Saturday, 30 September 2017

മുഗളൻറെ തോട്ടങ്ങളും ചിനാറിൻറെ തണലും... (കശ്മീർ - പാർട്ട് 2)


ശ്രീനഗറിലെ കാഴ്ച്ചകളിലേക്കാണ് ആദ്യം.
മുഗളൻറെ പൂന്തോട്ടങ്ങളും ദാൽ തടാകവും ഝലം നദിയും അതിരിടുന്ന ശ്രീനഗർ. വാർത്തകളിൽ ടൂറിസത്തേക്കാൾ തീവ്രവാദി ആക്രമണങ്ങളാൽ ഇടം നേടിയ സ്ഥലനാമം.
ജമ്മു കശ്മീരിൻറെ വേനൽക്കാല തലസ്ഥാനഗരമാണ് ഇത്. ഝലം നദിയുടെ അരികുചേർന്ന് ഒട്ടും സ്വച്ഛമല്ലാതെ കിടക്കുന്ന നഗരം. മറ്റ് സംസ്ഥാനതലസ്ഥാനങ്ങളെപോലെ അത്ര തിരക്കേറിയതല്ല ശ്രീനഗർ. സാധാരണക്കാരേക്കാൾ കൂടുതൽ സൈനികയൂണിഫോമിലുള്ളവർ വാഴുന്ന നഗരം. തെരിവുകളിലെല്ലാം തലങ്ങും വിലങ്ങും ഓടുന്ന സൈനികവാഹനങ്ങൾ. നീട്ടിപിടിച്ച തോക്കുകളുമായി സധാജാഗരൂകരായി നിലയുറപ്പിച്ചിരിക്കുന്ന സൈനികരും അർദ്ധസൈനികരും പൊലീസും. വന്നിറങ്ങുന്ന ആരിലും ഭയം വിടർത്താൻ ഉതകുന്ന കാഴ്ച്ചകൾ.  ഭയപാടില്ലാതെ ശ്രീനഗറിൽ വന്നെത്തുന്നവർ വിരളമാണെന്ന് മെഹ്റാജ് പറഞ്ഞു. കൂട്ടത്തിൽ ഒരു ചോദ്യവും
നിങ്ങളുടെ മനസിൽ കശ്മീരിലേക്ക് വരുമ്പോൾ എന്തായിരുന്നു വികാരം?
ഒട്ടും ശങ്കിക്കാതെ പേടിയെന്ന് നോബിൾ.
ശരിയാണ് വാർത്തകൾ കാണുന്ന ഏതൊരു ആളുടേയും വികാരം മറിച്ചാകില്ല.
90 കളുടെ അവസാനം മുതൽ കശ്മീർ അശാന്തിയുടെ താഴ്വരയാണ്. ഒരിക്കലും നിലച്ചിട്ടില്ലാത്ത വെടിയൊച്ചകൾ, സ്ഫോടനങ്ങൾ,കൊലപാതകങ്ങൾ, മനുഷ്യാവകാശലംഘനങ്ങൾ....
47 ലെ വിഭജനവും അതിനുശേഷം ഇന്ത്യയുടെ ഭാഗമായി നിന്നതിൻറേയും ബാക്കിപത്രമാണ് ഈ അശാന്തി.

ഓരോദിവസവും കശ്മീരിൻറെ പുലരി പിറന്നിരുന്നത് പല വീടുകളിൽ നിന്നുള്ള പൊട്ടിക്കരച്ചിലുകളോടെയായിരുന്നു. എന്നും ആരെങ്കിലുമൊക്കെ കശ്മീരിൽ കൊല്ലപ്പെട്ടുകൊണ്ടിരുന്നു. ചിലപ്പോൾ സൈന്യത്തിൻറെ വെടിയേറ്റ്, അല്ലെങ്കിൽ തീവ്രവാദികളുടെ വെടിയേറ്റ്... ഝലം നദിയുടെ ഏതെങ്കിലും തീരത്ത് വെടിയുണ്ടയേറ്റ് തുളഞ്ഞ്, രക്തത്തിൽ കുളിച്ച ശവശരീരങ്ങൾ നിത്യകാഴ്ച്ചകളായിരുന്നു. മരിച്ചവരുടെ പേരുകൾക്ക് മാത്രമായിരുന്നു മാറ്റം, മരണകാരണങ്ങൾക്കില്ലായിരുന്നു.

ദിവസങ്ങൾ പഴക്കമുള്ള അജ്ഞാതയുവാക്കളുടെ ജഡങ്ങൾ ഝലത്തിൻറേയും ദാലിൻറേയും തീരത്ത് അടിഞ്ഞുകൂടുന്നത് ഇപ്പോൾ പഴയത്പോലെ നിത്യകാഴ്ച്ചയല്ല. പക്ഷെ കശ്മീരിലെ പ്രശ്നങ്ങൾ മാത്രം അവസാനിച്ചില്ല. ഝലത്തിലൂടെ ഒഴുകിപോയ വെള്ളത്തിനൊപ്പം കശ്മീർ ജനതയുടെ മനസ് ഒഴുകിപോയില്ല, മറിച്ച് ഇന്ത്യൻ സർക്കാരിൻറെ നിലപാടുകൾക്കെതിരെ അവർ കൂടുതൽ മുഖം കടുപ്പിച്ചു. അല്ലെങ്കിൽ രാജ്യം അവരോട് സ്വീകരിച്ച രാഷ്ട്രീയനിലപാടുകൾ അവരെ അകറ്റിക്കളഞ്ഞു. അതിനാൽ തന്നെ സൈനികരെ കാണുമ്പോൾ പലപ്പോഴും കശ്മീരികൾ മുഖം തിരിക്കും, പ്രതിഷേധിക്കും. അനന്ത്നാഗിലും ബന്ദിപ്പോരിലും അവർ സൈന്യത്തിന് നേരെ കല്ലെറിയും.
ഈ ചിത്രങ്ങളൊക്കെ മതി ശരാശരി മനുഷ്യനെ കശ്മീരിനെ ഭയത്തോടെ കാണാൻ. കശ്മീരിലേക്ക് തിരിക്കുംമുമ്പ് ആയിരംവട്ടം ചിന്തിപ്പിക്കാൻ.

നോബിളിൻറെ മറുപടിയിൽ മെഹ്റാജിന് അത്ഭുതം തോന്നിയില്ല. എന്നാൽ ഇതൊന്നുമല്ല കശ്മീരും കശ്മീരികളുമെന്ന് എല്ലാകശ്മീരികളെ പോലെ മെഹ്റാജും പറഞ്ഞു, ഒരുപക്ഷെ അത് കേൾക്കുന്നവൻ ഉൾക്കെള്ളാനിടയില്ലെന്ന തോന്നലോടെതന്നെയാകാം മെഹ്റാജ് ഇതെല്ലാം പറയുന്നത്. കശ്മീരെന്തെന്ന് മടങ്ങും മുമ്പ് നിങ്ങൾ മനസിലാക്കുമെന്ന് പറയുമ്പോൾ മെഹ്റാജിൻറെ കണ്ണിൽ വലിയ പ്രതീക്ഷയുണ്ടായിരുന്നു.
 
തെക്കേയിന്ത്യക്കാരെ, പ്രത്യേകിച്ച് കേരളീയരെ, കശ്മീരികൾക്ക് വലിയ കാര്യമാണ്. മെഹ്റാജ് ആവർത്തിച്ചുകൊണ്ടിരുന്നു. അതേസമയം ഹിന്ദിക്കാരെ – ഉത്തരേന്ത്യക്കാരെ – തീരെ ഇഷ്ടമല്ല. കാരണമുണ്ട്. തെക്കേയിന്ത്യയിൽ നിന്നെത്തുന്നവർ, പ്രത്യേകിച്ച് കേരളത്തിൽ നിന്നുള്ളവർക്ക് വിവരമുണ്ട്, വിദ്യാഭ്യാസമുണ്ട്. അതിനാൽ തന്നെ പ്രശ്നവും കാര്യങ്ങളും മനസിലാക്കാൻ, ഉൾക്കൊള്ളാൻ അവർ തയ്യാറാകും. എന്നാൽ ഉത്തരേന്ത്യക്കാരങ്ങനെയല്ല. ദേശിയതയുടെ പേരിൽ എന്ത് കള്ളവും പ്രചരിപ്പിക്കുന്നവരാണ് അവർ. ദേശിയചാനലുകളാണ് കശ്മീർ പ്രശ്നത്തെ വളച്ചൊടിച്ച് കശ്മീരികളെ ദേശദ്രോഹികളാക്കി മുദ്രകുത്തുന്നതെന്നാണ് മെഹ്റാജ് പറയുന്നത്. മെഹ്റാജിന് മാത്രമല്ല ഈ അഭിപ്രായമെന്ന് പിന്നീടുള്ള ദിവസങ്ങളിൽ മനസിലായി. ഒരളവ് വരെ ശരിയാണ്. കശ്മീരിലെ ചെറിയ പ്രതിഷേധങ്ങൾ പോലും വലിയ വാർത്തയാക്കുന്ന ദേശിയമാധ്യമങ്ങൾ പക്ഷെ ഇവരുടെ യഥാർത്ഥ വിഷയത്തെ ഉയർത്തിക്കാട്ടുന്നില്ല. എന്തുകൊണ്ട് ഇവർക്ക് ഇത്തരത്തിൽ പ്രതികരിക്കേണ്ടിവരുന്നു, അല്ലെങ്കിൽ എന്തുകൊണ്ട് ഇവരിൽ നഷ്ടമായ വിശ്വാസം തിരികെ കൊണ്ടുവരാൻ ആകുന്നില്ലയെന്നത് ചർച്ചയാകേണ്ടതാണ്.


വണ്ടി മെല്ലെ ശ്രീനഗറിൻറെ പ്രധാനടൌണായ ലാൽ ചൌക്ക് പിന്നിട്ട് മുന്നോട്ട് നീങ്ങുകയാണ്. പ്രതാപ് പാർക്കിനരികിലേക്കാണ് യാത്ര. അവിടെ ഫിർദൌസ് കാത്ത് നിൽപ്പുണ്ട്. പ്രതാപ് പാർക്കിൻറെ ഒരുവശത്താണ് കശ്മീരിലെ ഒട്ടുമിക്ക പത്രങ്ങളുടേയും ഓഫീസുകൾ. ഉറുദുവിലും ഇംഗ്ലീഷിലും ഹിന്ദിയിലുമുള്ള പത്രങ്ങൾ.
പ്രതാപ് പാർക്കിന് മുന്നിലെ ഒരു ചിനാർ മരത്തിൻറെ തണലിൽ കാർ നിർത്തി കാത്തുനിന്നു. ഫിർദോസിന് നൽകാനായി ഒരു സമ്മാനം കയ്യിൽ കരുതിയിട്ടുണ്ട്. ചകിരിനാരുകൊണ്ടുണ്ടാക്കിയ ഒരു ആന. ഒരു ചിനാർ ഇലകൂടി കയ്യിൽ കരുതി. കേരളത്തിൻറേയും കശ്മീരിൻറേയും ചിന്നങ്ങളാകട്ടെ ഈ ഫിർദൌസിനുള്ള ജൻമദിനസമ്മാനം.

ഫിർദൌസിൻറെ വരവും കാത്ത് കുറച്ച് നേരം കാത്ത് നിൽക്കേണ്ടിവന്നു. എത്തിയ ഉ    ടനെ പതിവ് ആലിംഗനം, ഹാപ്പി ബർത്തിഡെ ആശംസകൾ നേർന്ന് ഞങ്ങൾ സ്വീകരിച്ചപ്പോൾ സന്തോഷം. സമ്മാനം വാങ്ങി പിറന്നാൾ ഒരിക്കലും ആഘോഷിച്ചിട്ടില്ലെന്നകാര്യം ഫിർദൌസ് പങ്കുവെച്ചു.

വടക്കൻ കശ്മീരിലെ ബാരമുള്ളയിലാണ് ഫിർദൌസിൻറെ വീട്. ബാരാമുള്ള പ്രശ്നബാധിത പ്രദേശമാണ്. തെക്കൻ കശ്മീരിനെ അപേക്ഷിച്ച് വിദേശ തീവ്രവാദികളാണ് വടക്കൻ കശ്മീരിലേറെയുള്ളത്. വടക്കൻ കശ്മീർ അതിർത്തിക്കപ്പുറത്ത് നിന്ന് പാക്കിസ്ഥാനിൽ നിന്നെത്തുന്ന തീവ്രവാദികളുടെ കേന്ദ്രമാണ്. അതേസമയം പ്രദേശവാസികളുടെ പിന്തുണയേറെയുണ്ട് തെക്കൻ കശ്മീരിലെ തീവ്രവാദപ്രവർത്തനങ്ങൾക്ക്. തെക്കൻ കശ്മീർ ഇതിനെ വിഘടനവാദമെന്നോ തീവ്രവാദമെന്നോ അല്ല വിളിക്കുക. സ്വാതന്ത്ര്യത്തിനുവേണ്ടിയുള്ള പോരാട്ടമാണെന്നാണ്. അവർക്കിത് ആസാദിയാണ്. ഇന്ത്യയിൽ നിന്നും പാക്കിസ്ഥാനിൽ നിന്നുമുള്ള വിടുതൽ.

വിശേഷങ്ങൾ പങ്കുവെച്ചുകൊണ്ട് ചിനാറിൻറെ തണലിൽ അൽപനേരം.
പ്രതിരോധമന്ത്രാലയം മാധ്യമപ്രവർത്തകർക്കായി പ്രതിവർഷം നടത്തുന്ന ഡിഫൻസ് കറസ്പോൻറ്സ് കോഴ്സിൽ വെച്ചാണ് ഫിർദൌസുമായുള്ള സൌഹൃദം ആരംഭിച്ചത്. അന്നുമുതൽ നല്ല സുഹൃത്താണ് ഫിർദൌസ്. നന്നായി മലയാള സിനിമകളും തമിഴ് സിനിമകളും ആസ്വദിക്കുന്ന ഫിർദൌസ് മലയാള പാട്ടുകളും തമിഴ് പാട്ടുകളും പാടും. ദുൽഖറിൻറേയും പാർവതിയുടേയും കടുത്ത ആരാധകനുമാണ് കക്ഷി. ചാർളി സിനിമ കണ്ട് ഇരുവരുടേയും നമ്പർ വാങ്ങി മെസേജ് അയച്ചിട്ട് ഇരുവരും മറുപടി നൽകിയില്ലെന്ന ചെറിയസങ്കടമുണ്ട് ഫിർദൌസിന്. ചാർലിയിലെ പാട്ടും പാടിയാണ് മിക്കപ്പോഴും നടപ്പ്.  

