ട്. ഈയിടെ മാനന്തവാടിയിൽ ഒരു ടെന്നീസ് ബാൾ ടൂർണമെൻറിൽ ഞങ്ങൾ കപ്പടിച്ചു.'

'ഞങ്ങൾ ടീമിട്ട് കളിക്കുമ്പോൾ രണ്ട് ടീമിനും വേണ്ടിയുള്ള കോമൺ ഫീൽഡറായിരുന്നു. അന്നൊക്കെ അങ്ങനെ ബാറ്റ് ചെയ്യാനോ ബോള് ചെയ്യാനോ ഒന്നും ഞങ്ങള് കൊടുക്കില്ലാർന്നു. പക്ഷെ അവസരം കിട്ടിയപ്പോഴൊക്കെ അവളത് മുതലാക്കി. ഞങ്ങടെ കൂടെ മാച്ചൊക്കെ കളിക്കാനൊക്കെ വരും... അന്നവൾ അഞ്ചിലോ ആറിലോ ആയായിരുന്നു പഠിച്ചിരുന്നത്. പിന്നെ ഓളങ്ങ് വളർന്നില്ലേ... ' 
മിന്നുവിൻറെ പുതിയ ബാറ്റ് പരിശോധിക്കുന്നതിനിടെ പഴയ  ടീമേറ്റ് വിനീഷ് ഇടയിൽ കയറി പറഞ്ഞു.  

വീട്ടിൽ ഭയങ്കര എതിർപ്പായിരുന്നു മിന്നുമണി ക്രിക്കറ്റ് കളിക്കുന്നതിനോട്. അതും ആൺകുട്ടികളോടൊപ്പം കളിക്കുന്നത്. ആൺകുട്ടികൾക്കൊപ്പം ക്രിക്കറ്റ് കളിക്കാൻ പാടത്തേക്ക് ഓടുന്ന മിന്നുവിനെ പലകുറി അച്ചനും അമ്മയും വഴക്കുപറഞ്ഞു. വടിയുമെടുത്ത് അടിക്കാനോടിച്ചു. വീട്ടിലെ പണികളെല്ലാം ചെയ്തശേഷം ഒളിച്ചും പാത്തുമായിരുന്നു മിന്നു പലപ്പോഴും പാടത്തെ സ്റ്റേഡിയത്തിലേക്ക് ഓടിയത്.

സംസാരിച്ചുനിൽക്കെ തലയിൽ ഒരുകെട്ട് പുല്ലുമായി മിന്നുവിൻറെ അച്ചനെത്തി.

'പെൺകുട്ടികൾ വീട്ടിലെ കാര്യങ്ങൾ ഒക്കെ നോക്കി വളരണം എന്നാണ് ഞങ്ങടെയൊക്കെ കുട്ടി കാലത്ത് എല്ലാവരും പറയാറ്. ഇവളോടും ഞങ്ങൾ അങ്ങനെയായിരുന്നു. ആൺകുട്ടികൾക്കൊപ്പം പെൺകുട്ടികൾ കളിക്കുകയെന്നതൊന്നും ഞങ്ങടെയിവിടെയൊന്നും ചിന്തിക്കാനേ പറ്റുന്ന കാര്യമല്ല. അതുകൊണ്ടാണ് ഞങ്ങളെ പറ്റിച്ച് അവൾ കളിക്കാൻ പോയത്. പക്ഷെ ഇപ്പോൾ  ഞങ്ങൾക്ക് വല്ലാത്ത സന്തോഷമുണ്ട്. മിന്നുവിൻറെ  അച്ചനും അമ്മയുമെന്ന് ആളുകൾ പറയുന്നത് കേൾക്കുമ്പോൾ ഇപ്പോൾ വല്ലാത്ത സന്തോഷാണ്...'  

പശുവിന് പുല്ല് നൽകി തിരികെ നടക്കുന്നതിനിടെ അച്ചൻ മണി അഭിമാനത്തോടെ പറഞ്ഞു.


വഴിത്തിരിവായ ആ ത്രോ

എട്ടാം ക്ലാസിലെത്തിയപ്പോഴാണ് പെൺകുട്ടികൾക്കും ക്രിക്കറ്റ് ടീമൊക്കെയുണ്ട് എന്ന് മിന്നു ആദ്യമായി അറിഞ്ഞത്. മാനന്തവാടി ഗവണമെൻറ് സ്ക്കൂളിലെ ഗ്രൌണ്ടിന് സമീപത്ത് കൂടി ആൺകുട്ടികൾ ക്രിക്കറ്റ് കളിക്കുന്നത് നോക്കി നിൽക്കുമ്പോൾ തൻറെ നേരെ വന്ന പന്ത് എടുത്ത് തിരികെ എറിഞ്ഞുകൊടുത്തു മിന്നുമണി. ആ ഏറ് കണ്ട് യാദൃശ്ചികമായി കണ്ട് നിന്ന കായിക അദ്ധ്യാപിക എൽസമ്മ ബേബിയാണ് മിന്നുമിൻറെ കൈക്കരുത്ത് ആദ്യമായി തിരിച്ചറിഞ്ഞത്.  അത്ര പെർഫെക്ടായിരുന്നു വിക്കറ്റിന് നേരെയുള്ള ആ ത്രോ.  ക്രിക്കറ്റ് കളിക്കാൻ താൽപര്യമുണ്ടോയെന്ന് ടീച്ചർ ചോദിച്ച ആ നിമിഷം തന്നെ മിന്നു സമ്മതം മൂളി. ടീച്ചറോട് ഒറ്റ ചോദ്യമോ മിന്നു തിരിച്ച് ചോദിച്ചുള്ളു.

'അതിന് പെൺകുട്ടികളെ കളിക്കാൻ എടുക്കുമോ...?'
 
അന്നുമുതലാണ് മിന്നു മണി ക്രിക്കറ്റ് കളിക്കാരി മിന്നു മണിയായി മാറിയത്, സ്ക്കൂളിൽ മാത്രം.

കളവ് പറഞ്ഞ് കളിച്ച വാരാന്ത്യങ്ങൾ

മിന്നുവിൻറെ പരിശീലനത്തിന് പിന്നിൽ ഒരു വലിയ കള്ളത്തരത്തിൻറെ കഥയുണ്ട്.  

'എല്ലാ ശനിയാഴ്ച്ചയും ഞായറാഴ്ച്ചയും വീട്ടിൽ നിന്ന് ട്യൂഷനും സ്പെഷ്യൽ ക്ലാസുമുണ്ട് എന്ന് പറഞ്ഞ് അവൾ കാലത്തെ പോകും. കാലത്തെ വീട്ടിലെ ചെറിയ പണികളൊക്കെ ചെയ്തശേഷമാണ് മിന്നു പോകാറ്. പിന്നീട് ഒരു ദിവസം സ്ക്കൂളിലെ ടീച്ചർ വിളിച്ച് നാളെ മിന്നുവിനെ കാലത്തെ മാനന്തവാടി ബസ് സ്റ്റോപ്പിലെത്തിക്കണം എന്ന് പറഞ്ഞു. എന്താണ് കാര്യമെന്നൊന്നും അറിഞ്ഞില്ല. ടീച്ചറ് പറഞ്ഞതോണ്ട് കാലത്ത് തന്നെ അച്ചൻ മിന്നുമിനെ ബസ് സ്റ്റാൻറിൽ കൊണ്ടാക്കി. അവിടെ വെച്ചാണ് തലശ്ശേരിയിൽ സെലക്ഷന് പോകാനാണ് ബസ് സ്റ്റാൻറിലേക്ക് എത്തിക്കാൻ പറഞ്ഞത് എന്ന് അറിഞ്ഞത്. അപ്പോഴാണ് ട്യൂഷനെന്നും സ്പെഷൽ ക്ലാസെന്നും പറഞ്ഞ് മിന്നു എല്ലാ ആഴ്ച്ചയും പോയത് കളിക്കാനാണ് എന്ന് ഞങ്ങളറിയുന്നത്. എന്തായാലും പോയിട്ട് വരട്ടെയെന്ന് വെച്ചാണ് ബസ്സ് കയറ്റിവിട്ടത്. അപ്പോഴും ഞങ്ങൾക്ക് അത്രയ്ക്ക് സുഖായിട്ട് തോന്നിയില്ല ഈ കളിയൊക്കെ...'
അമ്മ പറഞ്ഞുനിർത്തുമ്പോൾ മിന്നുവിൻറെ മുഖത്ത് ഇപ്പോഴും കള്ളം പിടിക്കപ്പെട്ടതിൻറെ ചെറിയ ചമ്മൽ നിറയുന്നു.

കൈപിടിച്ച് ഷൈജു ചേട്ടൻ

തൊടുപുഴയിലെ ക്രിക്കറ്റ് അക്കാദമിയിലേക്ക് സെലക്ഷൻ കിട്ടിയതിൻറെ കടലാസുമായാണ് തലശ്ശേരിയിൽ നിന്ന് മിന്നു തിരിച്ച് വിട്ടീലെത്തിയത്. പക്ഷെ കളവ് പറഞ്ഞ് പരിശീലനത്തിന് എല്ലാ ആഴ്ച്ചയും ക്രിക്കറ്റ് കളിക്കാൻ പോയ മിന്നുവിനെ അക്കാദമിയിലേക്ക് വിടാൻ അച്ചനും അമ്മയും തയ്യാറായില്ല. അന്ന് മിന്നുവിന് പിന്തുണയുമായി എത്തിയത് കസിനായ ഷൈജുവേട്ടനാണ്. ഷൈജുവാണ് മിന്നുവിൻറെ രക്ഷിതാക്കളെ പറഞ്ഞ് സമ്മതിപ്പിച്ചത്. മിന്നുവിലെ ക്രിക്കറ്റ് താരത്തെ കുട്ടിക്കാലത്തെ പിന്തുണച്ചതും ഇതേ ഷൈജുവാണ്. പാടത്ത് ഫീൽഡറായി കളി ആരംഭിച്ചപ്പോൾ മുതൽ കൈപിടിച്ച് ഷൈജുവുണ്ടായിരുന്നു.  പാടത്തേക്ക് അടിക്കാനായി വടിയുമായി അച്ചനെത്തുമ്പോൾ രക്ഷിക്കാനും മഴക്കാലത്ത് വീട്ടുമുറ്റത്ത് പരിശീലിക്കാനും കൂട്ടുനിന്നതും ഷൈജുവേട്ടനാണ്. പന്ത് വാങ്ങാൻ വീട്ടിൽ നിന്ന് പൈസയൊന്നും കിട്ടാത്ത സമയത്ത്  തുണി ചുരുട്ടിയൊക്കെയായിരുന്നു ആദ്യകാലത്ത് പന്ത് ഉണ്ടാക്കി മുറ്റത്തെ പരിശീലനം. പിന്നീട് പലപ്പോഴും പന്ത് അടിച്ച് പാടത്ത് കളഞ്ഞ് പോകാൻ തുടങ്ങിയതോടെ  മരത്തിൽ പന്ത് നിർമിച്ച് കൊടുത്ത് ഷൈജു.

