പടിവാതില്‍

വാതിലുകൾ 
ഞാൻ കൊട്ടിയടക്കാറില്ല.
നിങ്ങൾക്ക്
കടന്നു വരാനും 
പോകാനുമുള്ള
മാർഗമാണത്.
കരഞ്ഞുകൊണ്ടും വരാം,
ചിരിച്ചു കൊണ്ടും പോകാം.
പക്ഷെ, ഉയരം കുറഞ്ഞ
കട്ടിളപടിയിൽ
തല തട്ടാതെ നോക്കണം.
വേദനകൾ
താൽക്കാലികമാകണമെന്നില്ല,
പടിയിറക്കം
തിരികെ വരാനും...

(25.12.16)

ചിറകുകളും ചക്രങ്ങളും തിരഞ്ഞ്...

ദൂരെ ദൂരേക്ക്
പച്ചിലകളിളകാത്ത
കിളികൾ ചിലക്കാത്ത
ദേശത്തേക്ക്
ഒരു യാത്ര പോകണം
തനിച്ച് ..

(24.12.16)

അമ്മ വിടവാങ്ങുമ്പോൾ....

തമിഴ് നാട്ടിൽ ജനിച്ച് കുറച്ചുകാലം വളരുകയും പിന്നീട് അവധിക്കാലങ്ങളെല്ലാം തമിഴ് മണ്ണിൽ ചിലവഴിക്കുകയും തമിഴ് നാട്ടിലൂടെ ഏറെ കറങ്ങി നടക്കുകയും ചെയ്തിട്ടുള്ള എനിക്ക് തമിഴ് മക്കളെന്തുകൊണ്ട് ജയലളിത ആശുപത്രിയിലാകുമ്പോഴും മരണപ്പെടുമ്പോഴും നിരാലംബരായി കരയുന്നുവെന്നതിൻറെ പൊരുൾ മനസിലാകും. പ്രബുദ്ധരെന്ന് സ്വയം മേനി നടിക്കുന്ന നമ്മൾ മലയാളികൾക്ക് തമിഴൻ പാണ്ടിയും അണ്ണാച്ചിയുമാണ്. പാണ്ടിയെന്ന് തമിഴനെ നമ്മൾ ആക്ഷേപിക്കുന്നുെവങ്കിൽ അത് നമ്മുടെ മനസിൻറെ വൈകൃതം തന്നെയാണ് കാണിക്കുന്നത്. പാണ്ടിദേശത്തിൻറെ മഹത്വവും പാരമ്പര്യവും അറിയാത്ത ജ്ഞാനികളായതുകൊണ്ടുമാത്രമാണ് ബിരുദ്ദവും ബിരുദ്ദാനന്തരബിരുദ്ദവും നേടിയ നമ്മളിപ്പോഴും അവരെ അവഹേളിക്കുന്നത്. ഭാഷയിലും സംസ്ക്കാരത്തിലും ഇന്നും എളിമപുലർത്തുന്നവരാണ് തമിഴൻ. അവൻ അതിവൈകാരികമായി പെരുമാറിയേക്കാം. പക്ഷെ മരണക്കിടക്കയിൽ കിടക്കുന്നവരെ അപമാനിക്കാറില്ല, ട്രോൾ ചെയ്യാറില്ല. തങ്ങൾക്കിഷ്ടപ്പെട്ടില്ലെങ്കിൽ ഷറപ്പോവയേയും അമേരിക്കൻ പ്രസിഡൻറിൻറേയും ഫെയ്സ് ബുക്ക് പേജിൽ കയറി തള്ളക്ക് വിളിക്കാറില്ല. അതെല്ലാം പ്രബുദ്ധരായ മലയാളികൾ നിർവഹിക്കുമ്പോൾ അവർ കൊച്ചുകുഞ്ഞുങ്ങളെപോലും സാർ എന്നുവിളിക്കാൻ ശീലിക്കുന്നു. എന്തിന് തമിഴ് ചാനലുകളിൽ വാർത്തകൾ വായിക്കുമ്പോൾ പേ്രുകൾ വായിക്കുന്നത് പോലും ശ്രീ എന്നർത്ഥമുള്ള "തിരു" എന്നപദം ചേ്ർത്താണ്.