അകലെ ഒരു മലചൂണ്ടികാട്ടി ആദ്യം നഗരത്തിൻറെ വിദൂരകാഴ്ച്ച കണ്ടാവാം തുടക്കമെന്ന് ഫിർദൌസിൻറെ ക്ഷണം. വലിയ മലയുടെ മുകളിൽ ഒരു കോട്ട. അവിടെ നിന്നാൽ ശ്രീനഗർ ടൌണിൻറെ ആകാശക്കാഴ്ച്ച കാണാമത്രേ.

പോകുന്നവഴിക്കാണ് ദാൽ തടാകം. ദാൽ തടാകത്തെ ചുറ്റി വണ്ടി നീങ്ങി. ദാലിലേക്ക് വരണം. വെയിൽകാഞ്ഞ് ദാലിലെ ഷിക്കാരയിൽ മയങ്ങണം. ദാലിൻറെ കാഴ്ച്ചകളിലേക്ക് പിന്നീട് വരാം.

കാഴ്ച്ചകൾക്കൊപ്പം ദേശത്തിൻറെ രൂചികളുംകൂടി ആസ്വദിക്കാനുള്ളതാണ് ഓരോ യാത്രയും. ഒരു പ്രദേശത്തിൻറെ കാഴ്ച്ചകൾക്കൊപ്പം സംസ്ക്കാരവും രുചിയും അറിയുമ്പോളേ യാത്രകൾ പൂർണമാകൂ. കശ്മീരിൻറെ സ്പെഷ്യൽ വിഭവങ്ങൾ രുചിച്ചേമടങ്ങാവൂവെന്ന് എന്നെപോലെ ഫിർദൌസിനും നിർബന്ധമാണ്. റാണി ജ്യൂസ് മുതൽ കശ്മീർ വസ്വാൻവരെ നീണ്ടനിരതന്നെയുണ്ട് നാവിൽ വെള്ളമൂറിക്കാനായി.

പോകുന്നവഴിയിൽ വണ്ടിനിർത്തി റാണി ജ്യൂസ് വാങ്ങി ഫിർദൌസ്. ടിന്നിലടച്ച ഒരു ജ്യൂസ്. കശ്മീരിന് പുറമെ ദുബൈയിൽ മാത്രമേ ഈ ജ്യൂസ് ലഭിക്കൂവത്രേ. സാധാരണ ശീതളപാനിയങ്ങൾ പോലെ വെറും ജ്യൂസ് മാത്രമല്ല, പഴത്തിൻറെ കഷ്ണങ്ങളും ജ്യൂസിലതുപോലെയുണ്ട്. നല്ലമധുരം. റാണി ജ്യൂസ് എന്ന് കേട്ടപ്പോൾ ആദ്യം കരുതിയത് റാണി എന്നുപേരുള്ള ഏതെങ്കിലും പ്രത്യേക പഴത്തിൻറെ ജ്യൂസ് ആകുമെന്നായിരുന്നു. പക്ഷെ റാണി എന്നത് ജ്യൂസിൻറെ പേരാണ്. ഫ്രിഡ്ജ് എന്ന ബ്രാൻറ് നെയിം റഫ്രിജറേറ്ററിൻറെ പര്യായമയത്പോലെ ഒരു ബ്രാൻറ്  നെയിം ആ ഉത്പന്നത്തിൻറെ തന്നെ പേരായിമാറുന്നതിൻറെ മറ്റൊരുദാഹരണം.



പാരിമഹലിലേക്കാണ് യാത്ര. മലമുകളിൽ അകെല നിന്ന് കണ്ട ആ കോട്ട. അതൊരു സൈനികകോട്ടയൊന്നുമല്ല, മറിച്ച് പൂന്തോട്ടമാണ്. പലതട്ടുകളിലായി നിർമിച്ച മുഗളൻറെ പൂന്തോട്ടം. ഷാജഹാൻറെ മൂത്തപുത്രനായ ദാര ഷിക്ക പതിനേഴാം നൂറ്റാണ്ടിൻറെ പകുതിയിലാണ് പാരി മഹൽ എന്ന ഈ പൂന്തോട്ടം നിർമിച്ചത്. 4 തട്ടുകളായാണ് പൂന്തോട്ടം. ചിന്നാർ മരങ്ങളും പനിനീർപ്പുക്കളുമെല്ലാം നിറഞ്ഞുനിൽക്കുന്ന കെട്ടിടത്തിൻറെ ഏറ്റവും മുകളിൽ ഒരു ചെറിയ ജലസംഭരണിയുടെ അവശിഷ്ടങ്ങളും കാണാം. ഞായറാഴ്ച്ചയായിതിനാൽ നിരവധി കശ്മീരികളാണ് പാരി മഹലിൽ സമയം ചിലവിടാനായി എത്തിയിരിക്കുന്നത്. ചിലർ കൂട്ടുകാരുമായും മറ്റുചിലർ കുടുംബമായും. ചിനാർ മരത്തണലിലെ ബെഞ്ചിൽ വിശ്രമിക്കുന്ന യുവാക്കളും യുവതികളും.
 
പാരി മഹലിന് മുകളിൽ നിന്ന് നോക്കിയാൽ ദൂരെ ദാൽ തടാകവും ശ്രീനഗർ നഗരവും കാണാം. ചെറുപൊട്ടുകൾ പോലെ ഷിക്കാരകൾ, ചെറിയ തുരുത്തുകൾ. ദൂരെ ഝലം നദി ഒരു നേർത്തരേഖപോലെ ഒഴുകുന്നു. അകലെ കശ്മീരിന് അതിരിട്ട് മലനിരകൾ....
നല്ലവെയിലുണ്ടായിരുന്നെങ്കിലും കുറേനേരം കാഴ്ച്ചകൾ കണ്ട് പൊളിഞ്ഞ കൊട്ടയുടെ മുകളിൽ ഇരുന്നു.

ഇനി ജഹാംഗീറിൻറെ തൂങ്ങികിടക്കുന്നതോട്ടത്തിലേക്ക്. തട്ടുതട്ടായി നിർമിച്ചിരിക്കുന്ന പൂന്തോട്ടം. തട്ടുതട്ടായി നിർമിച്ചതിനാലാണ് ദൂരേ നിന്ന് നോക്കുമ്പോൾ തൂങ്ങികിടക്കുന്നപൂന്തോട്ടമായി അനുഭവപ്പെടുന്നത്. മുഗുളൻറെ നിർമാണത്തിൻറെ ഭംഗിയും വൈദഗ്ധ്യവുമാണ് കശ്മീരിലെ ഓരോ പൂന്തോട്ടവും. മലമുകളിൽ നിന്ന് ഒഴുകിവരുന്ന നീരുറവകളുടെ ഗതിമാറ്റാതെ, ആ നീരുറവകൾ പൂന്തോട്ടത്തിന് മനോഹാരിത പകരുന്നരീതിയിൽ ഫലപ്രദമായി ഉപയോഗിച്ചിരിക്കുന്നു. ആ
നീരുറവയിലെ തെളിനീരിൽ മുഖവും കാലുമെല്ലാം കഴുകുന്ന സഞ്ചാരികൾ. ആദ്യം അതൊരുആചാരമാണെന്ന് തെറ്റിദ്ധരിച്ചു. അങ്ങനെ തെറ്റിദ്ധരിച്ച് ‘ആചാരം അനുഷ്ടിക്കുന്ന സഞ്ചാരികളും കൂട്ടത്തിൽ ഉണ്ടാകാം. ഞങ്ങളും കയ്യും കാലും മുഖവും കഴുകി. നല്ല തണുപ്പ്. മലമുകളിൽ നിന്ന് ഒഴുകിവരുന്ന തെളിനീര്, ഭൂമിയിലെ ഏറ്റവും ശുദ്ധമായ വെള്ളമാണിത്. ഒരു മിനറൽ വെള്ളത്തിനും അവകാശപ്പെടാനാകാത്ത പരിശുദ്ധി.

പൂന്തോട്ടങ്ങളുടെ നഗരമായ ബാംഗ്ലൂരിൽ പോലും ഇത്രയും മനോഹരങ്ങളായ തോട്ടങ്ങളുണ്ടാകില്ല, അത്രകണ്ട് മനോഹരമാണ്. വിവിധതരം പൂക്കളുടെ സാന്നിധ്യം മാത്രമല്ല, കശ്മീരിലെ തോട്ടങ്ങളെ ആകർഷകമാക്കുന്നത്. മറിച്ച് വൃത്തിയാണ്. ആ തോട്ടങ്ങൾ പരിചരിക്കുന്നരീതി മാതൃകയാക്കണം. എവിടെയും പ്ലാസ്റ്റിക്കുകളോ ചപ്പുചവറുകളോ വലിച്ചെറിഞ്ഞതായി കാണാനാവില്ല. കാണാൻ വരുന്ന സഞ്ചാരിയും മലിനമാക്കുന്നില്ലെന്നതും ശുചിയായി സൂക്ഷിക്കാൻ സഹായിക്കുന്നുണ്ട്. നമ്മുടെ നാട്ടിലെ പല ടൂറിസ്റ്റ് കേന്ദ്രങ്ങളുടേയും അവസ്ഥ വെറുതെയെങ്കിലും മനസിലേക്ക് വന്നു.

പൂന്തോട്ടത്തിലെ ചിന്നാർ മരങ്ങൾക്കുതാഴെ നീട്ടിവിരിച്ച പായയിൽ ഇരുന്ന് ഭക്ഷണം കഴിക്കുന്ന കശ്മീരികൾ. മരത്തണലിൽ കിടന്നുറങ്ങുന്നവർ, പ്രണയം പങ്കിടുന്നവർ, വെള്ളത്തിൽ കളിക്കുന്ന കുട്ടികൾ, മൊബൈലിലെ സെൽഫി ഫ്രെയിമിലേക്ക് ഒത്തുചേരുന്ന കൂട്ടുകാർ, പേരമരത്തിലും പിയേഴ്സ് മരത്തിലും കല്ലെറിയുന്നവർ.... ജഹാംഗീറിനറെ പൂന്തോട്ടത്തിന് ചുറ്റും നിറപ്പകിട്ടാർന്ന കാഴ്ച്ചകളാണ്.


കുറച്ചുസമയം ചിനാർ മരത്തിൻറെ തണലേറ്റ് കിടന്നു. നല്ല വെയിലത്തും ചിനാറിൻറെ താഴെ നല്ല തണുപ്പാണ്. ഉച്ചമയക്കത്തിന് ഏറ്റവും അനുയോജ്യമായയിടം. കാഴ്ച്ചകൾ ആസ്വദിച്ചും ഫോട്ടോയെടുത്തും ഞങ്ങൾ മടങ്ങിവരുമ്പോളേക്കും ദൂരെ ഒരു ചിനാറിൻറെ കീഴിൽ കിടന്ന് മെഹ്റാജ് മയക്കമായിരുന്നു... 

(തുടരും)

ആദ്യഭാഗം ഇവിടെ വായിക്കാം

https://neelambarikku.blogspot.in/2017/09/blog-post.html?m=1

Monday, 25 September 2017

ഭൂമിയിലെ പറുദീസയിലേക്ക് (കാശ്മീർ - പാർട്ട് 1 )


സ്വപ്നങ്ങൾ അത് യാഥാർത്ഥ്യമാകുമ്പോൾ അനുഭവിക്കുന്ന സന്തോഷം അനിർവചനീയമാണ്. കശ്മീരിലേക്കുള്ള യാത്ര എന്നത് ഏറെകാലത്തെ സ്വപ്നമായിരുന്നു. ഒന്നരപതിറ്റാണ്ടോളം കാത്തിരുന്നശേഷമാണ് താഴ്വരയിലേക്കുള്ള യാത്രയെന്ന സ്വപ്നം യാഥാർത്ഥ്യമായത്. കശ്മീരെന്നത് സ്വപ്നകേന്ദ്രമായി മാറിയത് ബിരുദ്ദപഠന കാലത്താണ്. ബിരുദ്ദത്തിന് ട്രാൻസിലേഷൻ പ്രൊജക്ടായി കശ്മീരിലെ പ്രശ്നങ്ങൾ തിരഞ്ഞെടുത്തതോടെ മനസിൽ കയറി കൂടിയതാണ് കശ്മീരികളും ദാൽ തടാകത്തിലെ ശിക്കാരകളും ചിനാർ മരങ്ങളുമെല്ലാം.

ചിനാർ ഇലകൾ
എല്ലാതവണയും കോളേജിൽ പോകുമ്പോൾ ഗീത മിസ്സ് ചോദിക്കുമായിരുന്നു കശ്മീരിൽ പോയോ എന്ന്. ഡിഗ്രിക്ക് പ്രൊജക്ടായി ആദ്യം ചെയ്തു തുടങ്ങിയത് പ്രിയപ്പെട്ട എഴുത്തുകാരി മാധവികുട്ടിയുടെ ഒറ്റയടിപാത എന്ന ഓർമക്കുറിപ്പുകളായിരുന്നു. ഏതാണ്ട് കുറേ ചെയ്തശേഷമാണ് സ്വന്തം സൃഷ്ടി തന്നെ വിവർത്തനം ചെയ്യാൻ തീരുമാനിച്ചത്. ആരാണ് ആ ആശയം ആദ്യമായി മുന്നോട്ടുവെച്ചതെന്ന് ഓർമയില്ല. ആ സമയത്ത് കശ്മിരിലെ പ്രശ്നങ്ങളെ കുറിച്ച് യാദൃശ്ചികമായി സംസാരിച്ചത് ജേർണലിസം അധ്യാപിക സുലഭമിസ്സായിരുന്നു. അന്ന് കാണാത്ത കശ്മീരിനെ കുറിച്ച് എഴുതാൻ ഏറെ സഹായകമായത് ഗീതമിസ്സ് കൊണ്ടുത്തന്ന പുസ്തകങ്ങൾ തന്നെയായിരുന്നു. പാലക്കാട് മുൻ എംപി കൂടിയായ ഭർത്താവ് എൻ.എൻ കൃഷ്ണദാസ് കശ്മീരിൽ പാർലമെൻററി സമിതിക്കൊപ്പം പോയപ്പോഴത്തെ അനുഭവങ്ങളും റിപ്പോർട്ടുകളുടെ പകർപ്പുകളുമെല്ലാം ടീച്ചർ കൊണ്ടുതന്നു. അനുജത്തിയുടെ കശ്മീർ യാത്രവിശേഷങ്ങളും പങ്കുവെച്ച് കശ്മീരിൻറെ നല്ലചിത്രം മനസിൽ കോറിയിട്ടത് ഗീതമിസ്സായിരുന്നു.