ഓൾ റൌണ്ടറിന് ഏറ്റവും ഇഷ്ടം ഫീൽഡ് ചെയ്യാൻ

ബോളുകൊണ്ട് ബംഗ്ലാദേശിൽ ചരിത്രമെഴുതിയ മിന്നുമണി കേരളത്തിന് വേണ്ടി അണ്ടർ 23 നാഷണൽ കപ്പിൽ ബാറ്റ് കൊണ്ടും തിളങ്ങിയതാരമാണ്. ചാമ്പ്യൻമാരായ കേരളത്തിന് വേണ്ടി മുന്നൂറിനടുത്ത് റൺസാണ് മിന്നുമണിയുടെ വില്ലോ ബാറ്റിൽ നിന്ന് പിറന്നത്. എന്നാൽ മൈതാനത്ത് പന്ത് കൊണ്ടോ ബാറ്റ് കൊണ്ടോ കളിക്കാനല്ല മിന്നുവിന് ഏറെയിഷ്ടം. ഫീൽഡ് ചെയ്യാനാണ്. വിക്കറ്റിലേക്ക് ലക്ഷ്യം തെറ്റാതെ എറിഞ്ഞുകൊള്ളിക്കുന്നതിലും വലിയ സന്തോഷം ഇതുവരേയും മിന്നുമിന് കളത്തിൽ നിന്ന് കിട്ടിയിട്ടില്ലത്രേ. മിന്നുവിൻറെ വേഗതത്തിലുള്ള, ശക്തിയേറിയ ത്രോ ബംഗ്ലാദേശുമായുള്ള അവസാന ട്വൻറി 20 മത്സരത്തിൽ ഏവരും കണ്ടതാണ്. 42 റൺസെടുത്ത ബംഗ്ലാദേശ് ഓപ്പണർ ഷമീമ സുൽത്താന പോയൻറിൽ നിന്നുള്ള  മിന്നുവിൻറെ കൃത്യതയാർന്ന ഏറിലാണ് പുറത്തായത്. ചടുലമായ വേഗവും അപാരശക്തിയുമാണ് ഫീൽഡിൽ മിന്നുവിൻറെ കരുത്ത്. ആദ്യ രണ്ട് മത്സരത്തിലും ഷമീമ സുൽത്താനയുടെ വിക്കറ്റ് എടുത്ത മിന്നു അങ്ങനെ എല്ലാമത്സരത്തിലും ഷമീമയുടെ അന്തകയായി.

ഗോത്രകരുത്ത്

വയനാടിൻറെ ഗോത്രപാരമ്പര്യവും കരുത്തും തന്നെയാണ് തൻറെ ശക്തിക്ക് പിന്നിലെന്ന് ഉറച്ചുവിശ്വസിക്കുന്നു കുറിച്ച്യ വിഭാഗത്തിൽ പെട്ട മിന്നു.

'മറ്റിടങ്ങളിലെ ആളുകളെ പോലെയല്ല ഞങ്ങൾ വയനാട്ടുകാർ. ഞങ്ങളെ തേടി ഒന്നും ഇങ്ങോട്ട് വരില്ല. ഞങ്ങൾക്ക് എന്ത് വേണമെങ്കിലും അങ്ങോട്ട് പോകണം. സാധനങ്ങൾ വാങ്ങാൻ കടയിലേക്കായാലും സ്ക്കൂളിലേക്കായാലുമെല്ലാം കുറേ ദൂരം നടന്ന് വേണം ഞങ്ങൾക്ക് ചെല്ലാൻ. സൌകര്യങ്ങൾ മറ്റ് നഗരങ്ങളിലേത് പെലെയല്ല. പിന്നെ കുട്ടിക്കാലം മുതലെ വീട്ടിലെ പണികൾക്കൊപ്പം തന്നെ പാടത്തും പറമ്പിലുമെല്ലാം ഞങ്ങൾ പണിക്ക് പോകാറുണ്ട്. പോരാത്തതിന് പ്രകൃതിയോടും പലപ്പോഴും ഫൈറ്റ് ചെയ്യേണ്ടിവരാറുണ്ട്. അത് ഞങ്ങൾക്ക് നൽകുന്ന മനക്കരത്തും ശാരീരികക്ഷമതയും ചില്ലറയല്ല. അത് തന്നെയാണ് വയനാട്ടിൽ നിന്ന് കൂടുതൽ താരങ്ങൾ ഉണ്ടാകുന്നതിൻറെ രഹസ്യവും.'

തൻറെ പോരാട്ടവീര്യത്തിൻറെ രഹസ്യം പറയുമ്പോൾ മിന്നുവിൻറെ മുഖത്തും ശരീരഭാഷയിലും പ്രൌഡമായ തൻറെ ഗോത്രപാരമ്പര്യത്തിൻറെ ഊർജ്ജം നിറയുന്നു.

ആദ്യ വിക്കറ്റ്

അരങ്ങേറ്റ മത്സരത്തിലെ ആദ്യഓവറിൽ തന്നെ വിക്കറ്റ് എന്നത് എല്ലാ ബോളർമാരുടേയും സ്വപ്നവും അപൂർവ്വം ചിലർക്ക് മാത്രം സാക്ഷാത്ക്കരിക്കാനുമായ ഒന്നാണ്. മിന്നു ധാക്കയിലെ സ്റ്റേഡിയത്തിൽ നേടിയത് അതാണ്. ആദ്യ പന്തിൽ സിംഗിൾ, രണ്ടാമത്തെ പന്ത് ബൌണ്ടറി ലൈനിനുമുകളിലൂടെ സിക്സ്, മൂന്നാമത്തെ പന്ത് ഫോർ... ബംഗ്ലാദേശിൻറ സ്റ്റാർ ഓപ്പണർ ഷമീമ സുൽത്താന അരങ്ങേറ്റക്കാരിയുടെ മാനസികമായി തളർത്തിയെന്ന് ഒരു വേള അഹങ്കരിച്ചതും  താനിതിനാണോ ഇത്രയും കാലം കഷ്ടപ്പെട്ടതെന്ന് ഏതൊരു ബൌളറും ചിന്തിച്ച് മാനസികമായി തളരുകുയും ചെയ്യുന്ന നിമിഷം. പക്ഷെ തുടക്കക്കാരിക്ക് പിന്തുണയുമായി ടീം മൊത്തം എത്തി. ഇതിനല്ല താൻ ഇവിടെ വന്നതെന്ന് മിന്നു മനസിൽ പലവട്ടം പറഞ്ഞു. ആ വിക്കറ്റ് തനിക്കുള്ളത് തന്നെയാണെന്ന് നായിക ഹർമൻപ്രീത് കൌറിൻറെ വാക്കുകൾ.  പിന്നാലെ ഫീൽഡിൽ ചെറിയ മാറ്റം വരുത്തി. സുൽത്താനയുടെ കണക്കുകൂട്ടൽ മൊത്തം തെറ്റിച്ച്, കൂടുതൽ കരുതലോടെ നാലാമത്തെ പന്ത് ഒന്നുകൂടെ കറക്കിയെറിഞ്ഞു. അടുത്ത ബൌണ്ടറി ലക്ഷ്യം വെച്ച് സ്വീപ്പ് ചെയ്ത സുൽത്താന പക്ഷെ ജെമീമ റോഡ്രിഗസിൻറെ കൈകളിൽ ഭദ്രം. ചരിത്രം കുറിച്ച മിന്നുവിനെ പൊതിഞ്ഞ് ഇന്ത്യൻ താരങ്ങളും.
കേരളത്തിൽ നിന്ന് ആദ്യമായി ഇന്ത്യൻ പുരുഷ ടീമിലെത്തിയ ടിനുയോഹന്നാനും  വനിത ടീമിലെത്തിയ മിന്നു മണിയും അങ്ങനെ മറ്റൊരു അപൂർവതയ്ക്കും അർഹരായി.

ഇന്ത്യൻ ടീമിലെ ഇഷ്ടതോഴി

ടീമിലെ പുതുമുഖമാണെന്ന് ഒരുസമയത്തും അനുഭവപ്പെട്ടില്ല. ടീമിലെ പലരുമായും മുമ്പ് ഒരേടീമിലും എതിർ ടീമിലുമായി ഗ്രൌണ്ടിലിറങ്ങിയിട്ടുള്ളവരാണ്. അകലെ നിന്നും അടുത്ത് നിന്നുമെല്ലാം ആരാധിച്ചിരുന്ന ഹർമൻപ്രീത് കൌർ, സ്മൃതി മന്ഥാന, ദീപ്തി ശർമ, തുടങ്ങിയവർക്കൊപ്പം ഡ്രസ്സിങ് റൂം പങ്കിടാനാവുന്നതിൻറെ സന്തോഷത്തിൽ ധാക്കയിലേക്ക് വിമാനം കയറുമ്പോഴും പരമ്പരയിലെ ഏതെങ്കിലുമൊരു മത്സരത്തിൽ കളിക്കാനാവുമെന്ന് മാത്രമായിരുന്നു വിദൂര പ്രതീക്ഷ. പക്ഷെ ആദ്യമത്സരത്തിൽ തന്നെ അന്തിമ ഇലവനിൽ ഇടം പിടിച്ചുവെന്നത് ഇപ്പോഴും മിന്നുവിന് വിശ്വസിക്കാനാവുന്നില്ല.

'രാവിലെ ടീം മീറ്റിങ്ങിൽ വെച്ചായിരുന്നു ഞാൻ അന്ന് കളിക്കുന്നകാര്യം കോച്ച് പ്രഖ്യാപിച്ചത്. എനിക്ക് വിശ്വസിക്കാനായില്ല. തിരികെ റൂമിൽ വന്നിട്ട് ഞാൻ ജെമിമയോടും ദേവിക വൈദ്യയോടൊക്കെ ചോദിച്ചു. ഞാൻ കേട്ടത് സത്യമാണോ ടീമിൽ ഉണ്ടെന്ന് തന്നെയാണോ പറഞ്ഞത് എന്ന്. അത്രക്ക് ആശ്ചര്യമായിരുന്നു. പിന്നീടാണ് വീട്ടിലേക്ക് അറിയിച്ചത് കളിക്കുന്നകാര്യം. പിന്നെ ഗ്രൌണ്ടിൽ എത്തിയപ്പോഴാണ് അറിഞ്ഞത് സ്മൃതി മന്ഥാനയാണ് ഡെബ്യൂട്ട് ക്യാപ്പ് തരുന്നതെന്ന്. അതും വലിയ എക്സൈറ്റ്മെൻറായിരുന്നു.'

സീനിയർ ജൂനിയർ വ്യത്യാസങ്ങളില്ലാതെ റൂമിലും ഡ്രെസ്സിങ് റൂമിലുമെല്ലാം തമാശപറഞ്ഞും പരസ്പരം കളിയാക്കിയും പ്രോത്സാഹിപ്പിച്ചുമൊക്കെ എല്ലാവരും നല്ല അടിപൊളി വൈബായിരുന്നു. അതിനാൽ തന്നെ ആദ്യമായി ടീമിലെത്തിയതിൻറെ ശങ്കയൊന്നും മിന്നുവിന് ഉണ്ടായില്ല.