ഇത്രയേറെ അഴിമതികാട്ടിയ ജയലളിതയെ രാഷ്ട്രീയമായി തന്നെ എതിർത്തുകൊണ്ട് തന്നെ എന്തുകൊണ്ട് നിങ്ങൾ അവരെ ഇത്രയേറെ സ്നേഹിക്കുന്നുവെന്ന് പലകുറി ഞാൻ ചെന്നെയിലെ എൻറെ ബന്ധുക്കളോടും സുഹൃത്തുക്കളോടുമെല്ലാം ചോദിച്ചിട്ടുണ്ട്, അതിനുള്ള മറുപടി പക്ഷെ വെറും വാക്കികളിലല്ല അവർ തന്നിട്ടുള്ളത്. മറിച്ച് പലകാര്യങ്ങളും ചൂണ്ടികാണിച്ചാണ്. പെൺകുട്ടികൾ സ്ക്കൂളിൽ പോകുന്ന ലേഡി ബേർഡ് സൈക്കിൾ ചൂണ്ടികാണിച്ചുകൊണ്ട്. അതിൽ സ്ക്കൂളിലേക്ക് അഭിമാനത്തോടെ പോകുന്ന പെൺകുട്ടികളുടെ മുഖത്തെ സന്തോഷവും അഭിമാനവും ചൂണ്ടികാണിച്ചുകൊണ്ട്. കൊടുംവെയിലത്ത് പണിയെടുത്ത് ക്ഷീണിച്ച് വീട്ടിലെത്തി ടിവിയിൽ സീരിയലും സിനിമയും പാട്ടുമെല്ലാം ആസ്വദിച്ച് ദിനാന്ത്യത്തിൽ റിലാക്സ് ചെയ്യുന്ന അണ്ണൻമാരുടെ മുഖം ചൂണ്ടികാണിച്ചുകൊണ്ട്...

ഒരു തവണ നേരിൽ കണ്ടിട്ടുണ്ട്. മേടയിൽ പ്രസംഗിക്കുന്നത്. പിന്നെ രണ്ട് തവണ ഇരുമ്പുമറസൃഷ്ടിക്കുന്നത് പോലെ വാഹനവ്യൂഹത്തിലിരുന്ന് വഴിയരികിലെ ജനത്തെ നോക്കി കൈകൂപ്പി കടന്നുപോകുന്നതും. എൽടിടിഇ ക്കാരുടെ ആക്രമണം ഭയന്ന് കനത്ത സുരക്ഷാവലയത്തിനുള്ളിലും ബുള്ളറ്റ് പ്രൂഫ് വസ്ത്രങ്ങളാണ് ജയലളിത ധരിക്കാറ് എന്ന് കേട്ടിട്ടുണ്ട്. ജനങ്ങൾക്കിടയിലേക്ക് ഇറങ്ങിചെന്ന് നമ്മുടെ നേതാക്കൾ സംസാരിക്കുന്നത് പോലെ ജയലളിത സംസാരിക്കാത്തതും അതിനാലാണ്. പഴയസിനിമാതാരത്തിൻറെ താരജാഢയോ അഭിനയമോ അല്ല നിശ്ചയദാർഢ്യം തന്നെയാണ് ആ മുഖത്ത് എന്നും കണ്ടിരുന്നത്. ഒരിക്കലും തോറ്റ് പിൻമാറില്ലെന്ന ഉറച്ചതീരുമാനത്തിൻറെ പ്രതിഫലനം.