പിന്നീട് കശ്മീരിനെ കുറിച്ച് മുറിവേറ്റ പക്ഷി എന്നപേരിൽ ഫീച്ചറെഴുതുകയും ബ്രൂയിസ്ഡ് ബേർഡ് എന്നപേരിൽ ടീച്ചർമ്മയായ ശശികലമിസ്സിൻറെ മേൽനോട്ടത്തിൽ ഇംഗ്ലീഷിലേക്ക് വിവർത്തനം ചെയ്തപ്പോൾ മുതലുള്ള ആഗ്രഹമായിരുന്നു ആ പറുദീസ കാണണമെന്ന്, പറുദീസയിലെ ജനങ്ങളെ അടുത്തറിയണമെന്ന്.

ഡൽഹിയിലേക്ക് ട്രാൻസഫറായി പോരുമ്പോൾ ഇനി നോർത്ത് ഇന്ത്യയിൽ ഒന്നു കറങ്ങണം എന്ന് പഴയ സഹപ്രവർത്തകൻ നോബിൾ പറഞ്ഞപ്പോഴും കശ്മീരെന്ന പേര് തന്നെ നാവിൽ വന്നത് ഒട്ടും യാദൃശ്ചികമാവില്ല, മനസിലെ വലിയ സ്വപ്നങ്ങളിലൊന്ന് പുറത്തേക്ക് വന്നതാകാനേ വഴിയുള്ളു.

യാത്രയെ കുറിച്ച് ശശികല മിസ്സിനോടും ഗീതമിസ്സിനോടും വിളിച്ച് പറഞ്ഞപ്പോൾ അവരുടെ സന്തോഷം വല്ലാത്ത ഊർജ്ജമാണ് പകർന്നത്. ഞാൻ കാശ്മീരിൽ പോകുകയെന്നത് എൻറെ മാത്രം സ്വപ്നം മാത്രമല്ലെന്നും അത് ആഗ്രഹിക്കുന്ന പലരുമുണ്ടെന്ന അറിവ് വല്ലാത്ത സന്തോഷമാണ് പകരുന്നത്. നമ്മുടെ സ്വപ്നങ്ങൾ നമുക്കൊപ്പം കാണാൻ കഴിയുന്ന കുറച്ചുപേരെങ്കിലും ചുറ്റുമുണ്ടെന്നത് വലിയകാര്യമാണ്, പ്രത്യേകിച്ച് ഒപ്പമുണ്ടാകുമെന്ന പ്രതീക്ഷിച്ച പലരും ആ പ്രതീക്ഷ തെറ്റിക്കുമ്പോൾ...

കശ്മീരിലെ സുഹൃത്ത് ഫിർദൌസ് വഴി കശ്മീരിൽ എല്ലാസൌകര്യങ്ങളും ഒരുക്കിയിരുന്നു. ഫിർദൌസിൻറെ കസിൻ ബ്രദർ ഹോട്ടലും വാഹനവുമെല്ലാം തലേന്ന് തന്നെ റെഡിയാക്കിയിരുന്നു. വാർത്തകൾക്കപ്പുറത്തേക്ക് ഒരു യാത്ര നടത്തുന്നത് ഏറെ കാലത്തിനുശേഷമാണ്. ഒന്നും പ്ലാൻ ചെയ്യാതെ നടത്തുന്ന പതിവ് യാത്രകളിൽ നിന്ന് തീർത്തും വ്യത്യസ്ഥമാവുകയാണ് കശ്മീരിലേക്കുള്ള യാത്ര.

ഗർ ഫിർദോസ്, റുഹെ സമീൻ അസ്ത്, ഹമീൻ അസ്തോ, ഹമീൻ അസ്തോ, ഹമീൻ അസ്ത്...” ("Gar firdaus, ruhe zamin ast, hamin asto, hamin asto, hamin ast...")
ഭൂമിയിൽ ഒരു സ്വർഗമുണ്ടെങ്കിൽ അതിവിടിയൊണ്...അതിവിടെയാണ്...അതിവിടെയാണ്...

നമ്മുടെ കൊച്ചുകേരളം ദൈവത്തിൻറെ സ്വന്തം നാടാണെങ്കിൽ കശ്മീർ ദൈവത്തിൻറെ പറുദീസയാണ്. പൂന്തോട്ടങ്ങളും അരുവികളും മലകളും മഞ്ഞുപാളികളും തടാകങ്ങളും നദികളുമെല്ലാം നിറഞ്ഞ് നിൽക്കുന്ന പറുദീസ....

ശ്രീനഗർ വിമാനത്താവളം
സഞ്ചാരികളുമായി നീങ്ങുന്ന ദാൽ നദിയിലെ ഷിക്കാരകൾ... ഝലം നദിയിലൂടെ പൂക്കളുമായി ഒഴുകിയെത്തുന്ന കൊച്ചുവള്ളങ്ങൾ... ജഹാംഗീറിൻറെ പൂന്തോട്ടത്തിൽ പുഞ്ചിരിതൂകി നിൽക്കുന്ന പൂക്കൾ... കോടമഞ്ഞിൻറെ പുതപ്പണിഞ്ഞ് നിൽക്കുന്ന ചിനാർ മരങ്ങൾ.... പൈൻ മരങ്ങൾ നിരയിട്ട ഹിമാലയനിരകൾ.... മഞ്ഞുമലകളിൽ നിന്ന് ഊർന്നിറങ്ങുന്ന അരുവികൾ.... ഇരമ്പിയെത്തുന്ന സിന്ധുനദി... തണുപ്പിനെ വെല്ലാൻ വലിയ ഉടുപ്പും ധരിച്ച് നീങ്ങുന്ന കശ്മീരികൾ... ആടിനെ മേയ്ച്ച് നടക്കുന്ന ഇടയൻമാർ...  ഇടയിൽ ഉയരുന്ന അശാന്തിയുടെ വെടിയൊച്ചകൾ, രക്തചൊരിച്ചിലുകൾ....
താഴ്വരയുടെ വിവിധ ഭാവങ്ങൾ മനസിലൂടെ മിന്നൽ വേഗത്തിൽ കടന്നുപോയി.

ആഗ്സറ്റിലെ ആദ്യ ഞായറാഴ്ച്ച രാവിലെയാണ് ശ്രീനഗറിലെ സൈനിക വിമാനത്താവളത്തിൽ സുഹൃത്ത് നോബിളുമൊത്ത് വന്നിറങ്ങിയത്. മനസ് വല്ലാതെ സന്തോഷം കൊണ്ട് നിറഞ്ഞിരുന്നു. പുറത്ത് പക്ഷെ കരുതിയത് പോലെ തണുപ്പില്ല, നല്ല ചൂട്. കശ്മീരിൻറെ തണുപ്പ് മാഞ്ഞുതുടങ്ങിയത്പോലെ.

വിമാനത്താവളത്തിന് പുറത്ത് കാറുമായി മെഹ്റാജ് ഉണ്ടായിരുന്നു. രാജ്ബാഗിലെ ഹോട്ടലിലിലേക്കുള്ള വഴിനീളെ ചിനാർമരങ്ങൾ തലയുയർത്തി നിൽക്കുന്നു. 5 വിരലുകളുള്ള ചിനാറിൻറെ ഇലയാണ് കശ്മീരിൻറെ അടയാളം. തണുപ്പെത്തുമ്പോഴേക്കും ചിനാർ ഇലകളുടെ നിറം മഞ്ഞയാകും അതോടെ ചിനാറിൻറെ ഭംഗിയും ഇരട്ടിയാകും. ഞായറാഴ്ച്ചയായതിനാൽ കടകളെല്ലാം അവധിയാണ്, ആളുകളുടെ തിരക്കും കുറവ്. അകലെ മലഞ്ചെരുവുകളിലും കുന്നിൻമുകളിലുമെല്ലാം പൈൻ മരങ്ങളും വരിവരിയായി നിൽക്കുന്നു.

യാത്ര ഓരോ 10 മീറ്റർ പിന്നിടുമ്പോളും നിറതോക്കുകളുമായി സൈനികരും അർദ്ധസൈനികരും ജമ്മു ആൻറ് കശ്മീർ പോലീസുമെല്ലാം. ജങ്ഷനുകളിലും സിഗ്നലുകളിലുമെല്ലാം പൊലീസിൻറെ പരിശോധനകൾ. എപ്പോഴും പതിയിരിക്കുന്ന ആക്രമണത്തെ അവർ പ്രതീക്ഷിക്കുന്നുണ്ട്. റോഡിലും ഇടവഴികളിലും കുന്നിനുമുകളിലുമെല്ലാം എകെ 47 ഉം വെടിയുണ്ടകളുമായി അവർ കരുതലോടെ നിൽക്കുന്നു. റോഡിലൂടെ സൈനിക വാഹനങ്ങൾ ഇടതടവില്ലാതെ നീങ്ങികൊണ്ടേയിരുന്നു. മുഴുവനും മറച്ചുകെട്ടിയ സൈനികവാഹനങ്ങളിലൂടെ തോക്കിൻ കുഴലുകൾ മാത്രം പുറത്തേക്ക് നീണ്ടു നിൽക്കുന്നത് കാണാം, അടുത്തെത്തുമ്പോൾ സൂക്ഷിച്ച് നോക്കിയാൽ ജാഗ്രതയോടെ നോക്കുന്ന 2 കണ്ണുകളും കാണാം.

സിഗ്നലുകളിൽ യാചിക്കുന്ന കുറേ കുട്ടികൾ. അവരാരും കശ്മീരികളല്ലെന്ന് മെഹ്റാജ് പറഞ്ഞു. ശരിയാണ്. കശ്മീരികളുടെ തുടുത്ത കവിളുകളോ നിറമോ അവർക്കില്ല. ഇവരെല്ലാം ഉത്തരേന്ത്യയിൽ നിന്ന് ഭിക്ഷയെടുക്കാനായി എത്തിയവരാണ്. അവരെ കണ്ടപ്പോഴെ കാറിൻറെ ഗ്ലാസ് അടച്ചു മെഹ്റാജ്. ഭിക്ഷചോദിച്ചെത്തിയ കുട്ടിക്ക് പൈസ കൊടുക്കാനായി നീട്ടിയപ്പോൾ ഗ്ലാസ് തുറക്കാൻ മെഹ്റാജ് ആദ്യം വിസമ്മതിച്ചു. ഗ്ലാസ് തുറക്കുന്ന സമയം കൊണ്ട് വണ്ടിക്കുള്ളിലെ എന്തെങ്കിലും മോഷ്ടിച്ച് അവരോടിയൊളിക്കുന്നത് പതിവാണത്രേ. കശ്മീരിലെത്തുന്ന സഞ്ചാരികളെ ഇത്തരം കാഴ്ച്ചകൾ അലോസരപ്പെടുത്തുമെന്നും മെഹ്റാജ്. കശ്മീരികൾ ആരും ഇത്രദരിദ്രരല്ലെന്നും എല്ലാവരും നന്നായി ജോലി ചെയ്തു ജീവിക്കുന്നവരുമാണെന്ന് മെഹ്റാജ് കൂട്ടിച്ചേർത്തു.

മെഹ്റാജ് ആയിരുന്നു പിന്നീടങ്ങോട്ട് ഞങ്ങളുടെ സാരഥി. ആള് നല്ല മസിൽമാനാണ്. ബോഡി ബിൽഡിങ്ങും ക്രിക്കറ്റുമാണ് ഇഷ്ടവിനോദങ്ങൾ. ഒരു ലക്ഷം രൂപ പ്രൈസ് മണിയുള്ള ക്രിക്കറ്റ് മത്സരം ഉപേക്ഷിച്ചാണ് മെഹ്റാജ് ഇന്ന് ഞങ്ങൾക്കൊപ്പം വന്നത്. ഇടക്കിടെ കളിയുടെ അപ്ഡേറ്റ്സുമായി വിളിവരും മെഹ്റാജിന്. ഫിർദൌസിൻറെ പ്രത്യേകതാൽപര്യപ്രകാരമായിരുന്നു മെഹ്റാജ് ഞങ്ങൾക്കൊപ്പം വന്നത്.
നോബിളുമൊത്ത് ഹോട്ടലിന് മുന്നിൽ

വിമാനത്താവളത്തിൽ നിന്ന് 20 മിനുട്ട് യാത്രയുണ്ട് ഹോട്ടലിലേക്ക്. ഝലം നദി മുറിച്ച് കടന്നുവേണം ഹോട്ടലിലെത്താൻ. ഝലം നദിയിൽ നിറയെ ഹൌസ് ബോട്ടുകൾ നിരന്നുകിടപ്പുണ്ട്. പക്ഷെ അവയെല്ലാം വീടുകളാണ്. വിനോദസഞ്ചാരികളെ കാത്ത് കിടക്കുന്ന ഹൌസ് ബോട്ടുകളല്ല. പഴയ ഹൌസ് ബോട്ടിൽ ഒരു കുടുംബം സുഖമായി കഴിയുന്നു.

രാജ്ബാഗിലെ കെ 2 ഇൻ എന്ന ഹോട്ടലിലാണ് താമസം. നല്ല മുറികൾ. അൽപം വിശ്രമിച്ചശേഷം ആദ്യദിവസത്തെ കാഴ്ച്ചകളിലേക്ക്.