'വൈദ്യയും യാസ്തികയും ജെമീമയുമായൊക്കെ പലപ്പോഴും ഡൊമസ്റ്റിക്ക് ക്രിക്കറ്റിലും പ്രീമിയർ ലീഗിലുമെല്ലാം ഒന്നിച്ച് കളിച്ചിട്ടുണ്ട്. അതുകൊണ്ട് തന്നെ അവരുമായെല്ലാം നല്ല സൌഹൃദം നേരത്തെയുണ്ട്. എന്നാൽ  ജെമീമയാണ് ടീമിലെ ഏറ്റവും അടുത്ത സുഹൃത്ത്. അന്നത്തെ സൌഹൃദം ദേശിയ ടീമിലെത്തിയപ്പോൾ കൂടുതൽ ദൃഢമായി. ജെമീമയുടെ ക്യാച്ചിലാണ് എൻറെ ആദ്യവിക്കറ്റും.'    

ആഭ്യന്തരക്രിക്കറ്റിലും സമത്വം

ടീമുകളിൽ പുരുഷടീമിനും വനിത ടീമിനും ഒരുപോലെ അവസരങ്ങളും അംഗീകാരങ്ങളും വേണമെന്ന അഭിപ്രായമാണ് മിന്നുവിനുള്ളത്.  

'പുരുഷ ടീമിന് കൂടുതൽ അവസരങ്ങളുണ്ട്. ട്വൻറി 20, 50 ഓവർ മത്സരങ്ങൾക്ക് പുറമെ ദ്വിദിനം, ത്രിദിനം, ചതുർദിനം എന്നിങ്ങനെ മത്സരങ്ങളുണ്ട്. എന്നാൽ വനിതാ ടീമിന് ആകെ ട്വൻറി 20, 50 ഓവർ മത്സരങ്ങൾ മാത്രമേയുള്ളു. ഇത് മാറി കൂടുതൽ അവസരങ്ങൾ വനിത ടീമുകൾക്കും ഉണ്ടാവേണ്ടതുണ്ട്.'

സമീപകാലത്താണ് വനിത താരങ്ങളുടെ പ്രതിഫലം കൂട്ടിയത്. അതിനൊപ്പം തന്നെ പുരുഷതാരങ്ങളുടെ പ്രതിഫലവും വർദ്ധിപ്പിച്ചു. ഐസിസി ചാമ്പ്യൻഷിപ്പുകളിൽ വനിതകൾക്കും പുരുഷൻമാർക്കും തുല്യമായ പ്രതിഫലം നടപ്പാക്കാനുള്ള തീരുമാനം കഴിഞ്ഞ മാസമാണ് അന്താരാഷ്ട്ര ക്രിക്കറ്റ് കൌൺസിൽ കൈക്കൊണ്ടത്. അതിനാൽ തന്നെ വൈകാതെ ഡൊമസ്റ്റിക്ക് മത്സരങ്ങളിലും മറ്റ് ടൂർണമെൻറുകളിലുമെല്ലാം തുല്ല്യ വേതനം നടപ്പാക്കപ്പെടുമെന്നാണ് മിന്നുവും പ്രതീക്ഷിക്കുന്നത്. ഇപ്പോൾ വനിത താരങ്ങളെ സ്പോൺസർ ചെയ്യാനും കമ്പനികൾ മുന്നോട്ട് വരുന്നുണ്ട് എന്നതും പൊസിറ്റീവ് ഘടകമാണെന്ന് മിന്നു പറയുന്നു.

'പണ്ട് ഷൂവാങ്ങാൻ കാശില്ലാതെ സീനിയർ താരങ്ങളുടെ പഴയ ഷൂ ഇട്ട് കളിക്കാനിറങ്ങിയിട്ടുണ്ട് ഞാനൊക്കെ. അതൊന്നും ഇനിവരുന്ന താരങ്ങൾക്ക് ഉണ്ടാവാതിരിക്കാൻ ഇതൊക്കെ സഹായിക്കും.' 

കുടുംബം, കുട്ടികൾ എന്നെല്ലാം പറഞ്ഞ് വനിത താരങ്ങൾ കളിക്കളം വിടുന്നതിനോട്  മിന്നുവിന് യോജിപ്പില്ല. അത്തരമൊരു ആലോചനയോ ആശങ്കയോ ഒന്നും തൻറെ കാര്യത്തിൽ ഇല്ലെന്ന് മിന്നു.

'കഴിഞ്ഞദിവസം പാക്കിസ്ഥാൻ താരം പതിനെട്ടാം വയസിൽ വിരമിച്ചതിൻറെ വാർത്ത ഇൻസ്റ്റഗ്രാമിൽ കണ്ടു. ഭയങ്കര ആശ്ചര്യം തോന്നി. അടുത്തൊരു പത്ത് വർഷമെങ്കിലും മികച്ച പ്രകടനം നടത്താൻ കഴിയുന്ന പ്രായമാണ്. അപ്പോഴാണ് മതത്തിൻറ പേരിൽ കളിവിടാൻ ആ താരം തീരുമാനിച്ചത്. എത്രകഷ്ടപ്പെട്ടിട്ടാവും ഒരു താരം ദേശിയ ടീമിലൊക്കെ എത്തിയിട്ടുണ്ടാവുക. ആ കഷ്ടപ്പാടൊക്കെ ഇങ്ങനെ അവസാനിക്കുന്നുവെന്നത് എന്ത് കഷ്ടമാണ്...'

കേരളത്തിൽ  വനിത ക്രിക്കറ്റിന് മുന്നിൽ വലിയ ഭാവിയുണ്ട്. വയനാട് നിന്ന് മാത്രം നിരവധി താരങ്ങളാണ് ഇപ്പോൾ സ്റ്റേറ്റിന് വേണ്ടി കളിക്കുന്നത്. ഇവരിൽ ചിലർ വനിത പ്രീമിയർ ലീഗിലെ ടീമുകളിൽ ഇതിനോടകം തന്നെ ഇടം കണ്ടെത്തിക്കഴിഞ്ഞു. അധികം വൈകാതെ വയനാട് നിന്ന് കൂടുതൽ ദേശിയ താരങ്ങൾ വരുമെന്ന് മിന്നുമണിക്ക് ഉറപ്പ്.


'ഇവർ എൻറെ ചിയർ ടീം' !!!

'ഇവരെ പറ്റിച്ചാണ് കളിച്ച് തുടങ്ങിയത്. പക്ഷെ ഇവരില്ലായിരുന്നേൽ ഞാൻ എവിടെയും എത്തില്ലായിരുന്നു. ഇവർ ആണ് എൻറെ ചിയർ ടീം.'

അമ്മയേയും അച്ചനേയും അനുജത്തി മിമിതയും അമ്മമ്മ ശ്രീദേവിയേയും ചേർത്ത് പിടിച്ച് മിന്നുമണി പറഞ്ഞു.

'ഇവളാണ് ക്രിക്കറ്റ് എന്ന കളി ഞങ്ങളെ പഠിപ്പിച്ച് തന്നത്. ഇപ്പോൾ ടിവിയിൽ കളിയൊക്കെ കാണും. മിന്നുവിൻറെ കളി മൊബൈലിൽ കണ്ടപ്പോൾ ശരിക്കും കണ്ണ് നിറഞ്ഞുപോയി. വല്ലാത്ത സന്തോഷമായിരുന്നു. അന്ന് മോളെ പാടത്ത് നിന്ന് വടിയെടുത്ത് ഓടിച്ചതൊക്കെ ഇപ്പോൾ ഓർക്കുമ്പോൾ ചിരിയും സങ്കടവും തോന്നും. അവളിത്രയും വളരുമെന്നൊന്നും കരുതിയില്ലാലോ..'
അച്ചൻ മണിയുടെ വാക്കുകളിൽ അഭിമാനം.

'വിവാഹം എന്നതൊക്കെ ഞങ്ങളുടെ ആഗ്രഹങ്ങളാണ്. പക്ഷെ അതുംപറഞ്ഞ് അവളുടെ അടുത്ത് പോകാൻ പറ്റില്ല. അവൾക്ക് കളിയാണ് ഇപ്പോഴത്തെ പ്രാധാന്യം. സമയമാവുമ്പോൾ അവൾ പറയാമെന്നാണ് പറഞ്ഞിട്ടുള്ളത്. അതാണ് ശരിയെന്നാണ് ഇപ്പോൾ ഞങ്ങൾക്കും തോന്നുന്നത്. ഇത്രയും അവൾ കഷ്ടപ്പെട്ട് നേടിയില്ലേ. സ്വന്തം കാലിൽ നിന്ന് സ്വപ്നങ്ങൾ യാഥാർത്ഥ്യമാക്കാൻ പെൺകുട്ടികൾക്കും അവകാശമുള്ളതല്ലേ...അവൾ കളിക്കട്ടെ...'

അമ്മ വസന്ത ഇത് പറയുമ്പോൾ മിന്നുവിൻറെ മുഖത്ത് സംതൃപ്തിയുടെ ഒരു ചിരി വിടർന്നു.

ലക്ഷ്യം ലോകകപ്പ്

ബംഗ്ലാദേശിലെ പ്രകടനം ഏഷ്യൻ ഗെയിംസിനുള്ള ഇന്ത്യൻ ടീമിലേക്കും മിന്നുമണിക്ക് ഇടം നേടിക്കൊടുത്തു. എന്നാൽ ട്വൻറി 20 ടീമിൽ നിന്ന് ഇന്ത്യൻ ഏകദിന ടീമിലേക്കുള്ള വിളിക്കായാണ് മിന്നുമണി കാത്തിരിക്കുന്നത്. രാജ്യത്തിന് വേണ്ടി ഏകദിന മത്സരങ്ങൾ കളിക്കണം. ലോകകപ്പ് കളിക്കണം, ലോകകപ്പ് വിജയിക്കണം. പറ്റുമെങ്കിൽ ഇന്ത്യക്കായി റെക്കോർഡുകൾ നേടണം. അതാണ് മനസിലുള്ള ഗോൾ. ബാക്കിയെല്ലാം പിന്നീട്....

ക്രിക്കറ്റിന് പുറത്ത് വലിയ ഹോബികൾ ഇപ്പോൾ മിന്നുവിന്നില്ല. പക്ഷെ കളികൾക്കിടയിലും പരിശീലനത്തിനിടയിലും മിന്നു അച്ചനൊപ്പം ചേരും.വിത്ത് വിതയ്ക്കാനും  വരമ്പൊരുക്കാനും പറമ്പിൽ കിളക്കാനുമൊക്കെ. പണ്ട് പാട്ട് പടിക്കാൻ മാനന്തവാടിയിൽ സംഗീതക്ലാസിന് ചേർന്ന ചരിത്രവുമുണ്ട് മിന്നുവിന്. പക്ഷെ, ഇപ്പോൾ വായുവിലൂടെ കറങ്ങിതിരിഞ്ഞുപോകുന്ന തുകൽ പന്തിൻറെ സംഗീതത്തോട് മാത്രമാണ് മിന്നുവിന് പ്രണയം.