രാഷ്ട്രീയമായി അംഗീകരിക്കാൻ ഇതൊന്നും ഒരു മറുപടിയോ കാരണമോ അല്ല. പക്ഷെ അവർ ജനങ്ങളുടെ പൾസറിഞ്ഞ് പ്രവർത്തിച്ച നേതാവാണ്. സാധാരണക്കാരന് തുച്ചം പണത്തിന് ഭക്ഷണം നൽകിയവർ, 1 രൂപയ്ക്ക് അരി നൽകിയവർ, കുടിവെള്ളം നൽകിയവർ... തീർച്ചയായും വളരെ ഭയഭക്തി ബഹുമാനത്തോടെ ജീവിക്കുന്ന തമിഴൻ അവരുടെ ആദ്യഭരണത്തിലെ അഴിമതി മറന്ന് അവരെ സ്നേഹിച്ചെങ്കിൽ, ആരാധിച്ചെങ്കിൽ, നിലവിളിച്ചെങ്കിൽ, അവർക്കുവേണ്ടി ജീവൻ വെടിഞ്ഞെങ്കിൽ അതൊരു പാതകമല്ല, ഷോ ഓഫുമല്ല, ബുദ്ധിശൂന്യതയുമല്ല... സ്നേഹം മാത്രമാണ്.

രാഷ്ട്രീയപരമായും ഭരണപരമായും അവരെടുത്ത പല തീരുമാനങ്ങളും ഏകാധിപത്യസ്വഭാവമുള്ളതായിരുന്നുവെന്ന് തന്നെ പറയാം. പിടിവാശിക്കാരിയായിരിക്കുമ്പോഴും സ്വന്തം ജനത്തെ അവർ മറന്നിട്ടില്ല, ജനം അവരേയും എന്നത് തന്നെയാണ് കാലം തെളിയിച്ചത്.

എംജിആറിൽ നിന്ന് വളർന്ന് ഒരുപക്ഷെ എംജിആറിനേക്കാൾ വലുതായാണ് അമ്മയുടെ മടക്കം. ഇന്ത്യൻ രാഷ്ട്രീയത്തെ നിയന്ത്രിക്കാൻ പാകത്തിൽ പാർട്ടിയെ വളർത്തിയ ജയലളിത രാഷ്ട്രീയജീവിതത്തിലും സ്വകാര്യജീവിതത്തിലും നേരിട്ട അപമാനങ്ങളുടേയും പരീക്ഷണങ്ങളും വായിക്കുമ്പോൾ അവർ പിടിവാശിക്കാരിയും ഏകാധിപതിയും ആയില്ലെങ്കിലേ അത്ഭുതമുള്ളുവെന്ന് തോന്നിപോകാറുണ്ട്....

റെയിഡിൽ പിടിച്ചെടുത്ത അവരുടെ സാരിയുടേയും ചെരിപ്പിൻറേയും എണ്ണവും തോഴി ശശികലയുമായുള്ള ബന്ധവുമെല്ലാം ചേർത്ത് അവരെ താറടിക്കാൻ ഓരോ തിരഞ്ഞെടുപ്പ് കാലത്തും മാധ്യമങ്ങളും എതിരാളികളുമെല്ലാം ശ്രമിക്കുമ്പോളും അവർകൂടുതൽ ശക്തയാവുകയായിരുന്നു. പാർട്ടിക്കകത്ത് രണ്ടാം നിരനേതാക്കളെ വളർന്നുവരാൻ അവർ അനുവദിച്ചിരുന്നില്ല എന്നത് വസ്തുതയായി നിലനിൽക്കുന്നു. തനിക്ക് ശേഷം എഐഎഡിഎംകെയുടെ ഭാവി എന്തായിരിക്കുമെന്ന് ജയലളിത ഓർത്തിരുന്നോവെന്നതും സംശയമാണ്. എന്നും എല്ലാം നിഗൂഢമായി സൂക്ഷിക്കുന്ന അവർ ആരോടാണ് കൂടുതൽ അടുപ്പം കാണിച്ചിരുന്നതെന്നതും നിഗൂഢമായി അവശേഷിക്കുന്നു.