(തുടരും

Friday, 4 August 2017

ഇത് കേരളമാണ്, നിങ്ങളുടെ പരിപ്പ് ഇവിടെ വേവില്ല ഇന്ത്യ ടുഡേക്കാരേ..

ഇന്ത്യ ടുഡെ ചാനല്‍ കേരളത്തിലെ രാഷ്ട്രീയകൊലപാതകങ്ങള്‍ സംബന്ധിച്ച് "കേരള കില്ലിങ്സ്" എന്ന നെടുനീളന്‍ പ്രോഗ്രാമുകളും പരന്പര വാര്‍ത്തകളുമായി ഇന്ന് വായുവില്‍ നിറയുന്നതാണ്
കണ്ടത്.  കേരളത്തെ പാക്കിസ്ഥാനായി ചിത്രീകരിച്ച് അവഹേളിക്കുന്ന ദേശിയമാധ്യമങ്ങള്‍ കേരളത്തിലെ വാര്‍ത്തകള്‍ക്കായി സമയം നീക്കിവെക്കുന്നുവെന്നുവെന്നത് നല്ലകാര്യം. കേരളത്തില്‍ രാഷ്ട്രീയകൊലപതാകങ്ങളുണ്ട്. കാലങ്ങളായി കണ്ണൂരിലും കാസര്‍കോടും
ആലപ്പുഴയിലും തൃശ്ശൂരും ഇടുക്കിയിലുമെല്ലാം രാഷ്ട്രീയകൊലപാതകങ്ങള്‍ നടന്നിട്ടുണ്ട്സംഘര്‍ഷങ്ങള്‍ പലയിടത്തും ഉണ്ടായിട്ടുണ്ട്. അതില്‍ ബിജെപി-ആര്‍എസ്എസ്പ്രവര്‍ത്തകരും, കോണ്‍ഗ്രസ് പ്രവര്‍ത്തകരും ലീഗ് പ്രവര്‍ത്തകരും മാത്രമല്ല കൊല്ലപ്പെട്ടിട്ടുള്ളത്. സിപിഎം പ്രവര്‍ത്തകരും അനുഭാവികളുമുണ്ട്.
ഇന്ത്യ ടുഡെയടെ വാര്‍ത്തയില്‍ പക്ഷെ കൊല്ലപ്പെട്ട സിപിഎമ്മുകാരെ പറ്റി കണ്ടില്ല. കണ്ടത് ആര്‍എസ്എസുകാരെ മാത്രം. അതായത് സിപിഎം മാത്രമാണ് കൊലനടത്തുന്നതെന്ന ആര്‍എസ്എസ് ബിജെപി നേതാക്കളുടെ വാദം ഏകപക്ഷീയമായി അവതരിപ്പിക്കാനാണ് ഇന്ത്യ ടുഡെ ശ്രമിച്ചത്, അല്ലെങ്കില്‍ ശ്രമിക്കുന്നത്. അതെങ്ങനെ നിക്ഷ്പക്ഷ മാധ്യമപ്രവ‍ര്‍ത്തനമാകും?
തിരുവനന്തപുരത്ത് കൊല്ലപ്പെട്ട രാജേഷിന്‍റെ പടം മാത്രമാണ് ചാനലില്‍ കാണിക്കുന്നത്.എന്തുകൊണ്ട് ധനരാജിന്‍റെ പടം കാണിക്കുന്നില്ല? എന്തുകൊണ്ട് ആര്‍എസ്എസുകാര്‍ കൊന്ന അവരുടെ തന്നെ അനുഭാവിയായ പ്ലസ് ടു വിദ്യാര്‍ത്ഥിയായ അനന്തുവിന്‍റെ പടം
കാണിക്കുന്നില്ല? എന്തുകൊണ്ട് തൃശ്ശൂരിലെ ലാല്‍ജിയും ഹനീഫയുമില്ല? എന്തുകൊണ്ട് രാമചന്ദ്രന്‍റെ വീട്ടില് പോയ അവരുടെ വാ‍ര്‍ത്താസംഘം ധനരാജിന്‍റെ വീട്ടിലോ അനന്തുവിന്‍റെ വീട്ടിലോ ചാവക്കാട്ടെ ഹനീഫയുടെ വീട്ടിലോ പോകുന്നില്ല
നിങ്ങള്‍ക്ക് സുധീഷിനെ അറിയുമോ?കണ്ണൂരിലെ എസ് എഫ് ഐ യുടെ നേതാവായിരുന്നു സുധീഷ്. വീട്ടില്‍ കയറി അമ്മയുടെ മുന്നിലിട്ടാണ് വെട്ടികൊലപ്പെടുത്തിയത്.
ആലപ്പുഴയിലെ ഉത്സവത്തിനിടെയാണ് ആര്‍എസ്എസ് ശാഖയില്‍ പോകുന്ന അനന്തുവിനെ ആര്‍എസ്എസ് പ്രവര്‍ത്തകര്‍ തല്ലിക്കൊന്നത്. അനന്തുവിനുമുണ്ട് അമ്മയും അച്ചനും സഹോദരങ്ങളുമെല്ലാം. അനന്തുവിന്‍റെ വീട്ടില്‍ പോകുമോ നിങ്ങള്‍? ഇല്ല
കണ്ണൂരിലെ സവോയ് ഹോട്ടിലിലെ ബോംബേറില്‍ കൊല്ലപ്പെട്ടയാളുടെ വീട്ടിലും നിങ്ങള്‍ പോകില്ല.
തൃശ്ശൂരിലെ ലല്‍ജിയുടേയോ മധുവിന്‍റേയോ ഹനീഫയുടേയോ പെരുന്പിലാവിലെ ബിജീഷിന്‍റെ വീട്ടിലോ നിങ്ങള്‍ പോകില്ല, കാരണം അവിടെയൊക്കെ ഇരയാക്കപ്പെട്ടവര്‍ കോണ്‍ഗ്രസ്കാരോ
സിപിഎമ്മുകാരോ ആണ്. ഇവരെയൊന്നും കൊലപ്പെടുത്തിയത് സിപിഎം അല്ല, മറിച്ച് കോണ്‍ഗ്രസ്കാരോ ആര്‍എസ്എസ്കാരോ ആണ്.
നിങ്ങള്‍ക്കാവശ്യം രാഷ്ട്രീയസംഘര്‍ഷങ്ങളുടെ സത്യാവസ്ഥയല്ല, മറിച്ച് സിപിഎമ്മിനെ കൊലപാതകസംഘമായി ചിത്രീകരിക്കലാണ്. അതിന് ആര്‍എസ്എസ് നേതാക്കള്‍പറയുന്നത്പോലെ നിങ്ങള്‍ക്ക് തിരക്കഥകള്‍ രചിക്കേണ്ടിവരും, ആ തിരക്കഥയ്ക്കനുസരിച്ച് നിങ്ങളുടെ റിപ്പോര്‍ട്ടര്‍മാര്‍ക്ക് വേഷമിടേണ്ടിവരും. അപ്പോള്‍ അത് വാര്‍ത്തയാകില്ല മറിച്ച് പി.ആര്‍ പണിയാണ്.
കേരളത്തില്‍ രാഷ്ട്രീയകൊലപാതകങ്ങള്‍ നടക്കുന്നുണ്ട്, എന്‍ഡിഎഫും കൊന്നിട്ടുണ്ട്കോണ്‍ഗ്രസും കൊന്നിട്ടുണ്ട്, ആര്‍എസ്എസുകാരും കൊന്നിട്ടുണ്ട്, അല്ലാതെ സിപിഎം മാത്രമല്ല കൊന്നത്.
കേരളത്തിലെ രാഷ്ട്രീയസംഘര്‍ഷത്തിന്‍റെ പേരില്‍ ദിവസങ്ങള്‍ നീണ്ട് നില്‍ക്കുന്ന പ്രോഗ്രാമുകളും പരന്പരകളും നടത്തുന്ന ഇന്ത്യ ടുഡെയെ ഷഹറാന്‍പൂരില്‍ ദളിതരെ ആക്രമിച്ച് തുരത്തിയോടിച്ചപ്പോള്‍ കണ്ടില്ല, ഉനയിലും ജാര്‍ഖണ്ഡിലുമെല്ലാം പശുവിന്‍റെ പേരിലും മറ്റും സംഘപരിവാരങ്ങള്‍ ദളിതരേയും മുസ്ലീങ്ങളേയും തല്ലിക്കൊന്നപ്പോള്‍
സംഘപരിവാരങ്ങളെ ഭീകരരാക്കി ചിത്രീകരിക്കാന്‍ രാഹുല്‍ കന്‍വാളിനേയും സംഘത്തേയും എന്തേ കണ്ടില്ല?
അപ്പോള്‍ ഉദ്ദേശം വ്യക്തം. സിപിഎമ്മിനെ ഭീകരസംഘടനയാക്കി പ്രഖ്യാപിച്ച് ആര്‍എസ്എസ്സിന്‍റെ വര്‍ഗ്ഗീയവത്ക്കരണത്തിന് കേരളത്തില്‍ വഴിവെട്ടികൊടുക്കുക. കേരളത്തെ ഐസ്സ്എസ്സിന്‍റെ കേന്ദ്രമായി അവതരിപ്പിക്കാനും പാക്കിസ്ഥാനായുമെല്ലാം നിങ്ങള്‍ ചിത്രീകരിക്കുന്നതിന് പിന്നിലും കേരളത്തില്‍ വര്‍ഗീയധ്രുവീകരണം നടത്താനുള്ള സംഘപരിവാരശക്തികളുടെ താല്‍പര്യസംരക്ഷണം തന്നെയാണ്. 
പക്ഷെ, നിങ്ങള്‍ക്ക് തെറ്റുപറ്റി ഇന്ത്യ ടുഡേയിലെ സുഹൃത്തുക്കളെ. ഇത് കേരളമാണ്. എല്ലാമതവിഭാഗക്കാരും ഒന്നായി കഴിയുന്ന കേരളം. നിങ്ങളുടെ പരിപ്പ് ഇവിടെ വേവില്ല


Tuesday, 1 August 2017

കുഞ്ഞമ്മാമയ്ക്ക്...

ഖാദിയുടെ ഒറ്റമുണ്ടുടുത്ത്, വെളുത്ത ഖദർ ഷർട്ടുമിട്ട്, ചെരിപ്പിടാത്ത കാലുകളുമായി ചിരിച്ചുകൊണ്ട് വരുന്ന സ്നേഹമായിരുന്നു താങ്കൾ ഞങ്ങൾക്ക്. നാരങ്ങാമിഠായിയും ജീരകമിഠായിയും കടലമിഠായിയുമെല്ലാം മറക്കാതെ കൊണ്ടുവരുമായിരുന്ന താങ്കൾ . അമ്മയുടെ അമ്മാവൻമാരിൽ ഇളയവനായത് കൊണ്ടാണോ താങ്കളിങ്ങനെ സൌമ്യനും സ്നേഹനിധിയുമായി മാറിയതെന്ന് പലകുറി ചിന്തിച്ചിട്ടുണ്ട്. ഒരിക്കലും ആരോടും ദേഷ്യപ്പെടുന്നത് കണ്ടിട്ടില്ല, പരിഭവം പറയുന്നതും കേട്ടിട്ടില്ല. ആർക്ക് എന്ത് ആവശ്യമുണ്ടെങ്കിലും വീട്ടിൽ വിശേഷങ്ങളുണ്ടെങ്കിലും അവിടെയെല്ലാം എത്രദൂരെയാണെങ്കിലും ഓടിയെത്തും. തറവാട്ട് കാരണവരെ പോലെ നിർദേശങ്ങൾ കൽപനകളായി പുറപ്പെടുവിച്ചവരിൽ നിന്ന് വ്യത്യസ്ഥനായിരുന്നു താങ്കൾ.
'ഓപ്പോളും ഓപ്പ'യുമെന്ന് പറഞ്ഞ് നിങ്ങൾ സഹോദരങ്ങളെ ഞങ്ങൾ കൊച്ചുമക്കൾ കളിയാക്കുമ്പോളും നിങ്ങൾ ചിരിക്കും. ഒരിക്കലും നിങ്ങൾ  തമാശയ്ക്ക് പോലും തല്ലുകൂടുന്നത് കണ്ടിട്ടില്ല.
രാഷ്ട്രീയപ്രവർത്തനവും സാമുദായിക പ്രവർത്തനവുമെല്ലാം ജീവിതത്തിൻറെ ഭാഗമായികൊണ്ടുനടന്ന താങ്കളായിരുന്നു ഞാൻ കണ്ട ഏറ്റവും ആദർശവാനായ രാഷ്ട്രീയക്കാരൻ.
പട്ടാമ്പി ഓങ്ങല്ലൂരിലെ വീട് വേനലവധിക്കാലത്തെ ഒരു സങ്കേതമായിരുന്നു. വരുന്ന അന്ന് അക്ഷമനായി പാടവരമ്പത്തോ ജംങ്ഷനിലോ വന്ന് കാത്ത് നിൽക്കും. മയിൽ വാഹനം ബസ്സിറങ്ങിയാലുടനെ   നാരങ്ങാവെള്ളവും കൈനിറയെ കടലമിഠായിയും വാങ്ങിതരും. എന്നിട്ട് കൈപിടിച്ച് പാടവരമ്പിലൂടെ വീട്ടിലേക്ക്. പോകുമ്പോളെ വീട്ടിലെ കുളത്തിൽ കുളിപ്പിക്കണമെന്നൊക്കെയുള്ള ഞങ്ങളുടെ ആവശ്യങ്ങളെല്ലാം സമ്മതിക്കും. രാവിലെ ഞങ്ങളുണരുമുമ്പേ രാത്രിയിൽ കാറ്റത്തും മഴയത്തും കൊഴിഞ്ഞുവീണ മാങ്ങയെല്ലാം പെറുക്കി സഞ്ചിയിലാക്കി, ഞങ്ങൾക്ക് തന്നിരുന്നതും വായിക്കാൻ പുസ്തകങ്ങളുടെ കെട്ടുകൾ തന്നെ തട്ടിൻപുറത്തെ പെട്ടിയിൽ നിന്ന് ചുമന്ന് താഴെ കൊണ്ടുത്തന്നതുമൊക്കെ ഒരു വിങ്ങലായി മനസിൽ നിറയുന്നു.
നേരിൽ കണ്ടിട്ട് കുറേകാലമായെന്ന് പറഞ്ഞ് എപ്പോഴും ടി.വി നോക്കിയിരിക്കുമെന്ന അമ്മ പറഞ്ഞപ്പോഴും അതൊരുപരിഭവമായല്ല,മ റിച്ച് സ്നേഹപ്രകടനമായാണ് തോന്നിയത്. അസുഖക്കിടക്കയിൽ എന്നെ കാണണമെന്ന്  ആഗ്രഹിച്ചവരെ ഒന്നും ഒരിക്കലും പോയി കാണാറില്ല എന്ന ആക്ഷേപം ഇക്കാര്യത്തിലുണ്ടാവരുതെന്നുണ്ടായിരുന്നു. അസുഖം മൂർച്ചിച്ചതും തീര വയ്യാതായതും അറിഞ്ഞപ്പോൾ കാണണമെന്ന് തോന്നിയപ്പോഴെ മനസിൽ ഭയമുണ്ടായിരുന്നു, എന്നെന്ന്.  ഡൽഹിക്ക് വരുന്നതിന് രണ്ട് നാൾ മുമ്പ് ചെന്ന് കാണുമ്പോളും അസുഖത്തിൻറെ വേദന മറന്ന് ചിരിച്ചതും കൈപിടിച്ച് നടന്നതും കോലായിലിരുന്ന വിശേഷങ്ങൾ ചോദിച്ചപ്പോഴുമെല്ലാം വലിയ സന്തോഷമുണ്ടായിരുന്നു ആ മുഖത്ത്. ടി.വിയിലെന്നും ശബ്ദം കേൾക്കാറുണ്ടെന്ന് പറഞ്ഞ് ചിരിച്ചു, എന്നത്തേയുംപോലെ കണ്ണുകൾ വിടർത്തി. ഖദറിൻറെ മുണ്ട് കൈയ്യിൽ വെച്ചുകൊടുത്തപ്പോഴും അതേ ചിരി. കണ്ണ് ചെറുതായി നനഞ്ഞത് പോലെ... ഇടക്ക് വിളിക്കണമെന്ന് എന്നോട് പറഞ്ഞെങ്കിലും അതിനായില്ല.
പലപ്പോഴും ഒറ്റപ്പെട്ടപ്പോളും പ്രതിസന്ധികളുണ്ടായപ്പോഴും താങ്ങും തണലുമായിരുന്നു താങ്കൾ. പക്ഷെ ആ തണൽ മരമിനിയില്ല...
ബുധനാഴ്ച്ച ഐവർമഠത്തിൽ ചിതയെരിയുമ്പോൾ ഒരുപക്ഷെ ഞാൻ പതിവുപോലെ തിരക്കിലായിരിക്കാം, ഒന്നും മറന്നിട്ടല്ല, മറക്കാനുള്ള ശ്രമത്തിലായിരിക്കാം. അല്ലെങ്കിലും താങ്കൾ കടന്നുപോകുന്ന സമയം വല്ലാത്ത ഒരു സമയമല്ലേ എനിക്ക്...