യാത്രപറഞ്ഞിറങ്ങുമ്പോൾ പാടത്ത് വിതയ്ക്കാനായി തയ്യാറാക്കിയ നെൽവിത്ത് വേർത്തിരിച്ച് ചാക്കിൽ നിറക്കുന്ന അച്ചനെ സഹായിക്കാൻ മിന്നുവും ഒപ്പം കൂടി.  തുകൽ പന്തുകളെ  വായുവിലൂടെ മൂളിച്ച് പറപ്പിക്കുന്ന ആ വിരലുകൾ അതിസൂക്ഷമമായി തന്നെ വിത്ത് കേടാക്കാതിരിക്കാനായി നെല്ലിനൊപ്പം ചേർത്തിരിക്കുന്ന ഇലകളും വെളുത്തുള്ളിയും നീക്കം ചെയ്യുന്നു. 22 യാർഡ് പോലെ തന്നെ അന്നം വിളയുന്ന നെൽപാടവും ഈ ഇരുപത്തിനാലുകാരിക്ക് ജീവിതത്തിൻറെ ഭാഗമാണ്. 

....

(Published in 2023 August edition of  KOA Magazine Sports)

"വേണം സമത്വം ആഭ്യന്തരക്രിക്കറ്റിലും" : മിന്നുമണി

(ഇന്ത്യൻ ടീമിലെത്തിയ കേരളത്തിൽ നിന്നുള്ള ആദ്യ വനിത ക്രിക്കറ്റ് താരം മിന്നുമണിയുമായി നടത്തിയ പ്രത്യേക അഭിമുഖം)

.......

ആദ്യ പരമ്പരയിലെ ആദ്യമത്സരത്തിൽ തന്നെ ടീമിൽ. ആദ്യ ഓവറിൽ തന്നെ വിക്കറ്റ്. പരമ്പരയിലെ മുഴുവൻ മത്സരങ്ങളിലും വിക്കറ്റുകൾ. ആദ്യ പരമ്പരയിൽ തന്നെ ടീമിൽ ഏറ്റവും കൂടുതൽ വിക്കറ്റെടുത്ത ബൌളർ.....

സ്വപ്നതുല്ല്യമെന്ന് നിസംശ്ശയം വിശേഷിപ്പിക്കാവുന്ന തുടക്കം. ഒരുപിടി റെക്കോർഡുകളുടെ കൂടി തുടക്കമിട്ട ഈ കരിയറിനുടമ മിന്നു മണിയെന്ന വയനാടുകാരി പെൺകുട്ടിയാണ്.  അതെ, കേരളത്തിനുവേണ്ടി ക്രിക്കറ്റ് കളിച്ച് ഇന്ത്യൻ ടീമിലെത്തിയ ആദ്യത്തെ മലയാളി വനിത ക്രിക്കറ്റർ. 

(കേരളത്തിൽ നിന്ന് ഇന്ത്യൻ പുരുഷടീമിലെത്തിയ ആദ്യ മലയാളി താരമായ ടിനു യോഹന്നാനും ആദ്യ ഓവറിലെ നാലാമത്തെ പന്തിൽ തന്നെയാണ് വിക്കറ്റ് വീഴ്ത്തിയത് എന്നതും കൌതുകമാണ്.)

ബംഗ്ലാദേശിലെ ഇന്ത്യൻ ട്വി20 പരമ്പര വിജയത്തിൽ നിർണായക പങ്ക് വഹിച്ച മിന്നു മണി, ധാക്കയിൽ നിന്ന് തിരിച്ചെത്തിയത് മറ്റൊരു സന്തോഷവുമായാണ്. ഏഷ്യൻ ഗെയിംസിനുള്ള ഇന്ത്യൻ ടീമിലേക്ക് ഇടം നേടിയെന്ന സന്തോഷത്തിലേക്ക്.

........................

 ആദ്യ മത്സരത്തിൽ തന്നെ വിക്കറ്റ്. മറ്റൊരു ചരിത്രമാണ് അത്. ആദ്യ വിക്കറ്റിൻറെ സന്തോഷം എങ്ങനെ?

ആഗ്രഹിച്ചിരുന്നെങ്കിലും പ്രതീക്ഷിച്ചിരുന്നില്ല. ആദ്യത്തെ മൂന്ന് പന്തിൽ 11 റൺസ് വഴങ്ങിയപ്പോൾ തന്നെ ചെറിയ നിരാശപോലെ തോന്നി. പക്ഷെ ടീം ഒറ്റക്കെട്ടായി സപ്പോർട്ട് ചെയ്തു. ക്യാപ്റ്റർ ഹർമൻ പ്രീത് തന്നെ  അടുത്ത് വന്ന് പ്രോത്സാഹിപ്പിച്ചു. ആ സമയം എൻറെ മനസിലെ ചിന്ത ഇതിനല്ലാലോ ഞാൻ ഇത്രയും കഷ്ടപ്പെട്ട് ഇവിടെ വരെ എത്തിയത് എന്നായിരുന്നു. ഫീൽഡിൽ ചില മാറ്റങ്ങളൊക്കെ വരുത്തി. അത് ഗുണം ചെയ്തു. അടുത്ത പന്തിൽ തന്നെ വിക്കറ്റ്. സ്വപ്നതുല്യമായിരുന്നു അത്. സന്തോഷം പറഞ്ഞറിയിക്കാനാവാത്തതായിരുന്നു. ആ വിക്കറ്റ് ആത്മവിശ്വാസം കൂട്ടി. അങ്ങനെ അടുത്ത രണ്ട് ഓവറുകളും നന്നായി എറിയാനായി. ആ കളി നൽകിയ ആത്മവിശ്വാസം അടുത്ത രണ്ട് മത്സരത്തിലും പ്രകടനം മെച്ചപ്പെടുത്താനും സഹായിച്ചു.

രണ്ടാമത്തെ മത്സരത്തിൽ ശക്തമായ ബൌളിങ് പ്രകടനമായിരുന്നുവല്ലോ. ബംഗ്ലാദേശിൻറെ മുന്നേറ്റ നിരയെ തകർത്ത നാല് ഓവറുകൾ. 9 റൺസിന് 2 വിക്കറ്റ്. ബാറ്റിങ്ങിലും നേരിട്ട ആദ്യ പന്ത് തന്നെ ബൌണ്ടറി. പ്ലയർ ഓഫ് ദ മാച്ചിന് അർഹമായ പ്രകടനമായിരുന്നുവല്ലോ. കിട്ടാതെപോയതിൽ നിരാശയണ്ടോ?

നിരാശയില്ല. എൻറെ മികച്ച പ്രകടനം തന്നെ അന്ന് ടീമിന് നൽകാനായി എന്നതാണ് വലിയ സന്തോഷം. നാല് ഓവറിൽ വെറും 9 രൺസിന് 2 വിക്കറ്റ് എന്നത് ട്വൻറി 20 യിൽ വലിയ കാര്യമാണ്. അന്ന് ഇന്ത്യയുടെ ബാറ്റിങ് പരാജയപ്പെട്ടു. ചെറിയ സ്ക്കോർ ആയിരുന്നു നേടാനായത്. അത് പ്രതിരോധിക്കാൻ എൻറെ ബൌളിങ് സഹായിച്ചുവെന്നത് വല്ലാത സന്തോഷം നൽകുന്ന കാര്യമാണ്. 95 റൺസാണ് അന്ന് ർങ്ങൾക്ക് നേടാനായത്. ഏതൊരുടീമിനും വിജയിക്കാൻ പറ്റുന്ന നിസാരമായ സ്ക്കോറാണ് അത്. പക്ഷെ ആ മത്സരം 8 റൺസിന് ജയിക്കാനായത്  നന്നായി എല്ലാവരും പന്തെറിഞ്ഞത്കൊണ്ടാണ്. ദീപ്തി ശർമയാണ് ആ മത്സരത്തിൽ പ്ലയർ ഓഫ് ദ മാച്ച് ആയത്. ദീപ്തി അന്ന് 12 ന് 3 വിക്കറ്റ് എടുത്തു. അവസാനത്തെ ആ വിക്കറ്റ് എടുത്തതാണ് കളി വിജയിപ്പിച്ചത്. അത് തന്നെയാണ് നിർണായകമായതും. അതിനാൽ തന്നെ ദീപ്തിക്ക് അർഹതപ്പെട്ടത് തന്നെയാണ് അത്.

ആദ്യ ഓവറിൽ സിക്സും ഫോറും അടുത്തടുത്ത പന്തിൽ വഴങ്ങി. മാനസികമായി തളർന്നുവോ മിന്നു. ഏതൊരു കളിക്കാരനും ആദ്യത്തെ ഓവർ എന്നത് വലിയ സമ്മർദ്ദം ഉണ്ടാക്കുന്നതാണല്ലോ?

തീർച്ചയായും നല്ല സമ്മർദ്ദത്തോടെയാണ് എറിയാനെത്തിയത്. ബൌൾ ചെയ്യും എന്നറുപ്പായിരുന്നു. പക്ഷെ അതിത്ര നേരത്തെ ആകും എന്ന് പ്രതീക്ഷിച്ചില്ല. ആദ്യത്തെ മൂന്ന് പന്തിൽ നിന്ന് 1, 6, 4 എന്നിങ്ങനെ റൺസ് പോയപ്പോഴെ ചെറിയ നിരാശ വന്നു. പക്ഷെ അപ്പോഴും സമ്മർദ്ദം വലുതായി തോന്നിയില്ല. കാരണം ഞാൻ നേരത്തെ പറഞ്ഞല്ലോ ടീം മൊത്തം സപ്പോർട്ടായി കൂടെ നിന്നുവെന്ന്. സിക്സറിനും ഫോറിനും പറത്തി ഷമീമ സുൽത്താന മികച്ച പ്ലയറാണ്. ഹർമൻ പ്രീത് തന്നെ അടുത്ത് വന്ന് സുൽത്താനയുടെ വിക്കറ്റ് മിന്നുവിന് തന്നെയാണ് എന്ന് പ്രോത്സാഹിപ്പിച്ചു. ശരിക്കും അത് എൻറെ ആത്മവിശ്വാസം കൂട്ടി. അങ്ങനെ ഫീൽഡിൽ ചെറിയ മാറ്റം വരുത്തി. ജെമീമ റോഡ്രിഗസിനെ ഇന്നർ സർക്കിളിൽ കൊണ്ടുവന്നു. അൽപ്പം കൂടി ടേൺ കൊടുത്താണ് അടുത്ത പന്ത് എറിഞ്ഞത്. അത് ഗുണം കണ്ടു. സ്വീപ്പ് ചെയ്ത് ബൌണ്ടറിക്ക് ശ്രമിച്ച ഷെമീമ ജെമീമയുടെ കയ്യിലെത്തി. ഭയങ്കര റിലീഫായിരുന്നു അത്.

ആദ്യകളിയിലെ അന്തിമ ഇലവനിൽ ഉണ്ടാകും എന്ന് പ്രതീക്ഷിച്ചിരുന്നോ?