ആ ഉയിർ തമിഴിനും ഉടൽ മണ്ണിനും നൽകി പുരട്ച്ചി തലൈവി മടങ്ങുമ്പോൾ കണ്ണീർ പൊഴിച്ചില്ലെങ്കിലും കളിയാക്കാതിരിന്നുകൂടെ നമുക്ക്...

അവരും സ്വപ്നം കണ്ടത് വിപ്ലവമായിരുന്നു

നിങ്ങളുടേയും അവരുടേയും
വിളിപ്പേര് സഖാവെന്നായിരുന്നു
നിങ്ങളുടേയും അവരുടേയും
സ്വപ്നം വിപ്ലവം തന്നെയായിരുന്നു
നിങ്ങളുടേയും അവരുടേയും
കൊടിയുടെ നിറം ചോരചുവപ്പായിരുന്നു
നിങ്ങളുടേയും അവരുടേയും
മുദ്രാവാക്യം ഇങ്ക്വിലാബായിരുന്നു
നിങ്ങളുടേയും അവരുടേയും
കണ്ണുകളിൽ പ്രതിഷേധത്തിൻറ്റെ കനലായിരുന്നു
നിങ്ങളുടേയും അവരുടേയും
കാതിൽ പോരാട്ടത്തിൻറ്റ കാഹളമായിരുന്നു
നിങ്ങളുടേയും അവരുടേയും
ശബ്ദം അടിച്ചമർത്തപ്പെട്ടവരുടേതായിരുന്നു
എന്നിട്ടുംനിങ്ങളെന്തേ അവരെ ഇല്ലാതാക്കി...?
അവരുടെ വിരിമാറുലാക്കാക്കി കാഞ്ചിവലിച്ചു...?
അവരുടെ ചോരചാലും നീന്തികയറിയാണോ
ഇനി നിങ്ങളുടെ വിപ്ലവം വരുന്നത്...?

Surgical strikes or cross border firing?

ഇന്ത്യൻ പട്ടാളം അതിർത്തി കടന്ന് ആക്രമണം നടത്തി. ചില സംശയങ്ങൾ പക്ഷെ അവശേഷിക്കുന്നു.  സത്യത്തിൽ ഇന്ത്യൻ സൈന്യം അതിർത്തി കടന്നുവോ ? അതോ നിയന്ത്രണരേഖയ്ക്കിപ്പുറം ഇരുന്ന് നടത്തിയ ആർട്ടിലറി ഓപറേഷൻ മാത്രമായിരുന്നുവോ?

1. ഹെലികോപ്റ്ററിൽ ആണ് ഇന്ത്യൻ സൈന്യം അതിർത്തി കടന്നുള്ള മിന്നലാക്രമണത്തിന് പട്ടാളത്തെ അയച്ചതെങ്കിൽ എങ്ങനെയാണ് ആ ഹെലികോപ്റ്റർ അതിർത്തിയിലെ പാക്ക് റഡാറുകളിൽ പെടാതെ പോയത് ? കോപ്റ്ററുകളുടെ ശബ്ദം എങ്ങനെയാണ് നിയന്ത്രണരേഖയിൽ കാവൽ നിൽക്കുന്ന പാക്ക് സൈന്യം കേൾക്കാതെ പോയത് ? അങ്ങോട്ട് പോയതുപോലെ പട്ടാളക്കാരെ തിരിച്ചുകൊണ്ടുവരുവാനും ഇതേ കോപ്റ്ററുകൾ നിയന്ത്രണരേഖ കടന്നുപോയികാണില്ലേ? അപ്പോൾ രണ്ട് ട്രിപ്പ് അടിച്ചിട്ടും കേൾക്കാത്ത അത്ര ബധിരൻമാരാണ് പാക്ക് സൈനികർ എന്നാണോ?