ഏറ്റവും സൌമ്യനും സിനേഹനിധിയുമായ കുഞ്ഞമ്മാമയ്ക്ക് ആദരാഞ്ജലികൾ....

Sunday, 30 July 2017

ട്രാക്കിലെ ശകുനികൾ

ഭുവനേശ്വരില്‍ വെച്ച് പി യു ചിത്രയും അനസിനൊന്നും ഏഷ്യന്‍ അത്ലറ്റിക്ക്സില്‍ മെഡല്‍ പ്രതീക്ഷയില്ലെന്ന് പങ്കുവെച്ച ഒളിംപ്യനേറ്റ തിരിച്ചടിയായിരുന്നു 1500 ലെ ചിത്രയുടെ സ്വര്‍ണവും 400 മീറ്ററിലെ അനസിന്‍റെ സ്വര്‍ണവും. സ്വര്‍ണമെഡലോടെ ചിത്രയും അനസും ലണ്ടനിലേക്ക് യോഗ്യതനേടുകയും ചെയ്തു. ട്രാക്കില്‍ നിന്ന് സ്വര്‍ണം ടിന്‍റുവിനുമാത്രമാണെന്നായിരുന്നു ഉറച്ച വാദം, അല്ല അഹങ്കാരം പറച്ചില്‍. ഒടുവില്‍ ടിന്‍റുവിന് ട്രാക്കില്‍ വെച്ച് പെട്ടെന്ന് പിടിപെട്ട വയറല്‍ ഫീവറിനെ തുടര്‍ന്ന് മെഡലുമില്ലാണ്ടയപ്പോള്‍ വല്ല്യേ സങ്കടം. തോല്‍ക്കുമെന്ന് ഉറപ്പായപ്പോള്‍ ടിന്‍റു നമ്പറിറക്കിയതാണെന്ന് വളരെ വ്യക്തമായിരുന്നു. ആദ്യലാപ്പ് കഴിഞ്ഞപ്പോള്‍ ശ്രീലങ്കന്‍ താരം കട്ടക്ക് കട്ടക്ക് ഒപ്പം പിടിച്ചപ്പോള്‍ 500 മീറ്റര്‍ കഴിഞ്ഞപ്പോള്‍ 'നാടകീയം' തന്നെയായിരുന്നു പിന്‍മാറ്റം. ഒടുവില്‍ ഇന്ത്യ ചാമ്പ്യന്‍ഷിപ്പെടുത്തപ്പോഴും വിയര്‍പ്പൊഴുക്കിയ താരങ്ങള്‍ക്കുപകരം ഒളിപ്യന്‍മാരും കൂട്ടരുമായിരുന്നു സ്പോര്‍ട്സ്മാന്‍ സ്പിരിറ്റില്‍ കിരീടം വാങ്ങാനെത്തിയത്.

ഇതേ ഒളിംപ്യന്‍മാരാണ് ഓടി സ്വര്‍ണമണിഞ്ഞ ചിത്രയെ പുറത്താക്കിയത്. ചിത്രയുടെ മെഡല്‍ നേടാനുള്ള കഴിവ് നേരത്തെ അളന്ന് പരാജയപ്പെട്ട മഹാന്‍മാരായ അത്ലറ്റുകളാണ് ഇപ്പോള്‍ ലണ്ടനില്‍ ചിത്രയ്ക്ക് മെഡല്‍ സാധ്യതയില്ലെന്ന് പറഞ്ഞ് പുറത്താക്കിയത്. പോകുന്ന ബാക്കിയെല്ലാതാരങ്ങളും സ്വര്‍ണം കൊണ്ടേ മടങ്ങുവല്ലോ, ഇല്ലെങ്കിലും ഒഫീഷ്യലായി ടൂര്‍ പോകുന്ന ഞങ്ങള്‍ ലണ്ടനില്‍ നിന്ന് ഷോപ്പിങ് നടത്തി സ്വര്‍ണം വാങ്ങി വരാമെന്നായിരിക്കും. ‌

ഉഷയെന്ന ഓട്ടക്കാരിയേയും അഞ്ജു ബോബി ജോര്‍ജെന്ന ചാട്ടക്കാരിയേയും ഏറ്റവും ആരാധനയോടെ കണ്ടവരാണ് മലയാളികള്‍, പക്ഷെ ഒട്ടും സ്പോര്‍ട്സ്മാന്‍ സ്പിരിറ്റില്ലാതെ സ്വന്തം കുട്ടികള്‍ മാത്രമാണ്, അല്ലെങ്കില്‍ തങ്ങള്‍ക്ക് പ്രിയപ്പെട്ടവര്‍ മാത്രമാണ് മെഡല്‍ നേടാന്‍ യോഗ്യരെന്ന അഹങ്കാരം സ്പോര്‍ട്സ്മാന്‍ സ്പിരിറ്റില്ലാത്തതിന്‍റെ തെളിവാണ്. മെഡലിനായി സ്വന്തം കുട്ടികള്‍ മാത്രമല്ല, കഴിവ് തെളിയിച്ച മറ്റ് കുട്ടികളും ഓടട്ടെ മുന്‍ താരങ്ങളെ.....

പി.യു ചിത്രയ്ക്കൊപ്പം ലോകചാമ്പ്യൻഷിപ്പിനുള്ള ഇന്ത്യൻ സംഘത്തിൽ നിന്ന് പറിച്ചെറിയപ്പെട്ട ഒരാൾ കൂടിയുണ്ട്. ട്രാക്കിൽ വിയർപ്പ് ചീന്തി സ്വർണം ഓടിയെടുത്തവൻ, പുരുഷവിഭാഗം 1500 മീറ്ററിൽ അജയ് കുമാർ സരോജ്.

പി.യു ചിത്രയ്ക്ക് വേണ്ടി കേരളത്തിലെ സ്പോർട്സ് മാധ്യമപ്രവർത്തകർ ശക്തമായി നിലകൊണ്ടപ്പോൾ സർക്കാരും കോടതിയും നീതിക്കായി ഒപ്പം നിന്നു. കേന്ദ്രമന്ത്രിയും അത്ലറ്റിക്ക് ഫെഡറേഷനും ഇടപെടാൻ നിർബന്ധിതരായി.

അപ്പോഴും പക്ഷെ അജയ് കുമാറിനുവേണ്ടി ആരേയും കണ്ടില്ല. കേരളത്തിലെ പോലെ സർക്കാരോ മാധ്യമങ്ങളോ അവരുടെ നഷ്ടം തിരിച്ചറിഞ്ഞില്ല. ദേശിയ മാധ്യമങ്ങൾക്ക് പക്ഷെ പണ്ടേ ക്രിക്കറ്റ് മാത്രമാണ് മതവും ഭരണഘടനയും.

ഇരുവരും ഭുവനേശ്വരിലെ ട്രാക്കിൽ മഴയത്തും ചൂടത്തുമോടിയത് ഇന്ത്യയുടെ മെഡൽ പട്ടികയിൽ ഒരു സ്വർണം അധികം ചേർക്കാൻ വേണ്ടിമാത്രമല്ല, സ്വന്തം കഴിവ് ലോക അത്ലറ്റിക്ക് ചാമ്പ്യൻഷിപ്പിലും കാഴ്ച്ചവെക്കാനാണ്, ലോകോത്തര താരങ്ങളോട് പൊരുതാനാണ്.

കുശുമ്പും കുന്നായ്മയും മത്രം കൈമുതലായ നമ്മുടെ ഇതിഹാസ താരങ്ങൾ നിരീക്ഷിച്ച് നിരീക്ഷിച്ച് ഇല്ലാതാക്കിയത് ഇവരുടെ സ്വപ്നങ്ങളാണ്, മായ്ക്കാൻ ശ്രമിച്ചത് ഇവർ ട്രാക്കിലൊഴുക്കിയ വിയർപ്പുകണങ്ങളാണ്...

ഈ കുറിപ്പെഴുതി അവസാനിപ്പിക്കുമ്പോളാണ്  ലോകചാമ്പ്യൻഷിപ്പിലെ മത്സരയിനങ്ങളുടെ എൻട്രി പട്ടിക ഫെഡറേഷൻ വെബ് സൈറ്റിൽ പ്രസിദ്ധീകരിച്ചിരിക്കുന്നത്. അതിൽ പി.യു ചിത്രയില്ല, അജയ് കുമാറുമില്ല. ഭാഗ്യത്തിന് ഇന്ത്യയുടെ  ആദ്യ പട്ടികയിൽ നിന്ന് പുറത്തായിരുന്ന സുധാസിങ് വനിതകളുടെ 3000 മീറ്റർ സ്റ്റീപിൾ ചെയ്സില്ർ ഇടം നേടി, ദ്യുതി ചന്ദിന് 100 മീറ്ററിലും പ്രവേശനം ലഭിച്ചു. ഇനി ശനിയാഴ്ച്ച വൈകുന്നേരം മാത്രം ചിത്രയ്ക്കായി ഇന്ത്യൻ അത്ലറ്റിക്ക് ഫെഡറേഷൻ അയച്ചകത്ത് അന്താരാഷ്ട്ര അത്ലറ്റിക്ക് ഫെഡറേഷൻ പരിഗണിക്കുമോയെന്നത് സംശയമാണ്.

ബന്ധുക്കളേയും വീട്ടുകാരേയും വിട്ട് നിങ്ങളെത്ര ന്യായീകരിച്ചാലും മാധ്യമങ്ങളെ ബഹിഷ്ക്കരിച്ചാലും നിങ്ങളുടെ തെറ്റിന് കാലം പോലും മാപ്പ് തരില്ല. പിടി ഉഷേയയും അഞ്ജു ബോബിജോർജിനേയും വലിയതാരങ്ങളാക്കിയതിൽ കലർപ്പില്ലാത്ത സ്പോർട്സ്മാൻ സ്പിരിറ്റോടെ നിങ്ങളെെയെല്ലാം പരിശീലിപ്പിച്ച കോച്ചുമാർക്കുമുണ്ട് പങ്ക്.... ഇവിടുത്തെ കായിക പ്രേമികൾക്കുമുണ്ട് പങ്ക്... മാധ്യമങ്ങൾക്കുമുണ്ട് പങ്ക്...
ട്രാക്കിൽ നിങ്ങൾ പൊരുതിവീണപ്പോഴെല്ലാം കണ്ണുനിറച്ച പഴയ തലമുറയും ആ വീരഗാഥകൾ കേട്ട് കോരിത്തരിച്ച്, നിങ്ങളെയോർത്ത് ആവേശം കൊണ്ട ഇപ്പോഴത്തെ തലമുറകളും നിങ്ങളെയോർത്ത് ഇനി ഒരുപക്ഷെ ലജ്ജിക്കും.... മറക്കരുത്.

Tuesday, 20 June 2017

അയാൾ ഇനിയുറങ്ങട്ടെ...


എഴുതാൻ ബാക്കിവെച്ച
നിരവധി കഥകൾ
അയാളുടെ മനസിലുണ്ടായിരുന്നു
പറയാൻ ബാക്കിവെച്ച കുറേ വിശേഷങ്ങളും
പങ്കുവെക്കാൻ ആഗ്രഹിച്ച കുറേ അനുഭവങ്ങളും
അവ എഴുതാതെ, പറയാതെ, പങ്കുവെക്കാതെ
അയാൾ പോവുകയാണ്.