അറിഞ്ഞിരുന്നില്ല. തലേന്നാൾ നെറ്റ്സിലൊക്കെ പന്തെറിഞ്ഞിരുന്നു. അപ്പോഴും ആദ്യത്തെ മത്സരത്തിൽ തന്നെ ഉണ്ടാകും എന്ന് കരുതിയിട്ടില്ല. കളിയുടെ അന്ന് രാവിലെ ടീം മീറ്റിങ്ങിനിടെയാണ് കോച്ച് ഞാൻ കളിക്കുന്ന കാര്യം പറയുന്നത്. എനിക്ക് വിശ്വസിക്കാനായില്ല. തിരികെ റൂമിലെത്തിയശേഷം ഞാൻ ജെമീമയോടൊക്കെ പലകുറി ചോദിച്ചു. ഞാൻ ഉണ്ടെന്നാണോ പറഞ്ഞത് ഞാൻ കേട്ടത് തെറ്റിയോ എന്നൊക്കെ. അവരൊക്കെ ഉറപ്പിച്ച് പറഞ്ഞശേഷമാണ്  പിന്നെയാണ് വീട്ടിലറിയിച്ചത് കളിക്കുന്നുണ്ടെന്ന്. പിന്നെ ഗ്രൌണ്ടിലെത്തി ഡെബ്യൂട്ട് ക്യാപ്പ് വാങ്ങുമ്പോഴാണ് സത്യം പറഞ്ഞാൽ വിശ്വസിച്ചത്. സ്മൃതി മന്ദാന ക്യാപ്പ് തന്നത് തന്നെ മറ്റൊരു എക്സൈറ്റ്മെൻറായി.

എങ്ങനെയാണ് മിന്നു ക്രിക്കറ്റിലേക്ക് ആകർഷിക്കപ്പെട്ടത്?

ചെറുപ്പത്തിൽ ഈ പാടത്ത് (വീട്ടിന് മുന്നിലെ പാടത്തേക്ക് വിരൽ ചൂണ്ടി) ചേട്ടനമാരും അപ്പുറത്തെ ആൺകുട്ടികളൊക്കെ ക്രിക്കറ്റ് കളിക്കാറുണ്ടായിരുന്നു. ഞാനവിടെ ചുറ്റിപറ്റി നടന്ന് അവരടിക്കുന്ന പന്തൊക്കെ എടുത്ത് കൊടുക്കുമായിരുന്നു. അങ്ങനെ ടീമിൽ ആള് തികയാതെ വരുമ്പോൾ അവരെന്നെ ഫീൽഡ് ചെയ്യാനിറക്കും. രണ്ടു ടീമിനും കോമൺ ഫീൽഡറായിട്ട് കളിക്കാൻ തുടങ്ങി. ബാറ്റും ബോളുമൊന്നും തരില്ല. പക്ഷെ എനിക്ക് ഫീൽഡ് ചെയ്താൽ മതിയായിരുന്നു. അങ്ങനെയാണ് ഈ കളി കുടങ്ങിയത്. പിന്നെ അത് ആവേശമായി. സ്ക്കൂൾ വിട്ടാൽ നേരെ പാടത്തേക്ക് ഓടും. വീട്ടുകാരുടെ കണ്ണ് വെട്ടിച്ചായിരുന്നു എല്ലാം. അച്ചനും അമ്മയുമൊക്കെ പലകുറി വടിയെടുത്ത് അടിക്കാനായി വന്നിട്ടുണ്ട്. (മിന്നു ചിരിക്കുന്നു)

എന്തായിരുന്നു വീട്ടുകാരുടെ പ്രതികരണം?

ആൺകുട്ടികളുടെ കൂടെ കളിക്കുന്നത് വല്യേ പ്രശ്നായിരുന്നു. അങ്ങനെ പെൺകുട്ടികൾ ആൺകുട്ടികളുടെ കൂടെ കളിക്കുന്നത് നമ്മടെ സമൂഹത്തിൽ അംഗീകരിക്കില്ലാലോ. അതിപ്പോ ഏട്ടൻമാരുടെ കൂടെയായാലും അനുജൻമാരുടെ കൂടെയായാലും അങ്ങനെയാണ്. പെൺകുട്ടികൾ വീട്ടിലെ പണി നോക്കിയിരിക്കണം എന്നാണ്. അതോണ്ട് തന്നെ തല്ല് നല്ലോണം കിട്ടിയിട്ടുണ്ട്.

എന്നിട്ടും എങ്ങനെ ക്രിക്കറ്റ് അക്കാദമയിലൊക്കെ എത്തി

അത് വലിയ കഥയാണ്. സത്യത്തിൽ കള്ളം പറഞ്ഞാണ് കളിക്കാൻ പോയികൊണ്ടിരുന്നത്. സക്കൂളിലെ ഫിസിക്കൽ എഡ്യുക്കേഷൻ ടീച്ചറാണ് എ്നെ ക്രിക്കറ്റ് ടീമിലേക്ക് എടുത്തത്. അത് ഒരിക്കൽ ആൺപിള്ളേര് ക്രിക്കറ്റ് കളിക്കുന്നത് ഞാൻ നോക്കി നിൽക്കുവാരുന്നു. ഞാനവരുടെ ബാറ്റ് ഒക്കെ എടുത്ത് നോക്കുന്നൊക്കെയുണ്ടായിരുന്നു. ഇത് ടീച്ചർ ശ്രദ്ധിക്കുന്നുണ്ടായിരുന്നു. അങ്ങനെ നിൽക്കുമ്പോൾ അവരടിച്ച ഒരുപന്ത് എൻറെ നേരെ വന്നു. ഞാനത് എടുത്ത് തിരിച്ച് എറിഞ്ഞുകൊടുത്തു. ആ ത്രോ കണ്ടാണ് ടീച്ചറെന്നോട് കളിക്കാൻ താൽപര്യമുണ്ടോ എന്ന് ചോദിക്കുന്നത്. ഞാനപ്പോഴാണ് അറിയുന്നത് പെൺകുട്ടികൾക്ക് ക്രിക്കറ്റ് ടീം ഉണ്ടെന്നൊക്കെ. അങ്ങനെ ശനിയും ഞായറും ട്യൂഷനുണ്ടെന്നും സ്പെഷ്യൽ ക്ലാസുണ്ടെന്നുമൊക്കെ കള്ളം പറഞ്ഞ് ഞാൻ വീട്ടിൽ നിന്ന് പരിശീലനത്തിന് പോകാൻ തുടങ്ങി.

ഈ കള്ളം പിന്നെ എപ്പോഴാണ് വീട്ടിൽ പിടിച്ചത്.?

അത് ടീച്ചറൊരീസം വിളിച്ച് നാളെ കാലത്ത് മിന്നുവിനെ മാനന്തവാടി ബസ്റ്റാൻറിൽ കൊണ്ടാക്കണം എന്ന് അച്ചനെ വിളിച്ച് പറഞ്ഞു. എന്തിനാണെന്ന് അച്ചനും മനസിലായില്ല. ടീച്ചറ് പറഞ്ഞതല്ലേന്ന് കരുതി അച്ചൻ കാലത്തെ ബസ്റ്റാൻറിൽ കൊണ്ടുവന്നാക്കി. അപ്പോളാണ് അറിയുന്നത് തലശ്ശേരിയിൽ സെലക്ഷൻ ക്യാമ്പിന് പോകാനാണ് എന്ന്. ഞാനും അത് പേടിച്ചിട്ട്  എന്നോട് ചോദിച്ചപ്പോഴൊന്നും പറഞ്ഞിരുന്നില്ല. അന്ന് ദേഷ്യത്തോടെയാണേലും അത് വരെ വന്നില്ലെ പോയിട്ട് വരട്ടെ എന്ന് വച്ച് അച്ചന ബസ് കേറ്റിവിട്ടു. അങ്ങനെയാണ് വീട്ടിലറിഞ്ഞത്.  തൊടുപുഴയിലെ അക്കാദമിയിലേക്ക് സെലക്ഷൻ കിട്ടിയാണ് ഞാൻ തിരിച്ചു വന്നത്. അച്ചനും അമ്മയുമൊക്കെ വിടില്ലന്ന വാശിയിലിയാരുന്നു. ഞാനെന്ത് ചെയ്യുമെന്നറിയാതെ പോയി ഏട്ടനെ വിളിച്ചുകൊണ്ടുവന്നു. അച്ചൻറെ ഏട്ടൻറെ മോനാണ്. ഷൈജുവേട്ടനാണ് പണ്ടേ എനിക്ക് ക്രിക്കറ്റ് കളിക്കാനൊക്കെ കൂട്ട് നിന്നിരുന്നത്. അങ്ങനെ ഏട്ടന പറഞ്ഞാണ് ഒടുവിൽ വീട്ടികാര് സമ്മതിച്ചത്. ആ പോക്കാണ് കേരളടീമിലും പ്രീമയർ ലീഗിലും ഇപ്പോൾ നാൽണൽ ടീമിലൊക്കെ എത്തിച്ചത്.

പിന്നെ ഇങ്ങോട്ട് വീട്ടുകാരുടെ പൂർണ പിന്തുണകിട്ടി അല്ലേ.?

ഞാൻ ഒരുഘട്ടം എത്തിയശേഷമാണ് വീട്ടുകാരുടെ പൂർണ പിന്തുണയൊക്കെ കിട്ടിയത്. സത്യത്തിൽ അവർക്ക് ക്രിക്കറ്റിനെ കുറിച്ച് വലിയ അറിവൊന്നും ഇല്ലായിരുന്നു. പിന്നെ നമ്മുടെ ഈ നാട്ടിലൊക്കെ പെൺകുട്ടികൾ കളിക്കുകയെന്നത് അത്രയ്ക്ക് സ്വീകാര്യമായ കാര്യവുമല്ലല്ലോ. 

വയനാട് നിന്ന് ഇന്ത്യൻ ടീമിലേക്ക്. ആ യാത്ര അത്ര എളുപ്പമായിരുന്നിരിക്കില്ലെന്ന് ഉറപ്പാണ്.  എത്രമത്രം കഠിനമായിരുന്നു?

ഞങ്ങൾ വയനാടുകാർക്ക് അത്ര എളുപ്പമല്ല ഇതൊക്കെ നേടൽ എന്നത്. കഴിവില്ലാതെയല്ല അത്. സിറ്റിയിലേയോ മറ്റ് സ്ഥലങ്ങളിലേയോപോലെ അല്ല വയനാട്ടിലെ സാഹചര്യം. ഞങ്ങൾക്ക് എന്തെങ്കിലും വേണമെങ്കിൽ അങ്ങോട്ട് പോയി നേടണം. ഒന്നിനുമുള്ള വലിയ സൌകര്യങ്ങൾ ഇവിടെയില്ല. പരിശീലനത്തിന് വേണ്ട സൌകര്യങ്ങൾ, സാഹചര്യങ്ങൾ, ഗ്രൌണ്ടുകൾ ഒന്നും ഇവിടെ അധികമില്ല. ആകെയുള്ളത് കൃഷ്ണഗിരിയിലെ സ്റ്റേഡിയമാണ്. പിന്നെ ചില സ്ക്കൂളിൻറേയും കോളജിൻറേയും ഗ്രൌണ്ടുകൾ. അതൊക്കെ പക്ഷെ ലഭിക്കുകയെന്നത് തന്നെ വലിയ ബുദ്ധിമുട്ടാണ്. അതിനാൽ തന്നെ പരിശീലനത്തിന് കിലോമീറ്ററുകൾ സഞ്ചരിക്കണം.