2. ഇനി വേഷം മാറി കാൽനടയായാണ് സൈനികർ അതിർത്തി കടന്നുള്ള ആക്രമണത്തിന് പോയതെന്നും തിരികെ കൊണ്ടുവരാൻ മാത്രമാണ് കോപ്റ്റർ പോയതുമെന്നാണ് വിശദീകരണം എന്നുവെക്കുക. അപ്പോൾ എത്രമാത്രം ആയുധങ്ങൾ കൈവശം കരുതാൻ സൈനികർക്ക് കഴിയും? മാത്രവുമല്ല വെറും 4 മണിക്കൂറുകൊണ്ട് കിലോമീറ്ററുകൾ താണ്ടി എങ്ങനെ ഓപ്പറേഷൻ നടത്തി മടങ്ങിവരാൻ സാധിക്കും? പാക്ക് അധിനിവേശ കാശ്മീർ എന്നത് വെറും സമതലമല്ല. മലകൾ നിറഞ്ഞപ്രദേശമാണ്. വലിയ ചുമടുമായി കിലോമീറ്ററുകൾ താണ്ടി ഓപറേഷൻ നടത്തുകയെന്നത് അത്രസാധ്യമല്ല. പാക്ക് സൈനികരുടെ കണ്ണുവെട്ടിച്ച് നടന്ന് വെടിവെച്ച് എല്ലാം തരിപ്പണമാക്കിയെന്നതും അവിശ്വസനീയമാണ്.

3. നിയന്ത്രണരേഖയ്ക്കിരുവശവും ആൻറി എയർക്രാഫ്റ്റ് മിസൈലുകളും ഷോൾഡർ ഫയേർഡ് മിസൈലുകളുമെല്ലാം ഇരുസൈന്യത്തിനുമുണ്ട്. അവയെ വെട്ടിച്ച് കോപ്റ്ററുകൾ പറന്നുവെന്നത് വിശ്വസനീയമല്ല. നിയന്ത്രണരേഖയിലെ ഏതൊരുചലനവും അതീവജാഗ്രതയോടെതന്നെയാണ് പാക്കിസ്ഥാനും നിരീക്ഷിക്കുന്നത്. ഇവയ്ക്കെല്ലാം പുറമെ എൽഎംജി, എച്ച്എംഎജി, മോർട്ടാർ, ഇഗ്ള, ആർട്ടി ഗൺസ് തുടങ്ങിയവ വേറെയും. പാക്കിസ്ഥാൻ ഏറ്റവും കൂടുതൽ പണം ചിലവിടുന്നതും ആയുധങ്ങൾ വാങ്ങികൂട്ടാൻ തന്നെയാണ്.

4. ഇവയ്ക്കെല്ലാം പുറമെ, ഡയറക്റ്റർ ജനറൽ ഓഫ് മിലിട്ടറി ഓപറേഷൻസ് രൺബീർ സിങ് പറഞ്ഞത് ശ്രദ്ധിക്കുക

“Based on very credible and specific information which we received yesterday that some terrorist teams had positioned themselves at launch pads along the Line of Control with an aim to carry out infiltration and terrorist strikes in Jammu & Kashmir and in various other metros in our country, the Indian army conducted surgical strikes last night at these launch pads”.