ശേഷിച്ച എല്ലായാത്രയും ചേർത്ത് ഒന്നാക്കി
കണ്ണടച്ച് കാഴ്ച്ചകൾ കാണാതെ....
ഇനി അയാൾ ഉറങ്ങട്ടെ.....



(150617)

Sunday, 18 June 2017

മുഖം നഷ്ടപ്പെട്ടവർ....


കുട്ടിക്കാലത്തെ ചിത്രമാണ് 
ഇപ്പോൾ അയാളുടെ മുഖപടം.
പക്ഷെ കുട്ടിത്തം, അത് 
ഇല്ലാതായിരിക്കുന്നു.
ആ ചിത്രത്തിനു പിന്നിൽ
മുഖംമറച്ചിരിക്കുന്നത്
മനസിലെ നിഷ്കളങ്കത ചോർന്ന്,
ചിന്താശേഷി പണയംവെച്ച്,
വെറുമൊരു പാവയാണ്. 
ഭൂതവും ഭാവിയും വർത്തമാനവും
നഷ്ടപ്പെടുത്തിയ വെറും പാവ...

(180617)

Tuesday, 30 May 2017

വിസ്മൃതി




എത്രവേഗത്തിലാണ്
നിങ്ങൾ ഒരാളെ
മറവിയുടെ
പടുകുഴിയിലേക്ക്
ചവിട്ടിതാഴ്ത്തുന്നത്....!!!

(290517)

Monday, 29 May 2017

ചൂണ്ട

.
.
.
.
.
ഒറ്റപ്പെടലിൻറെ
തുരുത്തിലിരുന്ന്
മരണത്തിനപ്പുറത്തേക്ക്
ചൂണ്ടയെറിയുകയാണ്
ഞാൻ....!
.
.
(250517)
                            ***************


Friday, 19 May 2017

ജനയുഗം വിജയേട്ടനെന്ന വഴികാട്ടി

വയനാട്ടിലെ വിജി വിജയൻ അന്തരിച്ചു.
മൊബൈൽ സന്ദേശം വായിച്ച് വിശ്വസിക്കാൻ സമയമെടുത്തു.
പെട്ടെന്ന്....?
ജെയിംസേട്ടനെ വിളിച്ചപ്പോൾ സ്ഥിരീകരണമായി.
ക്യാൻസർ ബാധിതനായിരുന്നുവത്രേ. രോഗവിവരം അറിയാൻ വൈകിപ്പോയി.  

വയനാട്ടിലെ മറക്കാനാവാത്ത ഓർമകളുടെ ഭാഗമാണ് വി ജി വിജയനെന്നും മനോരമ വിജയനെന്നുമെല്ലാം അറിയപ്പെടുന്ന വിജയേട്ടൻ.
വയനാട് എനിക്ക് രണ്ടാമത്തെ വീട് തന്നെയാണ്. കേരളത്തിൻറെ തെക്കുമുതൽ ഏതാണ്ട് വടക്കറ്റംവരെ പല ജില്ലകളിലും ദീർഘകാലവും ഹ്രസ്വകാലുവുമെല്ലാം ജോലിചെയ്തിട്ടുണ്ടെങ്കിലും വയനാട് നൽകിയ സ്നേഹവും തണലും മറ്റൊരു നാടും നൽകിയതായി തോന്നിയിട്ടില്ല. ഒരു പക്ഷെ സ്വന്തം നാടുപോലും.

2010 ൽ വയനാട്ടിലേക്ക് ട്രാൻസ്ഫറായി പോകുമ്പോൾ അന്ന് ഏഷ്യാനെറ്റ് എക്സിക്യൂട്ടിവ് എഡിറ്ററായ തോമസേട്ടനും അസോസിയേറ്റ് എഡിറ്ററായിരുന്ന എൻ കെയെന്ന രവിയേട്ടനും ആദ്യം നൽകിയ ഉപദേശം വയനാട്ടിൽ ചെന്നാൽ വിജയനെവേണം ആദ്യം പരിചയപ്പെടാനെന്നായിരുന്നു. വി ജി വിജയേട്ടൻ എന്ന ജനയുഗത്തിൻറെ കണ്ണൂർ റസിഡൻറ് എഡിറ്ററെ. അന്ന് കൽപറ്റയിലെ ഒരു ഷോപ്പിങ് കോംപ്ലക്സിൻറെ മുകളിലത്തെ നിലയിലായിരുന്നു ഏഷ്യാനെറ്റിൻറെ ബ്യൂറോ. നേരെ എതിർവശത്ത് ജനയുഗത്തിൻറെ ബ്യൂറോയും. ചാർജെടുത്ത അന്നുതന്നെ വിജയേട്ടനെ കണ്ടു, പരിചയപ്പെട്ടു. എത്രയോ ജൂനിയറായ എന്നെ ആ മനുഷ്യൻ മുതിർന്ന മാധ്യമപ്രവർത്തകൻറെ ഒരു ജാഡയുമില്ലാത സ്വീകരിച്ചു. താഴത്തെ ബേക്കറിയിൽ നിന്ന് ചായയും പഴംപൊരിയും വിജയേട്ടൻറെ വക. 
അന്ന് സിപിഐ സംസ്ഥാന കൌൺസിലംഗമായ സുരേഷ് ബാബുവിനേയും ഇപ്പോൾ സിപിഐ വയനാട് ജില്ലാസെക്രട്ടറിയായ വിജയൻ ചെറുകരയേയുമെല്ലാം പരിചയപ്പെടുത്തി തന്നു. നല്ല പയ്യനാണ്, നമ്മുടെ പയ്യനാണ് എന്ന ആമുഖത്തോടെ മാത്രമേ വിജയേട്ടൻ ആരെയും പരിചയപ്പെടുത്തിയിട്ടുള്ളു. ഏത് സംശയവും എപ്പോൾ വേണമെങ്കിലും ഓടി പോയിചോദിക്കാൻ അപ്പുറത്ത് വിജയേട്ടനുണ്ടായിരുന്നുവെന്നത് പലപ്പോഴും ആശ്വാസമായിരുന്നു. അതിൽ രാഷ്ട്രീയം മാത്രമല്ല വയനാടുമായി ബന്ധപ്പെട്ട എന്തുമാകാം. ആരെ വിശദാംശങ്ങൾക്കായി സമീപിക്കണമെന്നതും കൃത്യമായി പറഞ്ഞുതരും, വിജയേട്ടൻ തന്നെ അവരെ ഫോണിൽ വിളിച്ച് അറേഞ്ച് ചെയ്യുകയും ചെയ്യും.
ഓഫീസ് മാറിയശേഷവും വിജയേട്ടൻറെ വിളി ഒട്ടുമിക്കദിവസവും വരും. വയനാട്ടിൽ വ്യാജ പി എസ് സി നിയമനവുമായി ബന്ധപ്പെട്ട് ഞാൻ ചെയ്ത വാർത്തകൾ സിപിഐയുടെ ജീവനക്കാരുടെ സംഘടനയായ ജോയിൻറ് കൌൺസിലിനെ വിറളിപിടിപ്പിച്ചപ്പോഴും പിണങ്ങാതെ പരിഭവം കാണിക്കാതിരുന്ന വയനാട്ടിലെ ഏക സിപിഐക്കാരനും വിജയേട്ടനായിരുന്നു. നല്ല വ്യക്തിബന്ധമുണ്ടായിരുന്ന, ഇപ്പോഴുമുള്ള, അന്നത്തെ റവന്യൂമന്ത്രി കെപി രാജേന്ദ്രൻപോലും ഇതേതുടർന്ന് പിണങ്ങിയപ്പോൾ വിജയേട്ടൻ ആയിരുന്നു റവന്യുമന്ത്രിയുടെ ഓഫീസിൽ നിന്ന് ഭൂമി സംബന്ധമായ എൻറെ വാർത്തകൾക്കുള്ള രേഖകളും വിവരങ്ങളും എടുത്തുതന്നിരുന്നത്. എളമ്പിലേരി എസ്റ്റേറ്റ് സംബന്ധിച്ച രേഖകളും ബ്രഹ്മഗിരി എസ്റ്റേറ്റിനറെ രേഖകളുമെല്ലാം എനിക്ക് കൃത്യമായി എടുത്തുതരികയും അതിലെ ഭൂമിപ്രശ്നങ്ങൾ എന്തെല്ലാമാണെന്ന് പറഞ്ഞുതന്നതും വിജയേട്ടനായിരുന്നു. ഭൂമി കയ്യേറ്റങ്ങൾ സംബന്ധിച്ചും തട്ടിപ്പുകൾ സംബന്ധിച്ചും പിന്നീട് നിരവധി വാർത്തകൾ ചെയ്തതിനെല്ലാം അടിത്തറ പാകിയത് വിജയേട്ടൻ പറഞ്ഞുതന്ന ഭൂമി സംബന്ധിച്ച അടിസ്ഥാന വിവരങ്ങളും നിയമവശങ്ങളും തന്നെയാണ്.

വയനാട് വിട്ട് കണ്ണൂരിലേക്ക് പോയപ്പോഴും ഒടുവിൽ ഏഷ്യാനെറ്റ് വിട്ട് മാതൃഭൂമിയിൽ പോയപ്പോഴും മീഡിയ വണ്ണിലേക്ക് ചേക്കേറിയപ്പോഴുമെല്ലാം വിജയട്ടേനുമായുള്ള ബന്ധം തുടർന്നു. മാതൃഭൂമിയിലേക്കുള്ള ചാട്ടം വേണമായിരുന്നോ എന്ന ആശങ്ക പങ്കുവെച്ച 3 വ്യക്തികളിൽ ഒരാൾ വിജയേട്ടനായിരുന്നു. KUWJ  യുടെ പ്രവർത്തനങ്ങളമുയി ബന്ധപ്പെട്ടും അല്ലാതെയും ഇടയ്ക്കൊക്കെ പിന്നെയും വിളിച്ചു. വീട് പണിതുടങ്ങാനുള്ള പദ്ധതിയെകുറിച്ച് പറഞ്ഞപ്പോൾ സംഘടന വഴി 1 ലക്ഷം രൂപ ലോണിൽ സബ്സിഡി കിട്ടുമെന്നും അതിന് ചെയ്യേണ്ടുന്ന കാര്യങ്ങളുമെല്ലാം പറഞ്ഞുതന്നതും വിജയേട്ടനാണ്.

നിയമസഭാതിരഞ്ഞെടുപ്പ് കാലത്ത് കൽപറ്റയിൽ ശശിയേട്ടൻറെ പ്രചാരണത്തിന് പോയപ്പോൾ കാണാനായില്ല. അത്യാവശ്യമായി പുറത്ത് പോയതിനാൽ ഇനി അടുത്തതവണവരുമ്പോൾ കാണാമെന്ന് പറഞ്ഞു. സംഘടനയുടെ സംസ്ഥാന സമ്മേളനത്തിൽ വെച്ചാണ് അവസാനമായി കണ്ടത്. ഒരിക്കലും മായാത്ത ചിരിയുമായി ദൂരേനിന്നെ കൈവീശി കാണിച്ച് വന്ന് കുശലം പറഞ്ഞ് മടങ്ങിയ വിജയേട്ടൻ...


ജനയുഗത്ത് നിന്ന് വിജയനാണ്... വി ജി വിജയൻ....
ആ വിളി ഇനി ഉണ്ടാകില്ല. 
പക്ഷെ സ്ഥലംമാറി ആശങ്കയോടെയും ആവേശത്തോടെയും ചുരം കയറിയെത്തിയവർക്ക് വിജയേട്ടൻ തെളിച്ചുനൽകിയ വെളിച്ചം കെടാതെ കത്തും.... 

എന്നെ സ്മരിക്കാൻ സ്തൂപമല്ല, മരം നടുക...

ഡൽഹിയിലെത്തിയിട്ട് മൂന്നാഴ്ച്ചപിന്നിട്ടപ്പോളാണ് ഒരു വാർത്തയ്ക്ക് പിടിസി (പീസ് ടു ക്യാമറ - റിപ്പോർട്ടർ വാർത്തയ്ക്കിടെ നേരിട്ട് ക്യാമറയ്ക്ക മുന്നിൽ പ്രത്യക്ഷപ്പെട്ട് അവതരിപ്പിക്കുക) എടുത്തത്. കുറച്ചുദിവസമായി ചെയ്യണമെന്നാഗ്രഹിച്ച് വിവരങ്ങൾ ശേഖരിച്ചെങ്കിലും തിരക്കുമൂലം ചെയ്യാൻ സാധിക്കാത്ത വാർത്തയായിരുന്നു ജനിതകമാറ്റം വരുത്തിയ കടുകിൻറെ ഉത്പാദനം സംബന്ധിച്ചുള്ളത്. 

വാണീജ്യാടിസ്ഥാനത്തിൽ ഉത്പാദിപ്പിക്കാൻ അനുമതി തേടിയുള്ള ഡൽഹി സർവ്വകലാശാലയിലെ ഗവേഷകരുടെ പ്രൊപ്പോസലിന് ജനറ്റിക്കൽ എഞ്ചിനീയറിങ് അപ്രൈസൽ കമ്മിറ്റി അംഗീകാരം നൽകിയത് കഴിഞ്ഞ ആഴ്ച്ചയിലാണ്. പദ്ധതിക്ക് അനുമതി നൽകണമെന്ന ജി.ഇ.എ.സിയുടെ ശുപാർശ പരിസ്ഥിതി വകുപ്പ് മന്ത്രി അനിൽ മാധവ് ദവെയുടെ മേശപ്പുറത്തെത്തിയെന്നതായിരുന്നു വാർത്ത. മന്ത്രി ഒരു ഒപ്പ് ചാർത്തിയാൽ ജി എം കടുക് എന്നത് ഇന്ത്യയിലെ പാടങ്ങളിൽ വിതയ്ക്കാൻ തുടങ്ങും. പക്ഷെ ആ വാർത്ത റിപ്പോർട്ട് ചെയ്യുന്നതിന് മുമ്പേ അതിനെതിരെയുള്ള പ്രതിഷേധം ആയിപ്പോയി റിപ്പോർട്ട് ചെയ്യേണ്ടി വന്നത്. തൃശ്ശൂരിൽ നിന്ന് വിജയൻ മാഷാണ് പരിസ്ഥിതി മന്ത്രാലയത്തിന് മുന്നിൽ പ്രതിഷേധം നടത്തുന്നുവെന്ന കാര്യം അറിയിച്ചത്. വിവിധ സംസ്ഥാനങ്ങളിൽ നിന്നുള്ള കർഷകരും സാമൂഹ്യപ്രവർത്തകരും വിദ്യാർത്ഥികളുമടക്കം ധാരാളംപേർ പ്രതിഷേധവുമായെത്തിയിരുന്നു. ചെറിയകുട്ടികളും വിദേശത്തുനിന്നുള്ള ഗവേഷകവിദ്യാർത്ഥികളുമെല്ലാം സമരമുഖത്ത്.