ക്രിക്കറ്റ് നൽകിയ വലിയ സന്തോഷം എന്താണ് ഇപ്പോൾ ലഭിക്കുന്ന മാധ്യമശ്രദ്ധയാണോ അതോ ജനങ്ങൾ നൽകുന്ന സ്നേഹവും ആദരവുമാണോ?

എല്ലാവരും നൽകുന്ന സ്നേഹം തീർച്ചയായും സന്തോഷമാണ്. പക്ഷെ അതിനേക്കേൾ വലിയ സന്തോഷം 2018 ലെ പ്രളയത്തിൽ തകർന്ന വീട് പുതുക്കി പണിയാൻ എനിക്കായി എന്നതാണ്. ക്രിക്കറ്റ് കളിച്ച് നേടിയ പണം കൊണ്ടാണ് എനിക്കത് സാധിച്ചത്. അതിനേക്കാൾ വലിയ മറ്റെന്ത് സന്തോഷമാണ് ലഭിക്കാനുള്ളത്. കളിച്ച് ഒരുപക്ഷെ ഇനിയും പലതും നേടിയേക്കാം. എന്നാലും ഇതിനേക്കാൾ വലുതാകുമെന്ന് തോന്നുന്നില്ല

കേരളക്രിക്കറ്റിൻറെ ഭാവി എങ്ങനെയാണ് കാണുന്നത്. നിരവധി താരങ്ങൾ ഇപ്പോൾ കേരളത്തിൽ നിന്ന് മിന്നുവിന് പിന്നാലെ വുമൻ പ്രീമിയർ ലീഗിൽ എത്തിയല്ലോ?

കേരള വനിത ടീമിന് വലിയ ഭാവിയാണ് മുന്നിലുള്ളത്. കേരളത്തിലെ പുരുഷടീമിന് നേടാൻ ആകാത്ത ഒന്ന് നേടിയവരാണ് നമ്മുടെ പെൺകുട്ടികൾ. ദേശിയ കിരീടം. അണ്ടർ 23 കിരീടം നേടിയത് കേരള ക്രിക്കറ്റിലെ തന്നെ വലിയ നാഴികകല്ലാണ്. കേരളത്തിൽ നിന്ന് മൂന്ന് പേരാണ് പ്രീമിയർ ലീഗിൽ ഡൽഹി ക്യാപിറ്റൽസ്, ബാംഗ്ലൂർ റോയൽ ചലഞ്ചേഴ്സ് മുംബൈ ഇന്ത്യ തുടങ്ങിയ ടീമിലുള്ളത്. വയനാട്ടിൽ നിന്നാണ് ഇവരെല്ലാം എന്നതും ശ്രദ്ധേയമാണ്. സിറ്റികളിൽ നിന്ന് മാത്രമല്ല വയനാട് പോലുള്ള പിന്നാക്ക പ്രദേശങ്ങളിൽ നിന്നും താരങ്ങൾ ഉണ്ടാകുമെന്നതിൻരെ തെളിവാണ് അത്. വയനാട്ടി നിന്ന് മാത്രം 8 പേരാണ് സ്റ്റേറ്റ് ടീമിൽ കളിക്കുന്നത്. 

അങ്ങനെയിരിക്കുമ്പോഴും പുരുഷ ടീമിന് കിട്ടുന്ന അതേ പ്രാധാന്യവും പിന്തുണയും വനിതകൾക്ക് കിട്ടുന്നുണ്ടോ ?ക്രിക്കറ്റിൽ തുല്യത നടപ്പായിട്ടുണ്ടെന്ന് കരുതുന്നുണ്ടോ. പ്രത്യേകിച്ച് വേതനത്തിൽ?

ഉണ്ടെന്ന് പറയാനാവില്ല. കളിക്കാനുള്ള അവസരത്തിൽ പോലും വനിതകൾക്ക് പുരുഷൻമാരേക്കാൾ കുറവാണ്. പുരുഷൻമാർക്ക് ത്രിദിനം, ചതുർദിനം തുടങ്ങി മത്സരങ്ങൾ അധികമുണ്ട്. വനിതകൾക്ക് വെറും 20,50 ഓവർ മാച്ചുകൾ മാത്രമാണ്. ഞങ്ങളും ത്രിദിനമൊക്കെ കളിക്കാൻ ശേഷിയുള്ളവരാണ്. അതുപോലെ തന്നെ പ്രതിഫലവും. ഈയിടയ്ക്കാണ് വനിത താരങ്ങളുടെ പ്രതിഫലം ഉയർത്തിയത്. പക്ഷെ അപ്പോൾ പുരുഷതാരങ്ങളുടെ പ്രതിഫലവും അതിനനുസരിച്ച് തന്നെ ഉയർത്തി. ഭാവിയിൽ തുല്യത ഇതിൽ വരുമായിരിക്കും, പക്ഷെ കുറച്ച് സമയം എടുക്കും.

വിവാഹത്തോടെ ജോലി വിടുന്ന വനിതകൾ നമ്മുടെ നാട്ടിൽ നിരവധിയാണ്. സ്പോർട്സിൽ അത് പ്രത്യേകിച്ചു. ഇക്കാര്യത്തിൽ മിന്നുമണിയുടെ അഭിപ്രായം എന്താണ്?

എനിക്ക് ഒട്ടും അംഗീകരിക്കാനാവാത്ത ഒന്നാണ് അത്. എന്തിനാണ് പിന്നെ ഇത്രകഷ്ടപ്പെട്ട് ഇവരൊക്കെ ഒരു നിലയിൽ എത്തുന്നത് എന്ന് ഞാൻ ആലോചിക്കാറുണ്ട്. കഴിഞ്ഞ ദിവം പാക്കിസ്ഥാൻരെ പതിനെട്ട് വയസ്സുള്ള താരം കളി നിർത്തി വിരിച്ചു. മതപരമായ കാര്യമാണ് അവർ പറയുന്നത്. അടുത്ത ഒരു പത്ത് വർഷത്തേക്ക് കുറഞ്ഞത് മികച്ച ഫോമിൽ കളിക്കാൻ പറ്റും ആ കുട്ടിക്ക്. അത്രക്ക് ടാലൻറടാണ് ആ കുട്ടി. കുട്ടികൾ, കല്ല്യാണം, കുടുംബം എന്നൊക്കെ പറഞ്ഞ് കളം വിടാന എന്തായാലും ഞാനില്ല. അതിനല്ല ഞാനിത്രയും കഷ്ടപ്പെട്ട് ഇവിടെ വരെ എത്തിയത്. എനിക്ക് ഇനിയും മുന്നോട്ട് പോകാനുണ്ട്. ഇന്ത്യൻ ഏകദിന ടീമിൽ കളിക്കണം, ഇന്ത്യക്ക് വേണ്ടി ലോകകപ്പ് കളിക്കണം, അങ്ങനെ കുറേയേറെ ചെയ്യാനുണ്ട്. അതിനാണ് ഇപ്പോൾ ഞാൻ പ്രധാന്യം നൽകുന്നത്. 

......

ദേഷ്യപ്പെട്ട ഉമ്മൻ ചാണ്ടി, കരഞ്ഞ കുഞ്ഞൂഞ്ഞ്.... ഞാൻ കണ്ട ഒ.സി

പുതുപ്പള്ളിക്കാർക്ക് മാത്രമല്ല, കേരളത്തിനകത്തും പുറത്തുമുള്ള എല്ലാ മലയാളികൾക്കും ഉമ്മൻ ചാണ്ടി കുഞ്ഞൂഞ്ഞാണ്. മുഖ്യമന്ത്രിയായപ്പോഴും മന്ത്രിയായപ്പോഴും പ്രതിപക്ഷ നേതാവായപ്പോഴും വെറും എംഎൽഎ ആയപ്പോഴുമെല്ലാം അത് അങ്ങനെതന്നെ. സഭയിൽ ഏത് ബെഞ്ചിലിരിക്കുന്നുവെന്നത് ഉമ്മൻ ചാണ്ടിയെ ഒട്ടും ബാധിച്ചിരുന്നില്ല. എന്നും സാധാരണക്കാരിൽ സാധാരണക്കാരനായി മാത്രമേ കുഞ്ഞൂഞ്ഞ് ജീവിച്ചുള്ളു. അവർക്കിടയിൽ ആ രാഷ്ട്രീയക്കാരൻ വെറും മനുഷ്യനായി മാത്രം കഴിഞ്ഞു. മനുഷ്യനെ മനസിലാക്കുന്ന, മനുഷ്യൻറെ വ്യഥകൾ തിരിച്ചറിയുന്ന, അതിൽ ഉള്ളലിയുന്ന മനുഷ്യൻ.

പലതവണ ഉമ്മൻ ചാണ്ടിയെ നേരിൽ കണ്ടിട്ടുണ്ട്. സംസാരിച്ചിട്ടുണ്ട്. ചോദ്യങ്ങൾ ചോദിച്ചിട്ടുണ്ട്. പ്രകോപിപ്പിക്കാൻ ശ്രമിച്ചിട്ടുണ്ട്. വിമർശിച്ചിട്ടുണ്ട്. ഇവയിൽ നാല്  സന്ദർഭങ്ങൾ ഏറ്റവും പ്രിയങ്കരമായി തന്നെ മനസിൽ ഇപ്പോഴും ഉണ്ട്. 