അതായത് “ലോഞ്ച് പാഡ്സ് അലോങ് ദ എൽ ഓ സി”. നിയന്ത്രണരേഖയ്ക്ക് നീളെ, അല്ലെങ്കിൽ നിയന്ത്രണരേഖയ്ക്ക് അരികിലുള്ള ഭീകരവാദകേന്ദ്രങ്ങൾ എന്ന്. തീവ്രവാദികൾക്ക് സഹായം നൽകുന്ന അല്ലെങ്കിൽ തങ്ങുന്ന കേന്ദ്രങ്ങൾ നിയന്ത്രണരേഖയ്ക്ക് സമീപത്താണ് എന്ന്. അവിടേക്ക് എത്താൻ നിയന്ത്രണരേഖ മുറിച്ചുകടന്നുവെന്ന് ഒരിടത്തും പറഞ്ഞിട്ടില്ല. അപ്പോൾ നടന്നത് അതിർത്തി കടന്നുള്ള ആക്രമണമല്ലെന്ന് സാരം. നിയന്ത്രണരേഖയ്ക്ക് അരികത്തായുള്ള തീവ്രവാദകേന്ദ്രങ്ങളെ തകർക്കാൻ ഇന്ത്യൻ സൈന്യത്തിന് കോപ്റ്ററിൽ അതിർത്തി കടന്ന് പോയി വെടിവെക്കേണ്ടതില്ല. മറിച്ച് സ്വന്തം ആർട്ടിലറി സേനയെ ഉപയോഗിച്ച് സ്വന്തം അതിർത്തിക്കകത്ത് നിന്ന് വെടിയുതിർത്താൽ മതി. വിവിധ റേഞ്ചുകളിൽ ഫയർചെയ്യാൻ ശേഷിയുള്ള എൽഎംജി, എച്ച്എംഎജി, മോർട്ടാർ, ആർട്ടി ഗൺസ് തുടങ്ങിയവ ഇന്ത്യൻ സൈന്യത്തിൻറെ പക്കലുണ്ട്. ബൊഫോഴ്സിൻറെ റോഞ്ച് നന്നായി പാക്കിസ്ഥാനിക്കുമറിയാം ഇന്ത്യക്കാരനുമറിയാം. അതിനാൽ തന്നെ അതിർത്തി കടന്ന് ഇന്ത്യൻ സൈന്യം ആക്രമിച്ചുവെന്നത് അൽപം അതിരുകടന്ന അവകാശവാദമാണ്. അതിനാൽ തന്നെ ഇന്ത്യയുടേത് ക്രോസ് ബോർഡർ ഫയറിങ്ങാണെന്ന് പാക്ക് വാദത്തിന് ശക്തിയേറുകയും ചെയ്യും.

5. നിയന്ത്രണരേഖ മറികടന്ന് രാത്രിയിൽ ഇത്രയും വലിയ ഓപറേഷൻ നടത്തിയെങ്കിൽ ഇരുവശത്തുമുള്ള ക്യാഷ്വാലിറ്റിയും ചില്ലറയാകില്ല.

ഇസ്രയേൽ സൈന്യം പണ്ട് ഉഗാണ്ടയിലെ എൻറബേ വിമാനത്താവളത്തിലേക്ക് അതീവരഹസ്യമായി പറന്ന് വെറും 90 മിനുട്ടുകൊണ്ട് പലസ്തീൻ വിമോചന സംഘടന റാഞ്ചിയ വിമാനം മോചിപ്പിച്ചത് പോലെയുള്ള കമാൻറോ ഓപറേഷനാണ് കഴിഞ്ഞ രാത്രിയിലേതെന്ന് വിശ്വസിക്കാൻ ഒരു സാധ്യതയും കാണുന്നുമില്ല.

ഒരുപക്ഷെ ചരിത്രത്തിലാദ്യമായി എന്തിനാണ് ഡിജിഎംഎ വാർത്താസമ്മേളനം നടത്തി ഓപറേഷൻറെ കാര്യം സ്റ്റേറ്റ്മെൻറ് വായിച്ച് വെളിപ്പെടുത്തിയതെന്നതും സംശയത്തിനിട നൽകുന്നുണ്ട്.

യുദ്ധസജ്ജമാണ് സൈന്യമെന്നതിൽ തർക്കമില്ല, ശക്തരാണെന്നതിലും തർക്കമില്ല. പക്ഷെ സംശയങ്ങൾക്ക് അതീതമാകണം എല്ലാനടപടികളും.