പിടിസി എടുത്തുവേണം വാർത്ത റിപ്പോർട്ട് ചെയ്യേണ്ടത് എന്ന് തീരുമാനിച്ചിരുന്നു. ജി.ഇ.എ.സിയുടെ ശുപാർശ തള്ളി കർഷകരുടെ ചെറുത്തുനിൽപ്പിനൊടുവിൽ ജനിതകമാറ്റം വരുത്തിയ വഴുതനങ്ങയുടെ ഉത്പാദനം രാജ്യത്ത് തന്നെ നിരോധിച്ച മുൻ പരിസ്ഥിതി വകുപ്പ് മന്ത്രി ജയറാം രമേശിൻറെ വഴി അനിൽ ദവേയും പിന്തുടരുമോ എന്നതായിരുന്നു മനസിലെ ചിന്ത. പ്രത്യേകിച്ച് ബിജെപി അനുകൂല കർഷക സംഘടനകളെല്ലാം തന്നെ ഇതിനെതിരെ ശക്തമായി രംഗത്തുള്ളപ്പോൾ. പക്ഷെ പ്രധാനമന്ത്രി മോദി നേരത്തെ ഗുജറാത്തിൽ ജനിതകമാറ്റം വരുത്തിയ പരുത്തികൃഷിയെ പ്രോത്സാഹിപ്പിക്കുന്ന സമീപനം സ്വീകരിച്ച ചരിത്രമുള്ളതുകൊണ്ട് അനിൽ ദവേക്ക് ജയറാം രമേശ് കാണിച്ച ധീരത പ്രകടിപ്പിക്കാനാവുമോയെന്ന ചിന്തയും നിറഞ്ഞു. ബിജെപി ഭരിക്കുന്ന 8 സംസ്ഥാനങ്ങൾ ഇതുവരേയും ജനിതകമാറ്റം വരുത്തിയ കടുകിൻറെ പരീക്ഷണാർത്ഥമുള്ള ഉത്പാദനത്തിനോട് അനുകൂല നിലപാട് സ്വീകരിക്കുകയും ചെയ്യുമ്പോൾ. (രാജസ്ഥാനും മധ്യപ്രദേശും കേന്ദ്രത്തിന് വിയോജിപ്പ് വ്യക്തമാക്കികൊണ്ട് കത്ത് നേരത്തെ തന്നെ അയച്ചിട്ടുണ്ട്).
ദൃശ്യങ്ങളെല്ലാം പകർത്തിയതിനൊടുവിൽ പിടിസി യും എടുത്തു. വാർത്ത സൈൻ ഓഫ് ചെയ്തത് ഏതാണ്ടിങ്ങനെ

പ്രതിഷേധങ്ങളെ തുടർന്ന് ജനിതകമാറ്റം വരുത്തിയ വഴുതനങ്ങയക്ക് നിരോധനം നടപ്പാക്കിയ നാടാണ് ഇന്ത്യ. മുന്‍ പരിസ്ഥിതി മന്ത്രിയുടെ അതേ പാത അനില്‍ ദവേയും ഇപ്പോള്‍ സ്വീകരിക്കുമോയെന്നാണ് കർഷകർ ഉറ്റുനോക്കുന്നത് ...“

(വാര്‍ത്ത  താഴത്തെ  ലിങ്കില്‍ കാണാം)

https://www.youtube.com/watch?v=mDvIJ3GdaG0

മൂന്നാറിലെ പരിസ്ഥിതി പ്രശ്നം പഠിക്കാൻ നേരിട്ടെത്തിയ അനിൽ ദവേ മൂന്നാറിനെ കുറിച്ച് നന്നായറിയാവുന്ന സുഹൃത്ത് ഹരീഷ് വാസുദേവനിൽ നിന്ന് നേരിട്ട് കാര്യങ്ങൾ മനസിലാക്കിയിരുന്നു. ദവേക്ക് പരിസ്ഥിതി കാര്യങ്ങളിൽ കൃത്യമായ നിലപാട് ഉള്ളതായി തോന്നിയതായി ഹരീഷ് പറയുകയും ചെയ്തിരുന്നു. എന്നിരുന്നാൽ കൂടി ജനിതകമാറ്റം വരുത്തിയ കടുകിൻറെ കാര്യത്തിൽ വാണീജ്യതാൽപര്യംകൂടിയുള്ളതിനാൽ എന്തായിരിക്കും നിലപാടെന്ന് സംബന്ധിച്ച് ആശങ്കയുണ്ടായിരുന്നു. പക്ഷെ രാവിലെ ഓഫീസിലെത്തിയപ്പോൾ ആദ്യം കേട്ടവാർത്ത അനിൽ മാധവ് ദവെയെന്ന മന്ത്രി അന്തരിച്ചുവെന്നതാണ്. മനസിലേക്ക് ആദ്യം ഓടിയെത്തിയത് തലേന്നാളത്തെ പിടിസി ആയത് ഒരുപക്ഷെ യാദൃശ്ചികമാവാം.

ഡിസംബറിൽ ന്യുമോണിയ ബാധിച്ച അദ്ദേഹത്തിൻറെ ആരോഗ്യം പിന്നീട് മെച്ചപ്പെട്ടിരുന്നില്ലെങ്കിലും അദ്ദേഹം കൃത്യമായി കാര്യങ്ങൾ പഠിച്ചിരുന്നുവെന്ന് പലരും പിന്നീട് പറഞ്ഞു. മൂന്നാർ മലനിരകളിലെ പരിസ്ഥിതിനാശം നേരിട്ട് കണ്ട് മനസിലാക്കാൻ അദ്ദേഹമെത്തിയതെന്നതും പൂർണആരോഗ്യവാനല്ലാതെയായിരുന്നു. മൂന്നാർ സംരക്ഷണത്തെ കുറിച്ചായിരുന്നു അദ്ദേഹത്തിൻറെ അവസാന വാർത്താസമ്മേളനമെന്നാണ് തോന്നുന്നത്.

ആഗോളതാപനത്തെകുറിച്ചും കാലാവസ്ഥാ വ്യതിയാനത്തെ കുറിച്ചുമെല്ലാം പഠിക്കാനുള്ള വിവിധ സമിതികളിൽ അദ്ദേഹം അംഗമായിരുന്നുവെന്നും ബിയോണ്ട് കോപ്പൻഹേഗൻ എന്നപേരിൽ പരിസ്ഥിതി സംബന്ധിയായ പുസ്തകം തന്നെ അദ്ദേഹം എഴുതിയിട്ടുണ്ടെന്നുമെല്ലാം അറിഞ്ഞപ്പോൾ ഒരുപക്ഷെ അദ്ദേഹം  മണ്ണിനെ നശിപ്പിക്കുന്ന, കർഷകനെ നശിപ്പിക്കുന്ന, ഭക്ഷ്യസുരക്ഷയെ തകർക്കുന്ന ആ ശുപാർശയിൽ ഒപ്പുവെക്കില്ലായിരുന്നുവെന്ന് തോന്നി.

നർമദയുടെ കാവൽക്കാരനായിരുന്നു എന്നും അനിൽ ദവെ. മനുഷ്യൻ മാറിയില്ലെങ്കിൽ നർമദ ഒരു ക്രിക്കറ്റ് പിച്ചായി മാറുമെന്ന് ഭയന്നിരുന്ന നർമദയുടെ കാമുകൻ. നർമദ സംരക്ഷിക്കാൻ 19 ദിവസം റാഫ്റ്റിങ് നടത്തുകയും തീരത്ത് ചെറുവിമാനം പറത്തുകയും ചെയ്തിട്ടുണ്ട് ദവെ. നർമദയുടെ ഉത്ഭവം മുതൽ ബംഗാൾ ഉൾക്കടൽവരെയുള്ള പ്രയാണത്തെ കുറിച്ച് പുസ്തകവുമെഴുതി.


തൻറെ ഓർമയ്ക്ക് സ്തൂപങ്ങളോ സ്മൃതിമണ്ഡപങ്ങളോ അല്ല പണിയേണ്ടത്, മറിച്ച് ഒരു മരം നട്ടാൽ മതിയെന്നായിരുന്നുവത്രേ നർമദയുടെ കാമുകനെന്ന് വിശേഷിപ്പിക്കാവുന്ന അനിൽ മാധവ് ദവേയുടെ അന്ത്യാഭിലാഷം....

Thursday, 11 May 2017

ബുർഹൻ വാനിയല്ല, ഉമർ ഫായിസാണ് കശ്മീരിൻറെ ഹീറോ....

ഡിസംബർ പത്ത്

ലോക മനുഷ്യാവകാശ ദിനം

2016 ലെ ലോകമനുഷ്യാവകാശദിനത്തിലാണ് ഉമർ ഫായിസ് എന്ന കുൽഗാം സ്വദേശി ഇന്ത്യൻ കരസേനയിൽ ഉദ്യോഗസ്ഥനായി ചേർന്നത്. കരസേനയിൽ ലെഫ്റ്റനൻറായി ജോലിക്ക് കയറുമ്പോൾ എന്തെല്ലാം പ്രതീക്ഷകളായിരിക്കണം കശ്മീരിയായ ഉമർ ഫായിസ് മനസിൽ കരുതികാണുക. അശാന്തമായ തൻറെ താഴ്വരയിലെ പ്രശ്നങ്ങൾക്ക് പരിഹാരമുണ്ടാകുമെന്ന് അയാൾ കരുതികാണണം. പക്ഷെ ജോലിക്ക്
കയറി ആറ് മാസം കഴിയുമ്പോളേക്കും സ്വന്തം നാടിനുവേണ്ടി മരിക്കാനായിരുന്നു ഉമറിൻറെ വിധി. അമ്മാവൻറെ മകളുടെ വിവാഹത്തിനായി ഷോപ്പിയാനിലെ വീട്ടിലെത്തിയ പാവത്തെ തട്ടികൊണ്ടുപോയി വധിച്ചത് സ്വന്തം ദാരുണമായി കൊലപ്പെടുത്തിയത്
സ്വന്തം നാട്ടുകാർ തന്നെയാണ്. പ്രാദേശികസഹായത്തോടെ പ്രവർത്തിക്കുന്ന ആ തീവ്രവാദികളുടെ പേരാണ് ആസാദികൾ. ആരുടെ ആസാദിയാണ് അവരപ്പോൾ ആഗ്രഹിക്കുന്നത്? 

കഴിഞ്ഞ കുറേ നാളായ തെക്കൻ കശ്മീരിലെ ഷോപ്പിയാൻ ജില്ലയിൽ തീവ്രവാദികൾ സ്വതന്ത്രമായി തന്നെ വിഹരിക്കാൻ തുടങ്ങിയിട്ട്. സൈന്യവുമായുണ്ടായ ഏറ്റുമുട്ടലിൽ കൊല്ലപ്പെട്ട തീവ്രവാദിയുടെ ശവസംസ്ക്കാരത്തിൽ പരസ്യമായി ആയുധങ്ങളുമായെത്തി അന്ത്യോപചാരമർപ്പിക്കുന്നതിന് വരെ കഴിഞ്ഞദിവസങ്ങൾ സാക്ഷ്യം വഹിച്ചു. ഇത്രപരസ്യമായി തീവ്രവാദികൾ സ്വൈര്യവിഹാരം നടത്തുന്നത് പ്രദേശവാസികളുടെ സഹായത്തോടെയാണ് എന്നതിൽ സംശയിക്കേണ്ടകാര്യമില്ല. ഇതേ പ്രദേശവാസികൾ തന്നെയാണ് ഉമറിനെ തീവ്രവാദികൾക്ക് കാട്ടികൊടുത്തതെന്നതിലും സംശയം വേണ്ട.
23 കാരനായ ഉമർ ഫായിസ് നാഷണൽ ഡിഫൻസ് അക്കാദമിയിലെ മികച്ച വിദ്യാർത്ഥിയായിരുന്നു ഉമർ ഫായിസ്. കുൽഗാമിലെ ഒരു ആപ്പിൾ കർഷകൻറെ മകനായ ഉമർ  നാഷണൽ ഡിഫൻസ് അക്കാദമിയിലെ ഹോക്കി ടീമിലും വോളിബോൾ ടീമിലുമെല്ലാം അംഗമായിരുന്നു. അക്നൂരിലെ രജ്പുത്ന റെജിമെൻറിൽ ആദ്യപോസ്റ്റിങ് ലഭിച്ച് ജൻമനാട്ടിലെത്തിയപ്പോൾ തോന്നിയ ആ സന്തോഷം തീവ്രവാദികൾ തട്ടികൊണ്ടുപോയ ചെവ്വാഴ്ച്ചയിലെ ആ രാത്രിയിൽ ഒരുപക്ഷെ ഉമറിന് തോന്നികാണുമോ?