1

പലതവണ വാർത്താസമ്മേളനങ്ങളിലും പൊതുപരിപാടികളിലുമെല്ലാം അദ്ദേഹത്തെ കണ്ടിട്ടുണ്ട്. അടുത്തുകൂടെ കടന്നുപോകുമ്പോൾ നോക്കി പുഞ്ചിരിച്ചിട്ടുണ്ട്. ബൈറ്റുകൾ എടുത്തിട്ടുണ്ട്.  പക്ഷെ ആദ്യമായി അദ്ദേഹവുമായി അടുത്ത് സംസാരിക്കാനും കുറച്ച് നേരം ചിലവഴിക്കാനുമായത് 2009 ലെ ലോക്സഭ തിരഞ്ഞെടുപ്പ് കാലത്താണ്.  അന്ന് ഏഷ്യാനെറ്റ് ന്യൂസിൻറെ കൊച്ചി റിപ്പോർട്ടറാണ് ഞാൻ. കോട്ടയത്തെ അന്നത്തെ റിപ്പോർട്ടർ ലല്ലു വിവാഹത്തെ തുടർന്ന് അവധിയിൽ പോയതോടെ  എന്നെയാണ് പകരക്കാരനായി രണ്ടാഴ്ച്ചത്തെ ഡെപ്യൂട്ടേഷനിൽ കോട്ടയത്തേക്ക് അയച്ചത്. അന്ന് പ്രതിപക്ഷ നേതാവായ ഉമ്മൻ ചാണ്ടി ആ വാരാന്ത്യത്തിൽ കോട്ടയത്തെ പുതുപ്പള്ളിയിലെ തറവാട് വീട്ടിലെത്തുന്നുണ്ട്. ശനിയാഴ്ച്ച രാവിലെ 7മണിക്ക് തന്നെ ഞാനും ക്യമറാമാനായ റെജി ചേട്ടനും കൂടി പുതുപ്പള്ളിയിലെ വീട്ടിലേക്ക് വിട്ടു. അവിടെ കാലത്ത് തന്നെ  വീട്ടുമുറ്റത്ത് ഒരു കല്ല്യണത്തിനുള്ള ആളുണ്ട്. ഞങ്ങൾ ചെല്ലുമ്പോൾ ഒരു കൈലിയുമുടുത്ത് ബനിയനുമിട്ട് ആ ആൾക്കൂട്ടത്തിനിടയിൽ നിൽപ്പുണ്ട് പുതുപ്പള്ളിയുടെ സ്വന്തം കുഞ്ഞൂഞ്ഞ്. കണ്ണട നെറ്റിയിൽ, ഒരു കയ്യിൽ ആരോ നൽകിയ നിവേദനം,മറ്റേ കയ്യിൽ ഒരു ഗ്ലാസ്. ചായയോ വെള്ളമോ എന്തായിരുന്നെന്ന് ഓർമയില്ല. ചുറ്റിലും സാധാരണക്കാരായ, പ്രായമേറിയ, ആളുകൾ. പിന്നെ പ്രാദേശിക നേതാക്കളും. പിരികം കയറ്റിവെച്ച അതീവ ശ്രദ്ധയോടെയാണ് എല്ലാവരും പറയുന്നത് കുഞ്ഞൂഞ്ഞ് കേൾക്കുന്നത്. വരുന്നവരോചടെല്ലാം ഇരിക്കാനും അവർക്കെല്ലാം ചായയോ വെള്ളമോ കൊടുക്ക് എന്ന് പേഴ്സണൽ സ്റ്റാഫിലുണ്ടായിരുന്ന ജിക്കുവിനോട് ഇടയ്ക്ക് നിർദേശിക്കുകയും ചെയ്യുന്നുണ്ട്. ഒരു മണിക്കൂറിലേറെ മാറി നിന്ന് പ്രതിപക്ഷ നേതാവിൻറെ പ്രഭാതത്തെ നോക്കി കണ്ടു. ആ ആൾക്കൂട്ടത്തിൻറെ ഇടയിൽ നിന്ന് തന്നെ ജിക്കു നൽകിയ ഷർട്ട് ഇട്ടു. അതിടുമ്പോഴും ശ്രദ്ധ നിവേദനങ്ങളിലും പരാതികൾ കേൾക്കുന്നതിലും തന്നെ. പിന്നെയും അരമണിക്കൂറിലെറെ ആ നിൽപ്പിൽ തന്നെ പരാിതകൾ കേട്ടു. പലരേയും ഫോണിൽ വിളിച്ച് നിർദേശങ്ങൾ നൽകി. അതിനിടയിൽ ജിക്കു ചെവിയിൽ ഞങ്ങൾ മണിക്കൂറുകളോളമായി കാണാൻ കാത്തുനിൽക്കുന്നുവെന്ന് ചെവിയിൽ പോയി പറഞ്ഞു. ചെറിയ പരിഭവചിരിയോടെ ഞങ്ങളെ കൈകാണിച്ച് വിളിച്ചു 

'എന്തിലാ പ്രതികരണം വേണ്ടത്.? ചോദിച്ചോളു' എന്നായി. 

'അല്ല, ഞങ്ങൾ വെയിറ്റ് ചെയ്തോളാം. വലിയ തിരക്കില്ലാത്ത ദിവസമാണ്. ഇലക്ഷനല്ലേ പ്രതിപക്ഷ നേതാവിൻറെ തിരഞ്ഞെടുപ്പ് പ്രചാരണം സ്റ്റോറി എടുത്തേക്കാമെന്ന് കരുതി വന്നതാണ്.' 

'എന്താവേണ്ടത് ?'

'ഇന്നെവിടെയെങ്കിലും പ്രചാരണത്തിന് പോകുന്നുണ്ടോ?'

'ഞാനോ...ഇന്ന് മാത്രേ ഇവിടെയുള്ളു. പിന്നെ തിരക്കാണ്. അടുത്ത വീട്ടിലൊക്കെ ഒന്നു പോകണമെന്നാണ് ഉദ്ദേശിക്കുന്നത്. മാണിസാറിൻറെ മോനാദ്യായല്ലേ ഇവിടെ...'

പിന്നെയും പരാതികളുടെ ഇടയിലേക്ക്. പിന്നെയും സമയം കടന്നുപോയി. പത്ത് മിനുട്ടിനുള്ളിൽ സാറിറങ്ങുമെന്ന് ജിക്കുവന്ന് പറഞ്ഞു. അടുത്ത് വീടുകളിലൊന്ന് സന്ദർശിക്കും. എന്നിട്ട് കോട്ടയത്ത് യുഡിഎഫ് യോഗത്തിനു ശേഷം തിരുവനന്തപുരത്തേക്ക് പോകും. അതാണ് പരിപാടി

വെള്ളമുണ്ടും വെള്ളഷർട്ടും ധരിച്ച് പുതുപ്പള്ളിയുടെ കുഞ്ഞൂഞ്ഞ് അൽപ്പം കഴിഞ്ഞപ്പോൾ ഇറങ്ങി വന്നു. ജിക്കുവിൻറെ കയ്യിൽ അന്ന് കിട്ടിയ നിവേദനങ്ങളെല്ലാം കാറിലേക്ക് എടുത്തുവെക്കാനായി നിർദേശിച്ച് കൊടുത്തു.

'എന്നാ പോയാലോ...?' 

അണികളെ നോക്കി പറഞ്ഞ് അടുത്ത വീട്ടിലേക്ക് നടന്നു ഉമ്മൻ ചാണ്ടി. കുറച്ച് ഉയർന്ന പ്രദേശത്താണ് വീട്.  നടത്തത്തിനിടെ അടുത്തേക്ക് വിളിച്ചു സംസാരിച്ചു. കൈപിടിച്ച് നടക്കുമ്പോൾ എന്താ പേര് ...എവിടെയാ നാട്....  അങ്ങനെ വിശേഷങ്ങൾ ചോദിച്ചറിഞ്ഞു. പൊന്നാനി മണ്ഡലത്തിൽ തിരഞ്ഞെടുപ്പ് പ്രചാരണത്തിനായ എൻറെ നാട്ടിൽ വന്നിട്ടുള്ളകാര്യമൊക്കെ പങ്കുവെച്ചു. മലപ്പുറത്ത് ലീഗിനേക്കാൾ ശക്തി നമുക്കുള്ള ചുരുക്കം മണ്ഡലങ്ങളിൽ ഒന്നാണ് പൊന്നാനിയെന്നും എന്നാലത് ഐ ൻറെ മണ്ഡലമാണെന്നും സ്വതസിദ്ധമായ ചിരിയോടെ എ ക്കാരനായ ഉമ്മൻ ചാണ്ടി..

അടുത്ത വീട്ടിനകത്തേക്ക് വീട്ടുകാരുടെ പേര് വിളിച്ചാണ് കുഞ്ഞൂഞ്ഞ് കയറിചെന്നത്. രണ്ട് മിനുട്ടിൽ ആരോഗ്യകാര്യങ്ങളും മക്കളുടെ വിശേഷങ്ങളും മറ്റും തിരക്കി തിരഞ്ഞെടുപ്പ് നോട്ടീസ് ഉമ്മൻ ചാണ്ടി തന്നെ വീട്ടുകാർക്ക് നൽകി.

'കുഞ്ഞൂഞ്ഞ് ഇതിനായി ഇങ്ങോട്ട് കയറ്റവും കേറി വരേണ്ടതുണ്ടോ..ഞങ്ങൾക്കറിഞ്ഞൂടെ ഇതൊക്കെ...'

ഉമ്മൻ ചാണ്ടിയേക്കാൾ കുറഞ്ഞത് പത്ത് വയസെങ്കിലും പ്രായത്തിന് ഇളപ്പമുണ്ട് ആ അയൽവാസിക്ക്. അവർക്ക് പോലും ഉമ്മൻ ചാണ്ടിയെ കുഞ്ഞൂഞ്ഞ് എന്ന് വിളിക്കാനുള്ള സ്വാതന്ത്ര്യം. 

പലപ്പോഴും പല എംഎ.എ മാരേയും സാറെന്ന് മാത്രം വിശേഷിപ്പിക്കുന്നത്, (ചിലർ വിളിപ്പിക്കുന്നത്) കാണുമ്പോഴെല്ലാം ആ രംഗം ഓർമയിലെത്തു. 

2

മന്ത്രി കെ ബാബു ബാർക്കോഴ കേസിൽപെട്ട് രാജിവെക്കുമോ ഇല്ലയോ എന്ന് മാധ്യമങ്ങൾ ചർച്ചചെയ്യുമ്പോളാണ്. കെ ബാബുവിനെ പിന്തുണയുമായി ഏ ഗ്രൂപ്പ് നേതാക്കൾ അന്ന് കൊച്ചിയിൽ സംഘടിച്ചിരുന്നു. അന്ന് വൈകുന്നേരം മുഖ്യമന്ത്രിയായ ഉമ്മൻ ചാണ്ടി നെടുമ്പാശ്ശേരി വിമാനത്താവളത്തിലെത്തുന്നുണ്ട്. എ ഗ്രൂപ്പ് ബാബുവിനെ സംരക്ഷിക്കാനായി യോഗം വിളിച്ചതായും റിപ്പോർട്ടുകൾ പരന്നിരുന്നു. വൈകുന്നേരം അഞ്ചോടെ മാധ്യമസംഘം വിമാനത്താവളത്തിലെ ഡൊമസ്റ്റിക്ക് ഡിപാർച്ചർ ഗെയിറ്റിന് മുന്നിൽ തമ്പടിച്ചു. മീഡിയ വണ്ണിൻറെ റിപ്പോർട്ടറായിരുന്നു ഞാനന്ന്. നേരം ഇരുട്ടിതുടങ്ങി. ആറ് മണിയോടെ മന്ത്രി കെ സി ജോസഫ് വിമാനത്താവളത്തിലെത്തി. അതിനുശേഷം എ ഗ്രൂപ്പ് മന്ത്രിമാരും എംഎൽഎമാരുമെല്ലാം ഓരോരുത്തരായി എത്തിതുടങ്ങി. ആരുടേയും മുഖത്ത് വെളിച്ചമില്ല, പ്രതികരിക്കുന്നുമില്ല. ആറരയോടെ മുഖ്യമന്ത്രിയുടെ പൈലറ്റ് വാഹനം പാഞ്ഞെത്തി. കനത്ത പൊലീസ് സുരക്ഷയായിരുന്നു വിമാനത്താവളത്തിലും റോഡിലുമെല്ലാം. പലയിടത്തും പ്രതിഷേധങ്ങൾ ശക്തമായിരുന്നു. വണ്ടിയിൽ നിന്നിറങ്ങിയ മുഖ്യമന്ത്രി ചോദ്യങ്ങളോട് പിന്നെ മറുപടി എന്നുപറഞ്ഞ് വിഐപി ലോഞ്ചിലേക്ക് പോയി. അവിടെ നേതാക്കളുമായി ആശയവിനിമയം. അപ്പോഴേക്കും ബാബുവിനായി എ ഗ്രൂപ്പ് യോഗം എന്ന ബ്രേക്കിങ്ങുകൾ ചാനലുകളിൽ പ്രത്യക്ഷപ്പെട്ടുതുടങ്ങി. പതിനഞ്ച് മിനുട്ടിനുശേഷം മന്ത്രിമാരും നേതാക്കളുമെല്ലാം പുറത്തുവന്നു. മാധ്യമപ്രവർത്തകർ മൈക്കുമായി മുഖ്യമന്ത്രിയെ വളഞ്ഞു. അണികളുടെ തിരക്കിനിടയിൽ പലഭാഗത്തുനിന്നായി മുഖ്യമന്ത്രിക്ക് നേരെ ചോദ്യങ്ങൾ. 'കാര്യങ്ങൾ വിശദമായി ചർച്ചചെയ്യും. രാഷ്ട്രീയപ്രേതിരമാണ് ആരോപണമെന്നായിരുന്നു' മുഖ്യമന്ത്രിയുടെ പ്രതികരണം. ഉമ്മൻ ചാണ്ടിയടെ  നേരെ മുന്നിൽ നിന്ന ഞാൻ വീണ്ടും ചോദിച്ചു

'അഴിമതി ആരോപണവിധേയനായ ആളെ സംരക്ഷിക്കുമോ?'

'നിയമം നിയമത്തിൻറെ വഴിക്ക് പോകു'മെന്ന സ്ഥിരം മറുപടി

'കെ ബാബുവിനെ സംരക്ഷിക്കലാണോ സർക്കാരിൻറെ നിയമത്തിൻറെ വഴിയെന്ന്' ഞാൻ ചോദ്യം വീണ്ടും

ഉമ്മൻ ചാണ്ടിയുടെ നിലതെറ്റുന്നപോലെ. പതിവ് പുഞ്ചിരി മായുന്നു

'രാജി മുഖ്യമന്ത്രി ആവശ്യപ്പെടുമോ'?

'ഞാനല്ലേടോ' പറഞ്ഞത് എന്ന് ശബ്ദമുയർത്തി ഉമ്മൻ ചാണ്ടി രൂക്ഷമായി എന്നെ നോക്കി. എന്നിട്ട്  ദേഷ്യത്തോടെ നാവുകടിച്ച് നോക്കി നിന്നു.

അപ്പോഴേക്കും അദ്ദേഹത്തിൻറെ അംഗരക്ഷകരായ പൊലീസും കെ സി ജോസഫും ചേർന്ന് അദ്ദേഹത്തെ കൂട്ടിക്കൊണ്ടുപോയി. 

ആദ്യമായാണ് ഉമ്മൻ ചാണ്ടിയെ അങ്ങനെ ഒരു ഭാവത്തിൽ കാണുന്നത്. ആരും അത്തരമൊരുഭാവത്തിൽ അദ്ദേഹത്തെ കണ്ടിട്ടുള്ളതായി പറഞ്ഞ് കേട്ടിട്ടുമില്ല.

'ചോദ്യങ്ങളോട് ദേഷ്യപ്പെട്ട് ഉമ്മൻചാണ്ടി'യെന്ന് ബ്രേക്കിങ് അന്നായിരിക്കണം ഒരുപക്ഷെ ചാനലുകളിൽ ആദ്യമായും അവസാനമായും തെളിഞ്ഞത്.

3

2017-18 കാലഘട്ടത്തിലാണ് പിന്നീട് അദ്ദേഹത്തെ അടുത്ത് കണ്ട് വ്യക്തിപരമായി സംസാരിക്കാനുള്ല അവസരം ലഭിച്ചത്. മീഡിയ വണ്ണിൻറെ ഡൽഹി ബ്യൂറോ ചീഫായിരുന്ന സമയത്ത്  കേരളഹൌസിലെ മുറിയിൽ വെച്ചായിരുന്നു ആ കൂടിക്കാഴ്ച്ച. ആന്ധ്രപ്രദേശിൻറെ ചുമതലയുള്ള എഐസിസി ജനറൽ സെക്രട്ടരിയായി ഉമ്മൻ ചാണ്ടിയെ നിയോഗിച്ചതിന് ശേഷമുള്ള അദ്ദേഹത്തിൻറെ ആദ്യ ഡൽഹി സന്ദർശനമായിരുന്നു അത്.  സുഹൃത്തും ഇപ്പോഴത്തെ ചാലക്കുടി എംഎൽഎ യുമായ സനീഷ് തോമസാണ് കൂടിക്കാഴ്ച്ചയ്ക്ക് വഴിവെച്ചത്. ഉച്ചയ്ക്ക് കേരള ഹൌസിലെ ഗസ്റ്റ് ഹൌസിൽ നിന്ന് ഭക്ഷണം കഴിച്ച് പുറത്തിറങ്ങുമ്പോളാണ് സനീഷിനെ കണ്ടത്. 

'ഉമ്മൻ ചാണ്ടി സാർ റൂമിൽ വിശ്രമിക്കുന്നുണ്ട്. കാണണോ' എന്ന് സനീഷ് 

കുറേയായി കണ്ടിട്ട്. പഴയ ഒരു ദേഷ്യത്തിൻറെ കഥയുണ്ട്. അതിന് ശേഷം കണ്ടിട്ടില്ലെന്ന് പറഞ്ഞപ്പോൾ എന്നാൽ കാണാമെന്നായി സനീഷ്.

മുറിയിലേക്ക് കയറി ചെല്ലുമ്പോൾ കസേരയിൽ ബനിയനും ലുങ്കിയും ധരിച്ച് എന്തോ വായിച്ചിരിക്കുകയായിരുന്നു അദ്ദേഹം. കണ്ടപ്പോൾ തലയുയർത്തി ചിരിച്ച് വായിച്ചിരുന്ന പേപ്പർ മടക്കിവെച്ചു. എന്നിട്ട് കുറച്ചുനേരം സംസാരിച്ചു. അന്നത്തെ വിമാനത്താവളം എപ്പിസോഡ് പറഞ്ഞപ്പോൾ കുഞ്ഞൂഞ്ഞിൻറെ സ്വതസിദ്ധമായ കണ്ണുചെറുതാക്കിയുള്ള ചിരി. പിന്നെ ആന്ധ്രയിലെ പുതിയ ചുമതലയെ പറ്റിയായി സംസാരം. അതിനിടെയിൽ ആന്ധ്രയിൽ നിന്നുള്ള പ്രാദേശിക കോൺഗ്രസ് നേതാവ് കാണാനെത്തി. അയാൾ നൽകിയ ബൊക്കെ വാങ്ങി അടുത്തമാസം ആന്ധ്രയിൽ വരുന്നുണ്ടെന്നും പാർട്ടിയെ ശക്തിപ്പെടുത്തണമെന്നുമൊക്കെയുള്ള നിർദേശങ്ങൾ നൽകി. പിന്നെയും ആരെല്ലാമോ സന്ദർശകർ മുറിക്ക് പുറത്ത് കാത്ത് നിൽക്കുന്നു. പുതുപ്പള്ളിയിലെ വീട് പോലെ തന്നെ. 

4

കോട്ടയത്തെ പാലയിലെ ഗ്രൌണ്ടിൽ അതല്റ്റിക്ക് മത്സരത്തിനിടെ ഹാമർ തലയിൽ വീണ് മരിച്ച അഫീൽ ജോൺസണിൻറെ വീട്ടിൽ ചെന്നപ്പോൾ യാദൃശ്ചികമായാണ് ഉമ്മൻ ചാണ്ടിയെ കണ്ടത്. വളർന്നുവരുന്ന ഫുട്ബോൾ താരമായ അഫീലിൻറെ മാതാപിതാക്കളെ കണ്ട് ബാംഗ്ലൂരിലെ സ്പോർട്സ് മാഗസിനായ ബ്രിഡ്ജിനുവേണ്ടി വാർത്ത ചെയ്യാനായാണ് ഞാൻ അവിടെ ചെന്നത്. ഷൂട്ട് ചെയ്ത് പുറത്തിറങ്ങുമ്പോഴായിരുന്നു ഉമ്മൻ ചാണ്ടിയുടെ വരവ്. ആരെയും അറിയിക്കാതെ പെട്ടെന്നായിരുന്നു ആ മനുഷ്യനറെ വരവ്. അഫീലിൻരെ ബൂട്ടും ജേഴ്സിയും പുറത്ത് കിടക്കുന്നത് കണ്ട് ആ മനുഷ്യൻറെ കണ്ണിൽ നിന്ന് കണ്ണീർ പൊടിയുന്നത് അന്ന് അടുത്തുനിന്നു കണ്ടു.

രാഷ്ട്രീയമായി പലകുറി വിമർശിച്ചിട്ടുള്ള. പലപ്പോഴും പലതും വെറും രാഷ്ചട്രീയ തന്ത്രം മാത്രമാണെന്ന് കളിയാക്കിയിട്ടുള്ള ആ മനുഷ്യൻ അത്ര രാഷ്ട്രീയക്കാരനല്ലെന്ന് അടുത്ത് നിന്നറിഞ്ഞ നിമിഷങ്ങളായിരുന്നു അത്. അഫീൽ ജോൺസണിൻറെ വീട്ടിനുമുന്നിലെ ആ കാപ്പി തോട്ടത്തിലൂടെ അന്ന് അദ്ദേഹത്തോട് സംസാരിച്ച് നടന്നതാണ് അവസാനത്തെ സംസാരവും നടത്തവും കൂടിക്കാഴ്ച്ചയും. 

കീറൽ വീണ ഖദർ വസ്ത്രമിട്ട് അലക്ഷ്യമായി പാറിക്കിടക്കുന്ന മുടി ഒട്ടും ചീകാതെ, ജനസാഗരത്തിന് നടുവിൽ, പ്രസംഗവേദികളിൽ, തിരഞ്ഞെടുപ്പ് പ്രചാരണത്തിരക്കിൽ, വാർത്താസമ്മേളനങ്ങളിൽ, അക്ഷീണനായി നിൽക്കുന്ന ഉമ്മൻ ചാണ്ടിയുടെ ചിത്രം പലകുറി കണ്ടിട്ടുണ്ടെങ്കിലും ഈ നാല് കൂടിക്കാഴ്ച്ച, അവ ഹൃദയത്തിലാണ് പതിഞ്ഞിട്ടുള്ളത്. 

.....................

emalayalee.com ൽ പ്രസിദ്ധീകരിച്ച ഓർമക്കുറിപ്പ്