ഹർമൻ നദീയുടെ തീരത്ത് തീവ്രവാദികളുടെ വെടിയേറ്റും ദേഹമാംസകലും മുറിവുകളുമായി നിശ്ചലനായി കിടന്ന ഫയാസിനേക്കാൾ വലുതാണ് കശ്മീരികൾക്ക് തീവ്രവാദികൾ എന്നത് ചിന്തിക്കേണ്ടവിഷയമാണ്. കശ്മീരികളോട് സർക്കാരുകൾ കാലാകാലങ്ങളായി നടത്തിയ നെറികേടുകളുടെ ഫലമാണത് എന്ന്  വാദിക്കുന്നവരുണ്ടാകാം. കശ്മീരിന് ആസാദിവേണമെന്ന് വാദിക്കുന്നവരുണ്ടാകാം. കശ്മീരിനെ പാക്കിസ്ഥാനൊപ്പം ചേർക്കണമെന്ന് വാദിക്കുന്നവരുമുണ്ടാകാം. അല്ല, കശ്മീർ ഇന്ത്യയുടെ അവിഭാജ്യഭാഗമാണെന്ന് വാദിക്കുന്നവരും ഉണ്ട്. ബുർഹാനിക്കൊപ്പം ഉമറിനൊപ്പം താരതമ്യം ചെയ്യുന്നവരുമുണ്ട്. ബുർഹൻ വാനിയുടെ ശവസംസ്ക്കാര ചടങ്ങിനെത്തിയതിൻറെ നാലിലൊന്നുപോലും ഉമറിൻറെ സംസ്ക്കാരചടങ്ങിനെത്തിയതില്ല എന്നത് തീവ്രവാദികൾക്ക് എത്രമാത്രം പിന്തുണ കശ്മീരിൽ ലഭിക്കുന്നുവെന്നതിൻറെ തെളിവാണ്. ബുർഹൻ വാനി കശ്മീരിൻറെ ആസാദിക്കുവേണ്ടിയാണ് പോരാടിയതെന്ന് വാദിക്കുന്നവർ എവിടെനിന്നാണ് ബുർഹൻ വാനി ആയുധാഭ്യാസം നേടിയതെന്ന് പരിശോധിക്കണം. ആരാണ് ബുർഹനും സംഘത്തിനും ആയുധങ്ങളും പണവും പരിശീലനവും നൽകുന്നതെന്ന് പരിശോധിക്കണം. ഉത്തരം പാക്കിസ്ഥാനിൽ നിന്ന്  എന്ന് തന്നെയാണ്. പാക്കിസ്ഥാൻ എന്തിനാണ് കശ്മീരിലെ യുവാക്കൾക്ക് പണവും ആയുധവും പരിശീലനവും നൽകുന്നത് എന്ന് ചിന്തിച്ചാൽ തീരാവുന്നആയുസേ ആ സംശയത്തിനുള്ളു. ഇന്ത്യയിൽ ആഭ്യന്തരകലാപം – പ്രത്യേകിച്ച് കശ്മീരിൽ - നിരന്തരം സൃഷ്ടിക്കുക എന്ന ഏകലക്ഷ്യം. ഇപ്പോൾ കശ്മീരിൽ നടക്കുന്ന പ്രക്ഷോഭങ്ങൾ ശ്രദ്ധിച്ചാൽ ഇക്കാര്യം വ്യക്തമാണ്. അതായത് കല്ലെറിയുന്ന പ്രക്ഷോഭകാരികളെല്ലാം അവകാശപ്പെടുന്നത് ആസാദിക്കുവേണ്ടിയാണ് തങ്ങളെറിയുന്ന ഓരോ കല്ലുകളുമെന്നാണ്, പക്ഷെ അവരുടെയെല്ലാം കയ്യിലുള്ളത് പാക്കിസ്ഥാൻ പതാകകളാണ്, പ്രക്ഷോഭം നടത്തുന്ന വിദ്യാർത്ഥികളെല്ലാം കോളേജിൽ കെട്ടുന്നത് പാക്ക് പതാകകളാണ്. അപ്പോൾ അതാണോ ആസാദി? പാക്കിസ്ഥാനിലേക്കുമില്ല, ഇന്ത്യയിലേക്കുമില്ല എന്നവാദം പൊള്ളയാണന്നല്ലേ ഇത് തെളിയിക്കുന്നത്.  പാക്കിസ്ഥാനിലെ തീവ്രവാദികളും പാക്ക് സൈന്യത്തിൻറെ ബോർഡർ ആക്ഷൻ ട്രൂപ്പും പിന്നെ തീവ്രവാദസംഘടനകളും തന്നെയാണ് ഇത്തരം പ്രക്ഷോഭങ്ങൾക്ക് നേതൃത്വം നൽകുന്നതെന്നതിൻറെ വ്യക്തമായ തെളിവുതന്നെയാണ് ഇതെല്ലാം. 

കഴിഞ്ഞയാഴ്ച്ച കെജി സെക്ടറിൽ രണ്ട് ഇന്ത്യൻ പട്ടാളക്കാരെ വധിച്ച് തലയറുത്ത് മാറ്റിയപ്പോളടക്കം എത്രതവണ ജനീവ കൺവെൻഷൻ കരാർ തങ്ങൾ അംഗീകരിക്കുന്നില്ലെന്ന് പരസ്യമായി തെളിയിച്ചവരാണ് പാക്കിസ്ഥാൻ. കശ്മീർ തങ്ങളുടേതാണ് അവിടുത്തെ പ്രശ്നം പരിഹരിക്കാൻ ഇടപെടുമെന്ന് പരസ്യമായി എത്രതവണ പാക്ക് അധികൃതർ പറഞ്ഞിട്ടുണ്ട്. അതിനാൽ തന്നെ കശ്മീരിലെ ആഭ്യന്തരസംഘർഷത്തിൽ പാക്കിസ്ഥാന് പങ്കില്ല, കശ്മീരികൾ സ്വയം നടത്തുന്ന സ്വാതന്ത്രയപോരാട്ടമാണെന്ന വാദം വെറും പൊള്ളയാണ്.
ഇന്ത്യ ബലൂചിസ്ഥാൻ ആസാദികൾക്ക് നൽകുന്ന പിന്തുണയും ഇങ്ങനെതന്നെയാണ് കാണേണ്ടത്. ബലൂചിസ്ഥാനിനെ സ്വാതന്ത്ര്യപോരാളികൾക്ക് പിന്തുണ നൽകുന്നതരത്തിൽ ഇന്ത്യൻ അധികാരത്തിലേക്കുള്ള, അവകാശത്തിലേക്കുള്ള കടന്നുകയറ്റമാണ്.
കഴിഞ്ഞ ഉപതിരഞ്ഞെടുപ്പിനോട് കശ്മീരി ജനത കാണിച്ച വിമുഖത നല്ല പ്രവണതയല്ല. ഇന്ത്യൻ ജനാധിപത്യത്തിൽ വിശ്വാസമില്ലെന്ന് പറയുന്ന കശ്മീരി ആസാദികളുടെ പ്രതിനിധികൾ മുൻകാലങ്ങളിൽ തിരഞ്ഞെടുപ്പ് പ്രക്രിയയില്ർ സജീവമായി തന്നെ ഇടപെട്ടിട്ടുണ്ട്. തൊട്ടുമുമ്പത്തെ അസബ്ലിതിരഞ്ഞെടുപ്പിൽ പോലും സാമാന്യം ബേധപ്പെട്ട പോളിങ് തന്നെയാണ് നടന്നിട്ടുള്ളത്. അപ്പോൾ അതിൽ നിന്ന് ഉപതിരഞ്ഞെടുപ്പിലേക്ക് എത്തുമ്പോൾ എന്തുകൊണ്ട് ജനം വിമുഖത പ്രകടിപ്പിക്കുന്നുവെന്നത് പരിശോധിക്കണം.
ബിജെപിയുമായി ചേർന്ന് പിഡിപി സംസ്ഥാനത്ത് സർക്കാർ രൂപീകരിച്ചത് ഒരുമുഖ്യകാരണമാകണം. ഹിന്ദുത്വ അജണ്ടയുള്ള ബിജെപിയുമായി ചേർന്ന് പിഡിപി സർക്കാർ രപീകരിച്ചത് മുസ്ലീം ഭരിപക്ഷപ്രദേശമായ കശ്മീരിൽ ചില്ലറയൊന്നുമല്ല ആശങ്ക സൃഷ്ടിച്ചിരിക്കുക. ഇത് നന്നായി തന്നെ തീവ്രവാദികൾ ഉപയോഗിച്ചുവെന്ന് വേണം കരുതാൻ. വർഗ്ഗീയധ്രുവീകരണത്തിന് ഇത് നല്ലതുപോലെ വിനിയോഗിച്ചുവെന്നത് തന്നെയാണ് ബുർഹൻ വാനിയുടെ മരണത്തിന് ശേഷം നടന്ന സംഭവങ്ങൾ വിരൽ ചൂണ്ടുന്നത്. മാത്രവുമല്ല, കേന്ദ്രത്തിൽ ബിജെപി സർക്കാരാണെന്നതും പാക്കിസ്ഥാനോട് കടുത്തവിരോധം വെച്ചുപുലർത്തുന്ന ബിജെപിക്കാർ കശ്മീരിനെ അടിച്ചമർത്തുമെന്ന ഭീതിയും ഒരുപക്ഷെ ജനങ്ങളെ വ്യാകുലരാക്കിയിരിക്കാം. ഈ ആശങ്കയെല്ലാം യുവാക്കളിൽ ശക്തമായസമയത്ത് തന്നെ പണവും ആയുധവും പരിശീലനവും നൽകി പാക്ക് തീവ്രവാദകേന്ദ്രങ്ങളും പാക്ക് സൈന്യവും മുതലെടുത്തുവെന്നതിൻറെ ഫലമാണ് പിന്നീടുണ്ടായ സംഭവങ്ങൾ. താഴ്വര അതിനുമുമ്പ് സമാധാനത്തിലേക്ക് മടങ്ങിപോകുകയും വിനോദസഞ്ചാരമടക്കമുള്ളവ വലിയതോതിൽ തിരിച്ചുവരുകയും ചെയ്തതാണെന്നത് മറക്കരുത്. 

കശ്മീരിൽ നടന്ന ഒട്ടുമിക്ക തിരഞ്ഞെടുപ്പുകളും സുതാര്യവും നീതിപൂർവ്വമായിരുന്നില്ലെന്നും ഹിതപരിശോധന നടത്തണമെന്നും ആവശ്യപ്പെടുന്നവരുമുണ്ട് സമൂഹത്തിൽ. പക്ഷെ തിരഞ്ഞെടുപ്പ് തന്നെ നീതിപൂർവ്വമായിരുന്നില്ലെങ്കിൽ പിന്നെ ഹിതപരിശോധന മാത്രം എങ്ങനെ സുതാര്യവും നീതിപൂർവ്വമായിരിക്കും?

കശ്മീരിലെ പ്രശ്നങ്ങൾക്ക് ചർച്ചകൾ അനിവാര്യമാണ്. വിഘടനവാദികളോട് ചർച്ചയില്ലെന്ന ഇന്ത്യൻ സർക്കാരിൻറെ നിലപാട് പ്രശ്നങ്ങൾ കൂടുതൽ വഷളാക്കാനേ വഴിവെക്കു. സൈന്യം ധാരാളം അതിക്രമങ്ങൾ കശ്മീരികളോട് ചെയ്തിട്ടുണ്ട്, ഭരണകൂടവും. സംശയമില്ല. ചർച്ചകൾ തുടരണം. സൈന്യം നടത്തുന്ന മനുഷ്യാവകാശലംഘനങ്ങൾ സംബന്ധിച്ച് പരിശോധനവേണം, നടപടി വേണം. ഒപ്പം തന്നെ സമാധാനം കെടുത്താൻ മനപ്പൂർവ്വം ശ്രമിക്കുന്ന തീവ്രവാദികൾക്കെതിരെ ശക്തമായ പോരാട്ടവും. അതിന് കശ്മീരികളുടെ പിന്തുണയും വിശ്വാസവും ആർജ്ജിക്കാനാവണം. പ്രശ്നക്കാരെ ഒറ്റപ്പെടുത്താനും അകറ്റിനിർത്താനും ഇത് സഹായിക്കും. കശ്മീരിൽ നിന്ന് പലായനം ചെയ്ത് കശ്മീർ പണ്ഡിറ്റുകളേയും ചർച്ചയുടെ ഭാഗമാക്കണം.

മകൻറെ മൃതദേഹത്തിൽ ദേശിയപതാക പുതപ്പിച്ച് സൈനിക ബഹുമതികൾ നൽകിയ പട്ടാളക്കാരോടോ ഉദ്യോഗസ്ഥരോടോ ഉമറിൻറെ ബാപ്പ ഒന്നുമിണ്ടിയില്ല. വാവിട്ട് കരഞ്ഞ് ഉമറിൻറെ തലഭാഗത്ത് ഉമ്മയിരുന്നു. പരസ്പരം ഒന്ന് ആശ്വസിപ്പിക്കാൻപോലുമാവാതെ സഹോദരിയും ബന്ധുക്കളും കൂട്ടുകാരുമെല്ലാം. ആസാദികൾ എന്നവകാശപ്പെടുന്നവരപ്പോഴും കശ്മീരിലെ ഏതൊക്കെയോ തെരുവോരങ്ങളിൽ കല്ലെറിഞ്ഞുകൊണ്ടിരുന്നു. മൌനമായി ഇരുന്ന ആ വൃദ്ധൻറെ മനസിൻറെ വേദന ആർക്കളക്കാനാവും? ഈ ആസാദികൾക്ക് കശ്മീരിയായ ഉമർ ഫയാസിൻറെ ഉമ്മയുടെ കണ്ണീരിന് മറുപടി നൽകാനാവുമോ? ഉമറിൻറെ ബാപ്പയുടെ മൌനത്തിന് മറുപടി നൽകാനാവുമോ? ബുർഹൻ വാനിക്ക് മാത്രമല്ല, ഉമറിനുമുണ്ട് ഉമ്മയും ബാപ്പയും. 

കശ്മീരികളെല്ലാം ഇന്ത്യക്കെതിരെ സമരത്തിലാണെന്ന വാദങ്ങൾ അടിസ്ഥാനരഹിതമാണ്. കശ്മീരിൽ സമാധാനകാംക്ഷികളായ നിരവധിപേരിപ്പോഴുമുണ്ട്. അവരുടെ പ്രതിനിധിയാണ് ഉമർ ഫയാസ്. കലാപങ്ങളുണ്ടാക്കണമെന്ന് ആഗ്രഹിക്കുന്നവരുടെ പ്രതിനിധിയാണ് ബുർഹൻ വാനി. ഇവരിൽ തീർച്ചയായും ഉമർ ഫായിസായിരിക്കും കശ്മീരിൻറെ യഥാർത്ഥ ഹീറോ.